Read Quechua Cuzco Bible 1988 EZEKIEL 41 Bible Online

EZEKIEL 41 - Quechua Cuzco Bible 1988 bible

EZEKIEL 41

¹Chaykuna qhepatan runaqa pusawarqan Ch'uya Cheqas ukhumanñataq, chaypin tupullarqantaq Ch'uya Cheqasman haykunaq perqanta, chay perqaq rakhunmi kinsa metro hina kasqa.

²Haykunaq anchontaq phisqa metro hina kasqa, haykunaq sapa ladonpa perqantaq perqa k'uchukama iskay metro phasmiyoqkama kasqa. Chaymantataq tupurqan Ch'uya Cheqaspa ukhunta, chaytaq wask'anman iskay chunka metro hina kasqa, anchonmantaq chunka metro hina.

³Chaymantataq haykurqan ukhukaq wasimanñataq, hinaspan tupurqan haykuna perqata, rakhunmi huk metro hina, kasqa. Haykunaq anchontaq kinsa metro hina kasqa, haykunaq sapa ladonpa perqantaq perqa k'uchukama qanchis metro hina kasqa.

⁴Chaymantataq tupurqan ukhukaq wasita, chaymi kasqa tawantin ladon chunka metrokama. Hinan niwarqan: Kayqa Ch'uyay-Ch'uya Cheqasmi, nispa.

⁵Chaymantapas runaqa tupullarqantaq Dios yupaychana wasi perqata, chaytaq kinsa metro hina rakhuyoq kasqa. Kallasqataq perqawan kuska huch'uy wasikuna, sapankataq iskay metro hina ukhuyoq kasqa.

⁶Chay huch'uy wasikunataqmi kinsa pata altosniyoq ruwasqa kasqa, sapanka patapitaq muyurisqa kinsa chunka wasikuna. Dios yupaychana wasiq perqantaq sapa patapi aswan ñañu kasqa, chaymanmi chakasqaku huch'uy wasikunaq kurkunkunata, chay hinapin perqata mana t'oqorqankuchu.

⁷Dios yupaychana wasiq perqanmi sapa patapi aswan-aswanta ñañuyasqa, hinan chawpikaq pata wasikunaqa pampakaq wasikunamanta aswan ancho kasqa, kinsa patakaq wasikunataq chawpikaq wasikunamantapas aswan anchoraq kasqa. Kallasqataqmi chay wasikunaman seqanapas kinsakaq patakama.

⁸Ñoqataq rikurqani Dios yupaychana wasita ukhu patiomanta aswan alto patapi ruwasqata, ukhu patiomantaqa kinsa metro hina patapi ruwasqaraqmi kasqa. Chay patapi ruwasqañan kasqa huch'uy wasikunapas, chay wasikunaq muyuriqninqa huk p'alta pata hinan muyurisqa, chaypa anchonmi iskay metro phasmin hina kasqa. Huch'uy wasikunaq perqanñataq iskay metro phasmin hina kasqa. Chay huch'uy wasikunaman haykunapaqmi iskay punku kasqa, hukmi Dios yupaychana wasiq wichay ladonpi, huktaq uray ladonpi. Huch'uy wasikunaq k'uchunmanta ukhu patiopi kaq sacerdotekunaq wasi perqan k'uchukama chunka metro hina kasqa.

¹²Dios yupaychana wasiq inti haykuy ladonpi huk hatun wasitaq kasqa, anchonman kinsa chunka phisqayoq metro hina, wask'anmantaq tawa chunka phisqayoq metro hina, iskay metro phasmin hina rakhu perqayoq.

¹³Runataq tupurqan Dios yupaychana wasita, hinan llapanpi kasqa wask'anman phisqa chunka metro hina. Tupullarqantaq Dios yupaychana wasiq qhepanmanta inti haykuy ladopi hatun wasiq qhepankama, chaymi kasqa phisqa chunka metro hina.

¹⁴Dios yupaychana wasiq ñawpaqen patiotaq wichay ladopi kaq sacerdotekunaq wasinmanta uray ladopi kaq sacerdotekunaq wasinkama phisqa chunka metro hina kasqa.

¹⁵Chaymantapas tupullarqantaq inti haykuy ladopi hatun wasiq ñawpaqenta llapan pasanakuq wasintinta, chaypas kallasqataq phisqa chunka metro hina. Ch'uyay-ch'uya Cheqaspas, Ch'uya Cheqaspas, haykuna wasipas,

¹⁶punkukunaq sarunanpas llapanmi tablawan qatasqa kasqa, sapanka wasiqmi k'ullu marcoyoq huch'uy ventanankuna kasqa. Llapanpunin tablawan qatasqa kasqa pampanmantapacha ventanakama, ventanakunapas wisq'ana hinalla kasqa.

¹⁷Chay qatasqa tablapin llaqllaspa ruwasqa raphrayoqkuna palmera sach'akunapiwan kasqa, llapanpipuni muyuriq ukhupi punkuq hawankamaraq. Chay raphrayoqkunan palmera sach'akunawan chawpinasqa kasqa. Sapanka raphrayoqkunataq iskay uyayoqkama kasqa,

¹⁹huk uyanmi runaq uyan hina kasqa, palmera sach'a qhawantin, hukkaq uyantaqmi leonpa uyan hina kasqa, huk lado palmera sach'a qhawantin. Llapanmi chay hinakama kasqa Dios yupaychana wasiq muyuriqnintinpi.

²⁰Ch'uya Cheqaspa perqanpin pampanmantapacha punkuq hawankamaraq llaqllaspa ruwasqa raphrayoqkuna palmera sach'akuna ima kasqa.

²¹Ch'uya Cheqaspa punkunpi k'aspitaq tawa esquinayoq llaqllasqa kasqa.

²²Ch'uyay-ch'uya Cheqasman haykunapin k'ullumanta altarman yaqa rikch'akuq kasqa, sapanka ladontaq huk metrokama kasqa, sayayninmantaq huk metro phasmin hina kasqa. Esquinankunapas, teqsinpas, sapa ladonpas k'ullumantan kasqa. Runataq niwarqan: Kaymi Señor Diospa ñawpaqenpi kaq mesa, nispa.

²³Ch'uya Cheqaspas, Ch'uyay-ch'uya Cheqaspas iskay ladoman kichakuq punkuyoqmi kasqa, sapanka punkutaq iskayman q'echukuqkama kasqa.

²⁵Ch'uya Cheqaspa punkuntaq kasqa raphrayoqkunayoq palmera sach'akunayoq ima, imaynan perqanpipas karqan chay hina. Haykuna wasiq hawa punku mat'inpitaq tablamanta llanthuna kasqa.

²⁶Chay wasiq sapa ladonpin ventanakuna kasqa, ventanakunaq sapanka ladonpitaq llaqllaspa ruwasqa palmera sach'akuna kasqa.