Read Quechua Cuzco Bible 1988 EZEKIEL 40 Bible Online

EZEKIEL 40 - Quechua Cuzco Bible 1988 bible

EZEKIEL 40

¹Wata qallariy killaq chunka p'unchayninpin Señor Diospa atiyninta sonqoypi repararqani. Mosqoy hina rikhuriypin Diosqa Israel hallp'aman aparqowarqan. Babiloniaman apasqa kayninkutaq kasharqan iskay chunka phisqayoq wata hinaña, Jerusalén munaychakusqankutaq chunka tawayoq wataña karqan. Israel hallp'apitaq Señor Diosqa hatun orqo pataman sayaykachiwarqan, chay patamantan rikumurqani ura cheqaspi askha wasikunata llaqtaman rikch'akuqta.

³Chay llaqtamantaq Señor Diosqa qayllaykachiwarqan, hinan rikurqani bronceman rikch'akuq runata llaqta punkupi sayashaqta. Paymi makinpi hap'ishasqa linomanta tupuna watutapas tupuna k'aspitapas.

⁴Chay runataqmi niwarqan: Allinta qhawarispa lliwta uyariy, makillan qhawanki lliw ima rikuchisqaytapas, Diosmi kayman apamurqasunki qanman rikuchinaypaq. Chaymantataq lliw rikusqaykita Israel llaqtaman willanki, nispa.

⁵Yupaychana wasiq muyuriqninpin huk perqa kasqa. Chay runaq hap'isqan k'aspin yaqa kinsa metro hina kasqa. Paymi perqata tupurqan, perqataq anchonmanpas sayayninmanpas kinsa metrokama kasqa.

⁶Chaymantataq rirqan inti lloqsiy qhaway haykunaman, seqananta wichaspataq tupurqan punku haykunaq anchonta, chaytaq kasqa kinsa metro anchoyoq.

⁷Punku haykuna ukhuq sapa ladonpitaq guardiakunapaq kinsa huch'uy wasikuna kasqa, sapankataq kinsa metrokama wask'anmanpas anchonmanpas kasqa, chay wasikunatataq sapankata iskay metro phasmiyoq perqa t'aqasqa. Chaymanta aswan ukhuman haykunataq kinsa metro anchoyoq kasqa, chay ukhupitaq huk wasi kasqa yupaychana wasi qhaway punkuyoq.

⁸Runataq tupurqan chay wasiq ukhunta, hinan kasqa tawa metroyoq, kallasqataq yupaychana wasi qhaway punkupi iskay tusakuna huk metro rakhuyoqkama.

⁹

¹⁰Chay hinapin chay kinsa huch'uy wasikuna kaqkama sayayniyoq kasqa, t'aqaqnin perqakunapas sayaynintinkama kasqa.

¹¹Chaymantataq runaqa punku haykunaq wask'anta tupurqan, chaymi kasqa phisqa metro hina, haykunaq aswan ukhunpa wask'antaq soqta metro phasmiyoq kasqa.

¹²Huch'uy wasikunaq ñawpaqen perqakunan kasqa kuskan metro hina anchoyoqkama. Sapanka huch'uy wasikunatataq tupurqan yaqa kinsa metrotakama wask'anmanpas anchonmanpas.

¹³Tupullarqantaq haykunaq anchonta hukkaq huch'uy wasiq qhepa perqanmanta chimpan hukkaq huch'uy wasiq qhepa perqankama, huch'uy wasiq qhepa punkunmanta chimpan huch'uy wasiq qhepa punkunkama yaqa chunka iskayniyoq metro phasmiyoq kasqa.

¹⁴Chaymantataq tupurqan yupaychana wasi qhaway punkuyoq wasiq anchonta, chaytaq kasqa yaqa chunka metro, chay wasiq ñawpaqentaq huk patio kasqa.

¹⁵Llapan haykunaqa hawa punkumanta patioman haykuna punkukama yaqa iskay chunka metron kasqa.

¹⁶Huch'uy wasikunaqpas, t'aqaqnin perqakunaqpas, yupaychana wasi qhaway punkuyoq wasiqpas ventanankuna kasqa, perqakunapipas kallasqataq k'awaspa ruwasqa palmera sach'akuna.

¹⁷Chaymantataq runaqa pusaykuwarqan patioman, chay patio muyuriq perqaman k'askasqataq kasqa kinsa chunka huch'uy wasikuna. Chay wasikunaq ñawpaqentaq rumiwan mast'asqa muyurisqa.

