Read Quechua Cuzco Bible 1988 EZEKIEL 44 Bible Online

EZEKIEL 44 - Quechua Cuzco Bible 1988 bible

EZEKIEL 44

¹Wakmanta runaqa pusallawarqantaq Dios yupaychana wasiq inti lloqsimuy lado hawakaq haykunaman, chaytaq wisq'asqa kashasqa.

²Chaypin Señor Diosqa niwarqan: —Kay punkuqa wisq'asqallapunin kanqa, manan pipas kicharinqachu, manataqmi pipas chaynintaqa haykunqachu ñoqa Israelpa Diosnin Señorpa chayninta haykusqayrayku. Chaymi chayqa wisq'asqallapuni kanqa.

³Suyu kamachikuqllan chaypi tiyaytaqa atinman ñawpaqeypi ch'uya mikhunata mikhunanpaq. Haykuytaqa atinqa Dios yupaychana wasi qhaway punkuntan, chayllantataq lloqsipunqapas, nispa.

⁴Runaqa wichay lado punkunta haykuchispan Dios yupaychana wasiq ñawpaqenman pusaykuwarqan. Chaypin rikurqani Señor Diospa lliphlli-kayninqa Diospa wasinman hunt'aykushaqta, hinaspan pampaman uyanpamanta kumpakurqani.

⁵Hinan Señor Diosqa niwarqan: —Qan, runa, allinta qhawarispa makilla uyariway wasiypi ruwananku kamachikuykunamanta nisqayta. Wakillanmi wasiymanqa haykuytapas lloqsiytapas atin, wakinqa manan, chaytan allinta qhawanki.

⁶Mana kasukuq Israel runakunata niy: Qollana Señor Diosmi nin: ¡Yaw Israel runakuna, cheqnikusqay ruwasqaykichista wikch'uychis!

⁷Qankunan wasiyman pusaykurqankichis mana kasukuq wak llaqta runakunata, paykunaqa manan qhari-kaynin señalasqachu karqanku. Chaymi mikhunata, untuta, yawartawan qankuna haywashawaqtiykichis paykunaqa wasiyta qhellicharqanku. Chay hinapin rimanakusqanchista p'akirqankichis cheqnikusqay huchaykichisman aswanta yapaykuspa.

⁸Qankuna kikiykichismi ch'uya ruwanakunata hunt'anaykichistaqa wak llaqtayoqkunaman ruwananpaq saqerparirqankichis.

⁹Chayraykun ñoqa Qollana Señor Diosqa nini: Wasiymanqa manapunin mayqen llaqtayoqpas haykunqachu, mana kasukuq kasqanrayku aychanpipas mana señalniyoq kasqanraykupiwan, Israel runakunawan tiyaqkunaña kanku chaypas, nispa.

¹⁰Israel runakuna ñoqata wasanchawaspa wak'a diosninkuman kutirikapushaqtin, kutiriysikuq Leví runakunaqa huchankumanta muchunqapunin.

¹¹Hinan wasiypiqa punku qhawanata, wakin imakunapas ruwana kashan chayllatan ruwanqaku. Paykunan kanqa ruphachina sacrificiopaq uywakunata wak sacrificiopaq uywakunatawan nak'aqkuna, chaymantapas llaqta runakunata servillanqakutaq.

¹²Paykunan wak'a dioskunata servirqanku, chaywanmi Israel runakunata huchallichirqanku, chayraykun ñoqa Qollana Señor Diosqa hatunta rimarirqani paykuna huchankumanta muchunankutapuni.

¹³Chay Leví runakunan cheqnikusqay millaykuna ruwasqankumanta p'enqachisqa muchunqaku, chayraykun manapuniña sacerdoteykunachu kanqaku, manallataq atinqakuchu ñoqapaq t'aqasqakunaman ch'uyay-ch'uya ofrendakunaman qayllaykuytapas.

¹⁴Chaywanpas paykunataqa wakin llank'anakunallamanmi churasaq wasiypi imakunatapas ruwanankupaq.

