Read Quechua Cuzco Bible 1988 EZEKIEL 36 Bible Online

EZEKIEL 36 - Quechua Cuzco Bible 1988 bible

EZEKIEL 36

¹Qan, runa, Israelpa orqonkunata profetizaspa niy: Israelpa orqonkuna, Señor Diospa siminta uyariychis. Qollana Señor Diosmi nin: Awqaykichismi nirqan qanmanta: ¡Hahaháy! ¡Chay ñawpa orqokunaqa ñoqaqñan! nispa. Hinantin cheqasmantan qankunaman awqaykichisqa phawaykamuspa llat'anarqasunkichis, llapan wak llaqtayoqkunan qankunata kaqnichakurqasunkichis, hinaspataq runakuna pisicharqasunkichis rimakurqasunkichis ima.

⁴Chayrayku Qollana Señor Diospa rimasqanta uyariychis Israelpi orqokuna, moqokuna, k'ahakuna, wayq'okunapas. Señor Diosmi qankunata raqay-raqay kaqkunata, ch'usaqyachisqa llaqtakunata nin: Muyuriqniykichispi suyukunan llat'anarqasunkichis asipayarqasunkichis,

⁵chaymi ñoqa Qollana Señor Diosqa k'arakta phiñakuspa rimarirqani wakin suyukuna contra Edom contrapiwan. Paykunan millay yuyaywan hatun kusikuypiwan hallp'ayta munaychakurqanku pasaqtapuni llat'ananankupaq, nispa, nispayki.

⁶Chayrayku Israel suyumanta profetizaspa, orqokunata, moqokunata, k'ahakunata, wayq'okunatapas niy: Qollana Señor Diosmi nin: Wak suyukunan qankunata pisichaspa asikurqanku, chaymantan ñoqaqa sonqo nanasqa phiñasqa kashani.

⁷Chayraykun ñoqaqa manchanata jurani muyuriqniykichispi suyukunapas pisichasqa asipayasqa kanankupaq.

⁸Qankunataq Israel suyu orqokuna, k'allmasapa mallkikunaq wiñasqan kankichis, askhatataq ruruchinkichis Israel wawaykunaq mikhunanpaq, paykunaqa kutimunan patapiñan kashanku.

⁹Ñoqan sumaqta qhawarispa yanapasqaykichis, hinan tarpusqa t'akasqa kankichis.

¹⁰Israel llaqtayta qanpi tiyaykachispaymi askhatapuni mirachisaq. Llaqtakunamanmi hunt'aykunqa runakuna, raqaykunaq kasqanpin wakmanta wasichakunqaku.

¹¹Qankuna patamanmi miraykachisaq runakunata uywakunatapas askhallaña kanankupaq. Ñawpa hinan askha wasikuna kapunqa, qankunapas ñawpaqmantaqa astawan allinmi kapunkichis. Hinaspan reqsiwanqaku ñoqa Señor Diosqa kasqayta.

¹²Israelpi orqokuna, qankuna patapin llaqtay runata purichisaq, paykunataqmi qankunata herenciankupaq kaqnichakapusunkichis, hinan qankunaqa mana hayk'aqpas wawankuta qechunkichisñachu, nispa.

¹³Qollana Señor Diosmi orqokunamanta nillantaq: Qankunamantan rimanku: Runan mikhukuq llaqtanpa wawan ch'usaqyachiq, nispa.

¹⁴Chay hinaqa, amañayá kunanmantaqa runata mikhuqchu kanki, amataq llaqtanpa wawan ch'usaqyachiqpaschu, ñoqa Qollana Señor Diosmi chayta nini.

¹⁵Manan munanichu wak suyukunaq wakmanta k'aminasuykichista, manañan chay suyukunaq asipayasqanta uyarinkichisñachu, qankunaqa manañan llaqtanpa wawan ch'usaqyachiqñachu kankichis. Ñoqa Qollana Señor Diosmi chayta nini, nispayki.

¹⁶Señor Diosmi niwarqan:

¹⁷Qan, runa, uyariway. Suyunkupi tiyashaspankun Israel runakunaqa qhellichakapurqanku millay ruwasqankuwan. Paykunaq kawsayninkun ñoqapaqqa karqan killan puriq warmiq qhellin hina.

¹⁸Chaymi k'arakta phiñakuspay paykunata muchuchirqani, suyupi runakunata wañuchisqankumanta wak'a dioskunata yupaychaspa hallp'ata qhellichasqankumantawan.

¹⁹Kaqllataq hinantin llaqtakunaman suyukunamanwan ch'eqeykachirqani, ñoqan t'aqtarqani ruwasqankuman hina.

