Read Quechua Cuzco Bible 1988 EZEKIEL 37 Bible Online

EZEKIEL 37 - Quechua Cuzco Bible 1988 bible

EZEKIEL 37

¹Señor Diospa atiynintan sonqoypi repararqani, hinan paypa Espiritunqa apawarqan askha tullukunawan hunt'a wayq'oman.

²Chaypin Señor Diosqa hinantin cheqasman tullukunaq kasqan wayq'opi pusaykachawarqan, pampapitaq rikurqani askhallaña tunti tullukunata.

³Hinan Señor Diosqa tapuykuwarqan: —¿Qan yuyankichu kay tullukunaq kawsarinanta? nispa. Ñoqataq nirqani: —Qanllan yachanki, Qollana Señor Diosníy, nispay.

⁴Chaymi payqa niwarqan: —Chay tullukunaman profetizaspa niy: ¡Yaw ch'aki tullukuna, uyariychis Señor Diospa siminta!

⁵Qollana Señor Diosmi nisunkichis: Qankunamanmi qosqaykichis kawsay samayta, hinan kawsaripunkichis.

⁶Hank'ukunatan churasqaykichis, aychawanmi hunt'achisqaykichis, patanmantaqmi qarawan ch'utiykusqaykichis, hinaspan kawsay samayta qosqaykichis, qankunataq kawsarimpunkichis. Hinan reqsiwanqaku ñoqa Señor Diosqa kasqayta, nispan, nispayki.

⁷Ñoqataq rimarqani paypa kamachiwasqanta hina. rimashaspaytaq chhaqaqaqaqta uyarirqani, hinan ch'ulla-ch'ullamanta tullukuna huñuykunakurqan.

⁸Qhawashallaqtiymi hank'unkuna rikhurirqorqan, chaymantaqa aychañataq hunt'aykurqan, patanmantaq qara ch'utiykukurqan, ichaqa manan kawsay samayniyoqraqchu karqanku.

⁹Hinan Señor Diosqa niwarqan: —Qan, runa, profetizaspa wayrata niy: Qollana Señor Diosmi nin: Hamuy hinantin cheqasmanta, hinaspa chay ayakunaq sonqonman phukuykuy kawsarinankupaq, nispa, nispayki.

¹⁰Ñoqataq profetizarqani paypa kamachiwasqanman hina, hinan kawsay samayqa paykunaman haykurqan, paykunataq kawsarispa sayarirqanku, mana yupay atiy soldadokunataq kasqaku.

¹¹Chaymi Señor Diosqa niwarqan: —Israel llaqta runapas chay ch'aki tullu hinan. Paykunan ninku: Ñoqanchispa tullunchisqa ch'akillañan kashan, manan ima suyakuyninchispas kanñachu, hukpaqkama chinkasqa hinan kanchis, nispanku.

¹²Chayrayku paykunata niy: Qollana Señor Diosmi nin: Llaqtalláy, aya p'ampanaykichistan kicharisaq, hinaspan chaymanta horqomusqaykichis, hinaspataq Israel llaqtaman kutichipusqaykichis.

¹³Aya p'ampanaykichista kicharispay chaymanta horqomuqtiymi, qankunaqa reqsiwankichis ñoqa Señor Diosqa kasqayta.

¹⁴Ñoqataqmi qankunaman kawsayniyta samaykusqaykichis, hinan qankunaqa kawsarinkichis, kikin hallp'aykichismantaqmi churaykapusqaykichis. Hinaqtinmi yachankichis ñoqa Señor Diospa rimasqayta hunt'asqaytapas. Ñoqa Señor Diosmi chayta nini, nispa, nispayki.

¹⁵Señor Diosmi niwarqan:

¹⁶—Qan, runa, hap'iy huk k'aspita, chaypitaq kay hinata qelqay: Uray ladopi kaq Judá suyu runakunapiwan, nispa niqta. Chaymanta hoqarillaytaq huk k'aspita, hinaspa chaypi qelqay: Wichay ladopi kaq Josepa miraynin Efraín suyu runakunapiwan, nispa niqta.

¹⁷Chaymantataq iskaynin k'aspikunata makiykipi ch'ulla k'aspita hinalla ch'antarqonki.

¹⁸Llaqta-masiyki runa: ¿Ima ninantan chay ruwasqayki nin? Willawayku, niqtintaq,

¹⁹paykunata niy: Qollana Señor Diosmi nin: Josepa miraynin Efrainpa k'aspinta hap'isaq, hinaspan ch'antasaq Judapa k'aspintawan makiypi ch'ulla k'aspillaman tukuchinaypaq, nispa, nispayki.

²⁰Paykunaq rikushasqanmi makiykipi hap'inki chay qelqasqayki iskaynin k'aspitaqa,

²¹ninkitaq: Qollana Señor Diosmi nin: Israel runakunatan horqomusaq hinantin suyukunapi kasqanmanta, hinantinmantan huñurqamusaq hinaspan llaqtankuman kutichimpusaq.

²²Israelpa orqonkunapin huk suyullaman paykunata tukuchisaq, hinan ch'ulla reyllayoq kanqaku, manan t'aqanasqachu kanqaku, manan iskay suyupaschu kanqa.

²³Manañan qhellichakunqachu millay mana chanin wak'a dioskunata yupaychaspanku, manan imayna millay huchatapas ruwanqakuñachu. Ñoqan paykunata qespichisaq ñoqata wasanchawaspa huchallikusqankumanta, huchankumantapas ch'uyanchapusaqmi. Hinan paykuna llaqtay kanqa, ñoqataq Diosninku kasaq.

²⁴Kamachiy Davidmi paykunaq reynin kanqa, llapankutan michinqa. Paykunaqa kamachikuy simiykunatan kasukunqaku, unanchasqay simiykunatapas hunt'anqakun.

²⁵Tiyakapunqakutaqmi kamachiy Jacobman qosqay hallp'api. Maypichus machulankupas tiyarqan chayllapipunin paykunapas, wawankupas, llapan mirayninkupas tiyakunqaku, kamachiy Davidllapunitaqmi kamachiqninkupas kanqa.

²⁶Paykunawanmi rimanakusaq, thak-kayllapi kawsaspa kanankupaq, chayqa wiñaypaq rimanakusqan kanqa. Takyachispaymi askhayachisaq, paykuna chawpipitaqmi ch'uya wasiyqa kallanqapuni.

²⁷Paykuna ukhupin tiyakusaq, hinaspan Diosninku kasaq, paykunataq llaqtay kanqaku.

²⁸Paykuna chawpipi ch'uya wasiyta wiñaypaq churaqtiymi, wakin suyukuna reqsiwanqaku Israelta ñoqapaq t'aqasqa kananpaq akllakusqayta, nispan, nispayki.