¹⁵Israel runakuna ñoqamanta t'aqarikapushaqtinmi Leví ayllu Sadokpa miraynin sacerdotekunalla wasiypiqa hunt'aq-yuyaywan servishawarqanku. Chayraykun ñoqa Qollana Señor Diosqa nini paykunaqa ñawpaqeypi serviqnillaypuni kanankuta. Paykunallan qayllaykamuwaspa untuta yawartawan haywamuwayta atinqaku.

¹⁶Paykunallan Ch'uya Cheqasniyman haykuyta atinqaku, paykunallataqmi altarman qayllaykuspa servimuwaytapas atinqaku.

¹⁷Ukhu patioq punkunta haykuspaqa, lino p'achawanmi churakunqaku. Ukhu patio kamachita ruwashaspapas wasiypi kamachita ruwashaspapas aman millmamanta p'achawanqa churakunqakuchu.

¹⁸Umankupas linomanta k'uyunawan wataykusqan kanqa, linollamantataqmi calzoncillonkupas kanqa, cinturankutaqa aman imawanpas chumpikunqakuchu mana hump'inankupaq.

¹⁹Runakunaq kasqan hawa patioman lloqsimpunankupaqqa, kasqan p'achakusqanku ch'uya wasikunapin ch'utikampunqaku chay kamachi ruwasqanku p'achankutaqa, hinaspan wak p'achankuwan churakapunqaku lloqsimunankupaq, chay ch'uya p'achaqa llaqtatan ch'uya-kayninwan k'irinman.

²⁰Chukchankutaqa aman p'aqlatachu rutukunqaku, aman sinchi hatunkamapas wiñachikunqakuchu, makillan wit'upayanqaku.

²¹Aman mayqen sacerdotepas vinota ukyaspaqa ukhu patioman haykunqachu.

²²Manallataqmi casarakuytapas atinqakuchu wak viudawanpas, t'aqanasqa warmiwanpas, aswanmi Israel llaqta sipaswanpas sacerdoteq viudanwanpas casarakunqaku.

²³Sacerdotekunan llaqtayta yachachinqaku ch'uyakaqta qhellikaqmanta reparanankupaq, ñoqapaq t'aqasqa kaqta runapaq kaqtapas reparanankupaq.

²⁴Quejakunatan paykunaqa chaninchanqaku, chanin t'aqtaqkuna hinan t'aqtanqakupas kamachikuy simiyman hina. Kaqllataqmi llapan unanchasqaña fiestakunapi hunt'anqaku kamachikuyniykunata, unanchasqa simiykunatawan, samana p'unchaykunatapas ñoqapaqmi t'aqanqaku.

²⁵Sacerdotekunaqa atinqan llamiykuyta taytanpa ayanta, mamanpa ayanta, churinpa ayanta, ususinpa ayanta, wawqenpa ayanta, mana casarasqa pananpa ayantapas, wak runaq ayanta ichaqa manapuni llamiykullanqapaschu mana qhellichakunankupaq.

²⁶Llamiykunqakuchus chayqa ch'uyanchakunqakuraqmi, chaymantapas suyanqaku qanchis p'unchaytaraqmi ch'uya kanankupaq.

²⁷Ukhu patioman haykuspa serviwanqaku chay p'unchaypiqa huk sacrificiotan kikinkuq huchankumanta haywawanqaku. Ñoqa Qollana Señor Diosmi chayta nini.

²⁸Sacerdotekunaq chaskinan herenciaqa ñoqallan kani, ima hayk'anpiwanpas. Manan paykunamanqa Israel suyupi ima chhikan hallp'allapas qokunqachu, ñoqallan kani hallp'anku hinaqa.

²⁹Paykunaqa Israel runakunaq ñoqapaq t'aqasqanku kaqkunatan mikhunqaku, hucha pampachaypaq ofrendakunamanta, ruru ofrendakunamanta, kutichipuna ofrendakunamantawan.

³⁰Kaqllataq sacerdotekunaqa chakra llank'asqaq ñawpaq rurunpa ñawinninta chaskinqaku llapan apamuwasqakunatawan. T'antata ruwakuspaykichispas paykunamanraqmi allinnintaqa haywarinkichis, chay hinapin wasiykichista saminchasaq.

³¹Imapas paymantakama wañuqtaqa, urpitapas, uywatapas, ima salqa animalpa sipisqan kaqtapas sacerdotekunaqa manan mikhunqachu, nispa.