Read Quechua Cuzco Bible 1988 EZEKIEL 39 Bible Online

EZEKIEL 39 - Quechua Cuzco Bible 1988 bible

EZEKIEL 39

¹Qan, runa, Gog contra profetizaspa niy: Qollana Señor Diosmi nin: Yaw Gog, qanmi kanki Tubal suyuq Mesek suyuqpiwan umallinkunaq qollanan, ñoqan kani awqayki.

²Kutirichimuspaymi aysamusqayki karuy-karu wichay ladomanta, hinaspan pusamusqayki Israelpi orqokuna contra.

³Chaymantataqmi lloq'e makiykipi hap'isqayki p'eqtaykita p'akisaq, paña makiykipi wach'ikuna apasqaykitapas kacharichisqaykin.

⁴Qantaqmi soldadoykikunantin, puriysiqniyki llapa suyukunantin Israel orqokunapi wañurankichis. Chaypin ayaykichista qaraykusaq imaymana rikch'aq phalaq animalkunaman, salqa animalkunamanwan.

⁵Q'ala pampapin urmankichis, ñoqa Señor Diosmi ninipuni.

⁶Magog suyutan ninawan kanaykusaq mama qocha patapi llakhilla tiyaq llaqtakunatawan, chaywanmi reqsiwanqaku ñoqa Señor Diosqa kasqayta.

⁷Israel llaqtay chawpipin ch'uya kasqayta reqsichikusaq, ñoqaq sutiyta sarunchawanankutaqa manañan hinallatachu qhawasaq, wak suyukunataq yachanqaku ñoqa Señor Dios Israelpi Ch'uya Diosqa kasqayta.

⁸Qollana Señor Diosmi nillantaq: Rimasqay p'unchayqa chayamunqapunin.

⁹Chay p'unchaymi Israel suyu llaqtakunapi tiyaqkuna lloqsispa imaymana rikch'aq armakunawan wayk'ukunqaku, chay hinapin ruphachinqaku p'eqtakunata, wach'ikunata, chanqana lanzakunata, maqanakunata, escudokunatapas. Chaykunan kanqa qanchis watantin nina rawrachinapaq llant'a hina.

¹⁰Chay armakunan kanqa wayk'unankupaq, chaymi manaña llant'ata llant'aqpas pampakunata rinqakuchu, manallataq sach'a-sach'akunapi ch'eqtata ch'eqtaqpas rinqakuñachu. Paykunan llat'ananqaku ñawpaq llat'anaqninkuta, ch'utinqakutaq ñawpaq ch'utiqninkuta, ñoqa Qollana Señor Diosmi chayta nini.

¹¹Chay p'unchaypin Israelpi huk cheqasta rey Gogman qosaq p'ampasqa kananpaq. Chay cheqasqa Kachi Qochaq inti lloqsiy ladonpi Puriqkunaq Wayq'on nisqan. Chaypin Gogtaqa llapan soldadokunantinta p'ampapunqaku, hinan ñan purinata hark'anqa, sutintataqmi churanqaku: Gogpa Soldadonkunaq Wayq'on nispanku.

¹²Israel runakunan suyunkuta ch'uyanchanankupaq qanchis killantin ayakunata p'ampanqaku.

¹³Llapan runakunan aya p'ampasqallankupiña usqhanqaku, atipaspa hatunchasqa kasaq chay p'unchaymi paykunapas chay ruwasqankumanta alabasqa kanqaku. Ñoqa Qollana Señor Diosmi chayta nini.

¹⁴Qanchis killa qhepatan huk t'aqa runata kachanqaku suyuntinta qhawaraqta, paykunan ima ayatapas tarimuspankuqa p'ampamunqaku, chay hinapin paykunaqa suyukunata ch'uyanchanqaku.

¹⁵Chay runakunamanta mayqellanpas suyuntinta purisqanpi runa tulluta rikunqa chayqa, chay cheqasta tuyruykunqa aya p'ampaqkunaq Gogpa Soldadonkunaq Wayq'on nisqapi p'ampanankupaq.

¹⁶Chay hinapin suyuta ch'uyanchanqaku. Chay wayq'o qayllapiqa kallanqataqmi huk llaqta Soldadokunaq Llaqtan nispa.

¹⁷Qan, runa, uyariway, ñoqa Qollana Señor Diosmi niyki: Waqyay llapan salqa animalkunata, phalaq animalkunatawan, hinantinmanta huñukamuspa Israelpi orqokunaman hamunankupaq. Chaypin paykunapaq hatun sacrificiota wakichishani, aychatan mikhunqaku, yawartan ukyanqaku.

¹⁸Allin qharikunaq aychantan mikhunqaku, kay pacha kamachikuqkunaq yawarnintan ukyanqaku. Chay soldadokunan kanqa Basán suyumanta wirayachisqa borregokuna, anejokuna, cabrakuna, torokuna hina nak'asqa.

¹⁹Chay wakichisqay mikhunamantan untunta mikhunqaku onqonankukamaraq, yawartapas ukyanqaku machanankukamaraq.

²⁰Mesaypin saksanqaku caballo aychawan, sillakuqkunaq aychanwan, soldadokunaq aychanwan, allin qharikunaq aychanpiwan. Ñoqa Qollana Señor Diosmi chayta nini.

²¹Chay hinapin qhapaq atiyniyta rikuchisaq wak suyukunaman, llapan suyukunataq yachanqaku paykunata hap'irqospa muchuchiq kasqayta.

²²Chay p'unchaymantapachan Israel runakunaqa yachanqaku ñoqa Apu Señor Diosninku kasqayta.

²³Yachallanqakutaqmi wak suyukunapas Israel runakunaqa wasanchawasqanku huchankumanta kamachi-kaypaq aparparisqa kasqankuta. Mana chanin kasqankumantan ñoqapas qheparparipurqani, hinaspan awqankuman hap'iykachirqani, hinan awqa-tinkuypi wañupurqanku.

²⁴Ñoqaqa millay mana chanin kasqankuman hinapunin muchuchirqani, chaymi qheparparirqani.

²⁵Chayraykun ñoqa Qollana Señor Diosqa nini: Kunanqa wakmantan Jacobpa mirayninta t'ikarichisaq, hinaspan llapan Israelta khuyapayasaq. Ch'uya sutiymantapas wañukusaqraqmi.

²⁶Huk kutimantawanmi suyunkupi mana piqpa rimapayasqan tiyakunqaku, chay pachataqmi paykunaqa qonqapunqaku ñoqa wasanchawasqanku huchankutapas, p'enqakuyninkutapas.

²⁷Awqankunaq suyunkunapi ch'eqesqamanta huñuykuspaymi, chay suyukunamanta kutichimpusaq. Chaywanmi ch'uya kasqayta suyukunaman reqsichikusaq.

²⁸Hinan llaqtaypas yachanqa ñoqaqa Apu Señor Diosninku kasqayta, hinaña kamachi-kayman aparichirqani chaypas, kaqtan suyunkuman kutichimpusaq mana hukllatapas wikch'umuspay.

²⁹Manañataqmi qheparparisaqñachu, aswanpas Israel runakunamanmi Espirituyta kachaykamusaq. Ñoqa Qollana Señor Diosmi chayta nini, nispa.