¹⁸Patio muyuriq k'uchunmi rumiwan mast'asqa kasqa, haykuna cheqaskunataq mana mast'asqalla. Haykuna cheqaspa anchon anchoyoqmi chay mast'asqaqa muyurisqa. Ukhu pationtaq aswan patapiña kasqa chay mast'asqamantaqa.

¹⁹Runataq tupurqan patioman haykuna punkumanta ukhu patioman haykunakama, chaytaq kasqa phisqa chunka metro hina.

²⁰Chaymantapas tupullarqantaq wichay lado haykunaq wask'anta anchontawan, chaynintan patioman haykukuq.

²¹Sapanka ladonpi kinsa huch'uy wasikunapas, t'aqaqnin perqakunapas, yupaychana wasi qhaway punkuyoq wasipas kaq sayayniyoqkaman kasqa inti lloqsimuy lado haykunawanqa, wask'anmantaq iskay chunka phisqayoq metro hina kasqa, anchonmantaq chunka iskayniyoq metro phasmiyoq hina.

²²Yupaychana wasi qhaway punkuyoq wasipas, ventanankunapas k'awaspa ruwasqa palmera sach'akunapas kaq sayaykaman kasqa, inti lloqsimuy lado haykunawanqa. Chayman seqanataqmi qanchis pata-pata saruna kasqa, aswan ukhuneqpitaq yupaychana wasi qhaway punkuyoq wasi kasqa.

²³Imaynan inti lloqsimuy lado haykuna chay hinallataqmi wichay lado haykunapas kasqa, ukhu patioman huk haykuna qhawaypitaq kasqa. Hinan runaqa tupurqan wichay lado haykunamanta ukhu patioman haykunakama, chaymi phisqa chunka metro hina kasqa.

²⁴Chaymantataq runaqa urayman pusawarqan, chaypitaq uray qhawaq haykunata rikurqani. Hinan tupurqan tusakunata, yupaychana wasi qhaway punkuyoq wasita, chaykunapas wakin haykunakuna sayayllataqmi kasqa.

²⁵Chaykunapiqa muyuriqninpin ventanakuna kasqa, wakin haykunakunaq hina. Tupuqtintaq llapanpi kasqa wask'anman iskay chunka phisqayoq metro hina, anchonmantaq chunka iskayniyoq metro phasmiyoq hina.

²⁶Kallasqataq seqanapaqpas qanchis pata-pata saruna, aswan ukhuneqpitaq yupaychana wasi qhaway punkuyoq wasi kasqa, t'aqaq perqakunapitaq chimpa-purantinpi k'awaspa ruwasqa palmera sach'akuna kasqa.

²⁷Ukhu patioq haykunanqa wichay qhawaqmi kasqa. Chaytapas runaqa tupullarqantaqmi, chay haykunamanta uray lado haykunakama, hinan phisqa chunka metro hina kasqa.

²⁸Chaymantapas pusallawarqantaq uray lado haykunanta ukhu patioman, hinaspan chay haykunata tupurqan, hinan wakinkuna sayayllataq kasqa.

²⁹Huch'uy wasinkunapas, hatun wasinpas, t'aqaqnin perqakunapas imaynan wakinkunaq karqan chay sayaykaman kallasqataq. Haykunapi hatun wasiqpas huch'uy wasikunaqpas muyuriq perqankupin ventanakuna kasqa, kaqllataq chaypas tupuqtin kasqa wask'anman iskay chunka phisqayoq metro hina, anchonmantaq chunka iskayniyoq metro phasmiyoq hina.

³⁰

³¹Hatun wasitaq qhawasqa hawa patioman. T'aqaqnin perqakunapas k'awaspa ruwasqa palmera sach'akunayoq kasqa. Chaykaq haykunaman seqanataq pusaq pata-pata saruna kasqa.

³²Chaymantataq inti lloqsimuy lado haykunanta ukhu patioman pusaykuwarqan, hinaspan chay haykunata tupuqtin wakinkuna sayayllataq kasqa.

³³Huch'uy wasinkunapas hatun wasinpas t'aqaqnin perqakunapas imaynan wakinkuna karqan chay sayaykamallataqmi kasqa. Haykunapi hatun wasiqpas huch'uy wasikunaqpas muyuriq perqankunapi ventanankuna kasqa. Kaqllataq chaypas tupuqtin wask'anman iskay chunka phisqayoq metro hina kasqa, anchonmantaq chunka iskayniyoq metro phasmiyoq hina.

