Read Quechua Cuzco Bible 1988 EZEKIEL 38 Bible Online

EZEKIEL 38 - Quechua Cuzco Bible 1988 bible

EZEKIEL 38

¹Señor Diosmi niwarqan:

²—Qan, runa, Magog suyu ladoman kutirispa, rey Gog contra profetizay. Paymi Tubal suyuq Mesek suyuqpiwan umallinkunaq qollananqa.

³Payta niy: Qollana Señor Diosmi nin: Yaw Gog, qanmi kanki Tubal suyuq Mesek suyuqpiwan umallinkunaq qollanan, ñoqan kani awqayki.

⁴Qantan kutirichisqayki, simiykiman ganchowan churaspaymi qanta llapan ejercitoykikunatawan hawaman aysarparisqayki. Qanpan kan caballoykikuna, armantinkama caballoyoq soldadoykikuna, mana yupay atiy soldadoykikuna, llapallankun escudoyoq espadayoq kanku, ichaqa llapantapunin aysarparisaq.

⁵Qanwanmi kashallanqataq Persia suyu soldadokuna, Etiopía suyu soldadokuna, Libia suyu soldadokunapas, llapankutaq cascoyoq escudoyoq kanku.

⁶Kaqllataq qanwan kashanqa Gomer suyu llapan soldadokuna, wichay lado karu suyu Bet-togarma llapan soldadokunapas, chay hinapin askha suyukuna qanwan kashanqa.

⁷Yaw Gog, wakichikuy q'epichakuy, ladoykipi llapan soldadokunantin, munayniykiman hina paykunata kamachiy.

⁸Unay p'unchaykuna qhepamanmi qanta waqyasqayki. Israelpi orqokunan pasaq purunyachisqa kasqa. Runankunan hinantin suyumanta huñukamuspa chay orqokunaman kutimpurqanku. Thunisqa suyunkun wakmanta allichasqa kapun, kunanqa llakhiñan Israel runakunaqa tiyashanku. Qanmi ichaqa qhepa watakunaman chay suyuman awqa-tinkuq phawaykunki.

⁹Chaymi qanqa chayanki pacha phuyu hinaraq suyuntinta p'ampanaykipaq, hinallataq phawaykunki tutuka wayra hina, llapan mana yupay atiy soldadoykikunawan, llapan chay suyukunapiwan.

¹⁰Ñoqa Qollana Señor Diosmi nini: Chay p'unchaymi mana allinta yuyaykuspa mana chanin yuyaykunata kamarispa,

¹¹ninki: Mana yanapaqniyoq suyu contran phawaykusaq, chay runakunan mana imata yuyarispa llakhilla tiyashanqaku, llaqtankunapas mana perqayoq, mana punkuyoq, mana chakanayoq.

¹²Chay runakunan hinantin suyukunamanta kutimurqanku, hinaspan wakmanta raqay-raqayta allichaspa tiyakapurqanku, kunantaq pachaq pupunpi tiyashanku, askha uywakunayoq askha kaqniyoq. Chaymi ñoqa paykuna contra sayarispa suwasaq llat'anasaq, nispa.

¹³Hinan Sabá runakuna, Dedán runakuna, Españamanta comerciantekuna, allin qharinkunapas tapusunkiku: ¿Suwakuqchu hamurqanki? ¿Mana yupay atiy soldadoykita huñurqospachu llat'anaq hamurqanki? ¿Apallankitaqchu qorita, qolqeta, qhapaq-kaykunata, uywakunatapas? ¿Askhatapunichu llat'anasqaykikunata apanki? nispanku, nispa.

¹⁴Chayrayku, qan, runa, Gogta niy: Qollana Señor Diosmi nin: Israel llaqtay llakhilla tiyakushaqtinmi, qan puririnki.

¹⁵Wichay lado karuy-karu suyuykimantapachan qanqa askha suyukunapiwan hamunki. Mana yupay atiy ejercitokunan qanwan hamunqa, llapankutaq caballopikama.

¹⁶Qanmi, Gog, Israel llaqtayman pacha phuyu hinaraq phawaykunki. Hamuq p'unchaykunapin pusamusqayki llaqtay contra, qanta imaynatachus ruwaspaymi suyukunaman rikuchisaq ñoqaqa ch'uyapuni kasqayta.

¹⁷Unay p'unchaykunañan rimasharqani Israelpi kamachiy profetakunawan, chaypiqa qanmantan rimarqani. Paykunan haqay p'unchay askha kutita willakurqanku qanta pusaspay Israelman kachaykunayta, nispan, nispayki.

¹⁸Qollana Señor Diosmi nin: Israelta rey Gog phawaykuqtinmi manchanatapuni phiñakuyniy rawrarinqa.

¹⁹Sinchi k'arakta phiñakuspaymi sut'inchani Israel suyupi chay p'unchay pacha chhaphchiy kananta.

²⁰Qochapi challwakuna, alton phalaq animalkuna, salqa animalkuna, pampan suchuq animalkuna, pachantinpi llapan runakunapas lliwmi ñawpaqeypi khatatatanqa. Orqokunan thunikamunqa, ranrakunan kumpakamunqa, llapan perqakunataqmi lliwlla thunikunqa.

²¹Ñoqan Gogman chayachisaq imaymana rikch'aq mana allinkunata manchakuywan p'ampaykusqa kananpaq. Onqoykunawanmi qonqay wañuypiwan ñak'arichisaq. Pay pataman soldadonkuna pataman puriysiq-masin suyukuna patamanwanmi kachaykusaq para lloqllata, chikchita, azufre ninatawan, runankunataq paykunapura espadawan sipinakunqa.

²³Chay hinapin askha suyukunaman rikuchisaq hatun-kayniyta ch'uya-kayniytawan. Ñoqa kikiytapunin paykunaman reqsichikusaq, hinan reqsiwanqaku ñoqa Señor Diosqa kasqayta. Ñoqa Qollana Señor Diosmi chayta nini, nispa.