Read Quechua Cuzco Bible 1988 EZEKIEL 35 Bible Online

EZEKIEL 35 - Quechua Cuzco Bible 1988 bible

EZEKIEL 35

¹Señor Diosmi niwarqan: Qan, runa,

²Seir orqo ladoman kutirispa pay contra profetizay:

³Qollana Señor Diosmi nin: Yaw Seir orqo, ñoqan qanpa awqayki kani, chaymi muchuchisqayki raqay-raqay ch'usaqman tukuchispay.

⁴Llaqtaykikunatapas lliwtan thunisaq, qantaqmi ch'inneqman tukuchisqa kapunki, chay hinapin reqsiwanki ñoqa Señor Diosqa kasqayta.

⁵Qanqa ñawpaqmantapas Israelpa awqallanpunin karqanki, paykunaqa huchankunamanta p'uchukay hatun ñak'ariyta chaskishaqtinkun, qanqa espadawan wañuchirqanki.

⁶Chaymi ñoqarayku rimarini qantaqa wañuymanpuni hap'ichinaypaq, hinan wañuyqa qatiykachasunki. Runa wañuchiyta mana manchakuqtiykin, wañuypas mana manchakusunkichu.

⁷Seir orqo, pasaqtan purunyachisqayki, pipas qanninta puriqtaqa wañuchisaqmi.

⁸Orqoykikunata, moqoykikunata, wayq'oykikunata, k'ahaykikunatapas awqa-tinkuypi wañuq ayakunawanmi hunt'aykachisaq.

⁹Wiñaypaqmi purunyachipusqayki, hinan manapuni pillapas llaqtaykikunapi tiyanqañachu, chaymi qankunaqa reqsiwankichis ñoqa Señor Diosqa kasqayta.

¹⁰Ñoqa Señor Diosqa chaypi tiyashaqtiypachan, qanqa nirqanki: Israel suyuta Judá suyuta llaqtakunantintakama hap'ikapuspan tiyasaq, nispayki.

¹¹Chayrayku ñoqa Qollana Señor Diosqa sutiyrayku jurani, imaynatan Israelpaq phiñakurqanki, payta cheqnikurqanki, envidiakurqanki, chay hinallatataqmi ñoqapas muchuchisqayki. Qanta muchuchiqtiymi paykuna reqsiwanqaku.

¹²Chay hinapin yachanki Israelpa orqonkuna contra imaymana k'amisqayki uyarisqayta. Qanmi nirqanki: Kunanqa purunyasqan kapun, atinchismi oqorqoyta, nispayki.

¹³Simiykita hatunta hanllarispan qalluykita hayt'arimuwarqanki, ñoqataq uyarirqayki.

¹⁴Chayraykun ñoqa Qollana Señor Diosqa niyki: Qanta pasaqta thuniqtiymi lliw pachantin kusikunqaku.

¹⁵Qanmi kusikurqanki Israelqa huchanmanta purunyachisqa kashaqtin, chay hinallataqmi qanwanpas kanqa Seir orqo, qanmi Edom suyuntin pasaq purunyachisqa ch'inneqman tukupunki, hinan llapanku yachanqaku ñoqa Señor Diosqa kasqayta, nispan, nispayki.