²⁰Ichaqa hinantin chayasqanku suyupin ch'uya sutiyta pisicharqanku, chay runakunataq nirqanku: Kaykunaqa Señor Diospa llaqtanmi, chaywanpas ichaqa suyukunamanta qarqochikamurqankun, nispa.

²¹Israel runakunan hinantin suyuman chayasqankupi ch'uya sutiyta pisicharqanku, chayraykun yuyaykurqani sutiyta mana pisichanankupaq.

²²Chay hinaqa Israel runakunata niy: Qollana Señor Diosmi nin: Israel runakuna, hinantin suyukunaman chayasqaykichispin ch'uya sutiyta pisicharqankichis. Kunan imatachus ruwasaq chayqa manan qankunaq allinniykichispaqchu kanqa, aswanmi ch'uya sutiy hatunchasqa kananpaq kanqa.

²³Qankunan sutiyta suyukunapi pisicharqankichis, ñoqataqmi suyukunaman rikuchisaq may ch'uyataq hatuntaq sutiyqa kasqanta, hinan paykuna yachanqaku ñoqa Señor Diosqa kasqayta. Qankunata imaynatachus ruwasqaywanmi suyukunaman rikuchisaq ñoqaqa ch'uya kasqayta. Ñoqa Qollana Señor Diosmi chayta nini.

²⁴Chay hinantin llaqtakunamanta suyukunamantawanmi ñoqa horqokampusqaykichis, huñurqospaymi suyuykichisman kutichimpusqaykichis.

²⁵Ch'uya unuwanmi ch'aqchusqaykichis, hinan qankuna ch'uyanchasqa kankichis. Ch'uyanchasqaykichismi llapan qhelliykichiskunamanta wak'a diosniykichiskunamantawan.

²⁶Mosoq sonqotawan mosoq yuyaytawanmi churasqaykichis. Qechupusqaykichismi chay rumi sonqoykichista, hinaspan kasukuq sonqota churasqaykichis.

²⁷Qankunamanmi Espirituyta qosqaykichis, hinaspan hunt'achisqaykichis kamachikuy simiykunata unanchasqa simiykunatawan.

²⁸Machulaykichisman qosqay suyupitaqmi tiyakapunkichis, hinaspan llaqtay kankichis, ñoqataq Diosniykichis kasaq.

²⁹Lliw qhellichaqniykichismantan qespichisqaykichis. Chakraykichistan kamachisaq askha trigota ruruchinanpaq, yarqaywanpas manañataqmi muchuchisqaykichischu.

³⁰Hinallataq mallkikunatapas mikhuykunatapas allinta ruruchisaq, manañan yarqay kanqachu wak suyukunaq qayllanpi p'enqasqa kanaykichispaq.

³¹Chaymantataq millay-kayniykichismanta mana chanin ruwasqaykichismantawan yuyarispaykichis, qankuna kikillaykichismanta millakapunkichis huchaykichismanta millay ruwasqaykichismantapas.

³²Israel runakuna, ñoqa Qollana Señor Diosmi nini, allinta yachaychis, kaytaqa ruwani manan qankunaraykuchu, aswanpas millay mana chanin ruwasqaykichismanta p'enqakunaykichispaqmi.

³³Ñoqa Qollana Señor Diosmi nini, lliw huchaykichiskunamanta ch'uyanchaqtiymi, tiyakapunkichis llaqtaykichispi, hinaspanmi raqaykunata allicharispa wasichakapunkichis.

³⁴Ch'inneq purunman tukupuq hallp'an yanqa ch'in kashanantaqa tarpusqa kapunqa, llapa chayninta puriqkunaq qhawarinankupaq.

³⁵Hinan ninqaku: Kay ch'in hina kapuq hallp'amá, kunanqa Edén huerta hinaraq kapusqa, thunisqa k'upaykusqa raqay-raqay llaqtapas kunanqa wasikunawan hunt'aykusqa, allin perqasqa pakakuna llaqta kapusqa, nispa.

³⁶Chay hinapin muyuriqniykichispi suyukuna yachanqaku ñoqa Señor Diosqa thunisqaytapas sayarichiq purunyasqatapas tarpuq kasqayta. Ñoqa Señor Diosqa nisqaytaqa ruwasaqpunin, nispan, nispayki.

³⁷Ñoqa Qollana Señor Diosmi nillanitaq: Huk kutimantawanmi Israel runakunaq mañakusqanta uyarisaq, hinallataq paykunata askhayachisaq ovejata hinaraq.

³⁸Thunispa purunyachisqa raqay-raqay llaqtakunan askha runawan hunt'aykusqa kanqa, Jerusalenpi fiestaman ovejakunata sacrificanapaq qatimunku chay hinaraqmi kanqa. Chay hinapin reqsiwanqaku ñoqa Señor Diosqa kasqayta, nispa.