³⁴Hatun wasitaq qhawasqa ukhu patiota. T'aqaqnin perqakunapitaq chimpapurantinpi k'awaspa ruwasqa palmera sach'akuna kasqa. Chaykaq haykunaman seqanataq pusaq pata-pata saruna kasqa.

³⁵Chaymantapas wichay lado haykunaman pusallawarqantaq, tupuqtintaq wakinkuna sayayllataq kasqa.

³⁶Chaypipas kallasqapunitaq huch'uy wasikuna, t'aqaqnin perqakuna, hatun wasipas, muyuriqninpi ventanakunayoq. Chay haykunan kasqa wask'anman iskay chunka phisqayoq metro hina, anchonmantaq chunka iskayniyoq metro phasmiyoq hina.

³⁷Hatun wasitaq qhawasqa hawa patiota. T'aqaqnin perqakunapitaq chimpapurantinpi k'awaspa ruwasqa palmera sach'akuna kasqa. Chaykaq haykunaman seqanataq pusaq pata-pata saruna kasqa.

³⁸Hinallataq huk wasi haykunapi hatun wasiwan pasapunakuq kasqa. Chaypin ruphachina sacrificio haywanapaq uywakunata maqchiqku.

³⁹Haykunapi kaq hatun wasipitaq kasqa tawa mesakuna sapanka ladopuranpi iskaykama, chay patapin ruphachina sacrificiopaq uywakunatapas, hucha pampachaypaq haywana uywakunatapas, kutichipuna ofrenda uywakunatapas nak'aqku.

⁴⁰Hatun wasiman seqana pata-pata qayllapipas kallasqapunitaq iskay mesakuna sapanka ladonpi.

⁴¹Chhaynaqa pusaq mesan kasqa, tawa mesa hatun wasi ukhupi, tawataq seqana qayllapi. Chaykuna patapitaq uywakunata nak'aqku.

⁴²Ruphachinapaq nak'asqakuna maqchinaqa tawa mesakunan kasqa. Chay mesakunaqa rumi horqona rumimanta ch'eqospa ruwasqan kasqa, chaykunan kasqa wask'anmanpas anchonmanpas qanchis chunka phisqayoq centimetrokama, sayayninmantaq phisqa chunka centimetroyoq. Chay patamanmi churakuq imakunawanchus uywa nak'anakunata,

⁴³churallaqkupunitaq aychakunatapas. Chay wasi muyuriq ukhupitaq huk t'aqlla sayayniyoq ganchokuna kasqa.

⁴⁴Pusaykullawarqantaqmi ukhu patioman, chaypitaq iskay wasikunata rikurqani, hukkaqmi wichay lado haykuna k'uchupi uray qhawantin kasqa, hukkaqtaqmi uray lado haykuna k'uchupi wichay qhawantin kasqa.

⁴⁵Runataq niwarqan: Uray qhawantin kashaq wasin Dios yupaychana wasipi kamachi ruwaq sacerdotekunapaq,

⁴⁶wichay qhawaq wasitaqmi altarpi haywaq sacerdotekunapaq. Chay runakunaqa Sadokpa mirayninkunan, chay Leví miray runakunallapunitaqmi Señor Diospa ñawpaqenpiqa serviyta atinku, nispa.

⁴⁷Chaymantapas runaqa ukhu patiota tupullarqantaq, hinan sapa ladonpas phisqa chunka metrokama kasqa, tawantin k'uchun. Altartaq Dios yupaychana wasiq ñawpaqenpi kasqa.

⁴⁸Runaqa Dios yupaychana wasiman pusallawarqantaq, hinaspan chay haykunapi wasita tupullarqantaq, haykunaq anchonmi qanchis metro hina kasqa haykunaq sapa ladonpa perqantaq esquinakama huk metro phasmin hina kasqa, perqaq rakhunñataq iskay metro phasmin hina kasqa.

⁴⁹Haykunapi wasi ukhutaq chunka metro hina anchoyoq kasqa, wask'anmantaq soqta metro hina. Chayman seqanataq chunka pata-pata saruna kasqa. Haykunaq sapa ladonpitaq huk tusakama kasqa.