Read Quechua Cuzco Bible 1988 EZEKIEL 46 Bible Online

EZEKIEL 46 - Quechua Cuzco Bible 1988 bible

EZEKIEL 46

¹Qollana Señor Diosmi nin: Ukhu patioq inti lloqsimuy lado punkunqa wisq'asqallan kanqa soqta p'unchaynintin llank'ashaqtiykichis, samana p'unchaypitaqmi kicharisqa kanqa, mosoq killa rikhuriy p'unchaypiwan.

²Kamachikuqmi haykumunqa hawa patiomanta ukhu patioman haykunapi kaq hatun wasiman, chaypitaq sayaykunqa punku sayaq k'aspiq ladollanpi. Chaykamataq sacerdotekunaqa kamachikuqpa ruphachina sacrificionta sumaq kawsay ofrendankunatawan haywashanqaku. Hinan kamachikuqqa chay haykunamanta qhawarispalla yupaychaykunqa, chaymantataq lloqsimpunqa. Punkuqa manan wisq'akunqachu ch'isiyanankama.

³Samana p'unchaykunapi, mosoq killa rikhuriy p'unchaykunapipas, suyu runakunaqa Señor Diospa qayllanpi yupaychanqaku chay punkuq ñawpaqellanpin.

⁴Samana p'unchaypin kamachikuqqa Señor Diosman apamunqa mana imanasqa soqta borregota, huk anejotawan ruphachina sacrificio kananpaq.

⁵Chay anejotawan kuskatan haywanqa huk arroba rurukunata, sapanka borregotawanmi haywanqa ima munasqan rurukunata, kaqllataq sapanka arroba ruru ofrendatawan haywanqa kinsa litro phasmin aceiteta.

⁶Mosoq Killa rikhuriy p'unchaytaq haywanqa mana imanasqa huk torillota, soqta borregota, huk anejotawan.

⁷Chay torillotawanpas anejotawanpas qonqa huk arroba rurukunata, sapanka borregotawantaq haywanqa ima munasqan rurukunata, kaqllataq sapanka arroba ruru ofrendatawan haywanqa kinsa litro phasmin aceiteta.

⁸Kamachikuqtaq haykunqa ukhu patioman haykuna hatun wasikama, chayllamantataq lloqsipunqa.

⁹Chhayna fiestakunapi Señor Dios yupaychaq Israel llaqta runa hamuspaqa kay hinatan ruwanqa: wichay punkunta haykuspaqa, uray punkuntan lloqsinqa, uray punkunta haykuqtaq wichay punkunta lloqsinqa. Manapunin kaq haykusqan punkuntaqa lloqsinqachu, aswanpas hukkaq punkuntapunin lloqsinqa.

¹⁰Kamachikuqqa haykunqa Israel llaqta runantinmi, lloqsipunqapas paykunallawantaq.

¹¹Llapan fiestakunapipas hatun p'unchaykunapipas haywanqa huk arroba rurukunata sapanka torillotawanpas anejotawanpas, sapanka borregotawantaq ima munasqan rurukunata haywanqa, kaqllataq sapanka arroba ruru ofrendatawan haywanqa kinsa litro phasmin aceiteta.

¹²Kamachikuqqa paymantakama ruphachina sacrificiotapas sumaq kawsay ofrendatapas Señor Diosman haywaqtinmi, inti lloqsiy punkuta kicharinqaku. Hinan samana p'unchaypi hina haywanqa. Lloqsipuqtin hinataq punkutaqa wisq'apunqa.

¹³Sapa paqarmi mana imanasqa huk watayoq borregota Señor Diosman haywanqaku ruphachina ofrendata hina.

¹⁴Chaykunawanmi sapa paqar Señor Diosman haywanqaku huk arroba ruruq soqta p'akinta, huk litro aceitetawan, chaywan hak'uta tupachinapaq. Kaytaqa ruwallanqakupunin.

¹⁵Chay hinatan sapa paqar borregotapas, ruru ofrendatapas, aceitetapas haywanqaku mana thanispa ruphachina sacrificio kananpaq, nispa.

¹⁶Qollana Señor Diosmi nillantaq: Kamachikuqchus tupaqnin hallp'ata yanqalla churinman qoykapun chayqa, churinpaq mirayninpaqwanmi kanqa.

¹⁷Ichaqa kamachikuqchus kamachin runaman yanqalla hallp'anta qoykapun chayqa, chay hallp'aqa kacharipuna watakamallan kamachinpa kanqa. Chay watataqmi hallp'anqa kaqta kamachikuqman kutipunqa, churinkunaman qosqanmi ichaqa paykunaqllapuni kapunqa.

¹⁸Kamachikuqqa manan atinchu pimantapas hallp'anta qechuspa qarqoyta. Churinkunamanqa paypa hallp'allantapunin qonqa, chay hinapi mana pipas mana hallp'ayoq kananpaq, nispa.

¹⁹Chaymantataq runaqa pusarikuwarqan uray lado haykunata ukhu patioman sacerdotekunaq wichay qhawashaq ch'uya wasinkunaman, chaymantataq qhawarichiwarqan inti haykuy lado cheqasta.

²⁰Niwarqantaq: Haqaypin sacerdotekunaqa hucha pampachaypaq ofrendakunata qopuna ofrendakunatawan t'impuchinqaku, ruru ofrendakunatapas wayk'unqaku. Chay hinapin hawa patioman mana imallatapas horqonqakuchu, ch'uya-kaynin llaqta runata mana k'irinanpaq, nispa.

²¹Chaymantapas apallawarqantaq hawa patioman, hinaspan puriykachachiwarqan tawantin k'uchuntinta, hinan rikurqani sapanka k'uchupi patan qatasqa huch'uy patiota. Llapanpas kaq sayaykaman kasqa, anchonman iskay chunka metro, wask'anmantaq chunka phisqayoq metro.

²³Sapanka huch'uy patiotaq rumimanta muyuriq huch'uy perqayoq kasqa, chay perqaq k'uchunpitaq kasqa q'onchakuna.

²⁴Hinan niwarqan: Chaykunan wayk'unanku wasikuna, chaypin Dios yupaychana wasipi serviqkuna llaqta runaq apamusqan sacrificiokunata wayk'unqaku, nispa.