Read Quechua Cuzco Bible 1988 EZEKIEL 5 Bible Online

EZEKIEL 5 - Quechua Cuzco Bible 1988 bible

EZEKIEL 5

¹Señor Diosqa nillawarqantaqmi: Qan, runa, kunan hap'iy huk espadata allin arillataña, sunkha k'isunata hina, chaywantaq rutukuy chukchaykita sunkhaykitawan. Balanzapi pesaspataq kinsaman t'aqanki chukchaykita sunkhaykitawan.

²Llaqtaq awqankuna muyuykuyta tukuqtinkutaq, llaqtaq chawpinpi chay chukchaykiq kinsaman t'aqasqaq huk t'aqanta kanaykunki. Chaymantataq espadata hap'ispa, wakin t'aqanta ñut'urqospa llaqtaq muyuriqninman wisñimunki, puchuqnintataq wayrawan aparparichinki. Ñoqataqmi paykunaq qhepanta risaq espadantin.

³Wakin chukchakunatataq hoqarispa p'achaykiq ch'ullpanman watarqonki.

⁴Chay watasqa kaqmanta huk pisita hoqarispataq ninaman wikch'uykunki ruphananpaq. Chaymantan nina lloqsimunqa, llapan Israel llaqtata ruphananpaq.

⁵Ñoqa Qollana Señor Diosmi nini: Kayqa Jerusalenmi kashan, ñoqan kay pachaq chawpinman churarqani, chaymi llapa suyukunaq llaqtakunaqpas muyuykusqan kashan.

⁶Jerusalenmi ichaqa kamachikuyniyta unanchayniytawan manapuni munarqanchu, hinaspan payqa muyuriqninpi llaqtakunamanta suyukunamantapas aswan mana chaninraq lloqsipun. Kamachikuyniytan manapuni munarqanchu, unanchayniytapas manan kasurqanchu.

⁷Chayraykun ñoqa Qollana Señor Diosqa nini: Kamachikuyniyta mana kasukuspan qankunaqa aswan millaypuni kankichis, muyuriqniykichispi llaqtakunamantapas. Manapunin kasukurqankichischu muyuriqniykichispi tiyaq llaqtakunaq kamachikuy siminkunallatapas.

⁸Chayraykun Jerusalén, ñoqa Qollana Señor Diosqa qan contra kani. Hinallataq llapan suyukuna rikushaqtin ñoqa kikiy qanta muchuchisqayki.

⁹Manataq hayk'aqpas chay hinataqa ruwarqanichu, manañataq ruwasaqpaschu, millay mana chanin ruwasqaykirayku.

¹⁰Qankuna ukhupiqa kanqan wawan mikhukuq taytakuna, taytankuta mikhukuq wawakunapas. Ñoqa kikiymi muchuchisqayki, wakin kawsaqkunatataq wayrawan hina llapa ladoman apachisaq.

¹¹Ñoqa Qollana Señor Diosmi cheqaqtapuni jurani, imaynan qankunapas millay mana chanin ruwayniykichiswan ch'uya wasiyta qhellicharqankichis, chay hinatan qankunatapas mana khuyapayaykuspa chhallusqaykichis, manapunin llakipayasqaykichischu.

¹²Huk kinsakaq t'aqa runakunan chawpiykipi wañunqaku onqoywan yarqaymantawan, huk kinsakaq t'aqañataq wañunqaku muyuriqninpi awqanpa sipirasqan, wakin kinsakaq t'aqatañataq wayrawan hina hinantinman aparparichisaq, hinan qhepanta risaq espada hap'intin.

¹³Chaymantataq sonqoy tiyaykuqtin phiñakuyniy thasnukuqtin, hina kapusaq. Chaykuna qhepatan yachankichis ñoqa Señor Dios qankunamanta wañuyta atispay phiñakusqayta.

¹⁴Jerusalén, ñoqan qanta purunyachisqayki, hinan llapan muyuriqniykipi kaq llaqtakunapas llapan qayllaykita puriqkunapas pisichasunkiku.

¹⁵Ñoqa qan contra k'araktapuni phiñakuspa pasaqta muchuchiqtiymi, muyuriqniykipi suyukuna k'amisunkiku, millayta nisunkiku, hinallataq qanta rikuspa llaksakunqaku hinaspa wanapunqaku. Ñoqa Señor Diosmi nini.

¹⁶Ñoqan kachamusqaykichis manchay yarqayta sipikuq wach'ita hinaraq. Aswan-aswantan yarqay q'oñirinqa, hinan mikhunaykichista qechupusqaykichis.

¹⁷Kachamullasaqtaqmi yarqayta salqa animalkunatapas wawaykichista mikhunanpaq, hinallataq kachamusaq onqoyta, maqanakuyta, wañuytawan qankunata sipiranaypaq. Ñoqa Señor Diosmi chayta nini, nispa.