Read Quechua Cuzco Bible 1988 EZEKIEL 7 Bible Online

EZEKIEL 7 - Quechua Cuzco Bible 1988 bible

EZEKIEL 7

¹Señor Diosmi niwarqan:

²Qan, runa, uyariway. Ñoqa Señor Diosmi Israel suyuta nini: ¡P'uchukaymi chayamunqaña! ¡Ñan teqsimuyuntinpaq p'uchukay kanqaña!

³Qanpapas, Israel, p'uchukayniyki chayamunqañan, qan patamanmi phiñakuyniyta chayachisaq. Imaynachus kasqaykiman hinan huchachasqayki, hinaspataqmi p'enqay ruwasqaykikunamanta muchuchisqayki.

⁴Manan khuyapayasqaykichu, imaynachus kasqaykimanta p'enqay ruwasqaykikunamantawanqa muchuchisqaykipunin. Chaypin yachankichis ñoqa Señor Diosqa kasqayta.

⁵Ñoqa Qollana Señor Diosmi nini: ¡Ñan hatun llakikuy p'unchay chayarqamushanña! ¡Hatun llakipas qati-qatiraqmi chayarqamushan! ¡Chayarqamunñan p'uchukayniyki! ¡Chayarqamunñan tukukunayki!

⁷Suyupi tiyaqkuna, chayamunñan thunikunaykichis. Kunallanmi chayarqamunqa, chayarqamushallantaqmi taripay p'unchay. Orqokunapipas manañan kusikuy kanchu, aswanpas q'aqchakuyllañan.

⁸Kunanpachan qan contra phiñakusaq amikunaykamaraq. Lliwtan watusqayki ima ruwasqaykimantapas, hinaspan muchuchisqayki p'enqay ruwasqaykikunamanta.

⁹Manapunin khuyapayasqaykichu, aswanmi lliwta watusqayki millay p'enqay ruwasqaykikunamanta muchuchisqayki. Hinan qankuna yachankichis ñoqa Señor Diosqa ñak'arichikuq kasqayta.

¹⁰¡Kayqa chay p'unchay! ¡Chayamunpacha! ¡Hamushanñan thunikuyniyki! Millay runakunan llanllarishan, anchaykachaymi t'ikarishan.

¹¹Millay ruwaykunan wiñarispa mana chaninkunata paqarichin. Chaywanpas paykunaqqa manan imanpas qhepanqachu, qhapaq-kayninkupas, imaymanayoq-kayninkupas, allichachaq-kayninkupas.

¹²¡Chayamunmi kunanqa chay p'unchay! Manan qhatuqpas imamantapas llakikunan kanchu, manallataqmi rantiqpas imamantapas kusikunan kanchu, llapankumanpunin phiñakuyniytaqa chayachisaq.

¹³Qhatuqqa manapuniñan qhatusqanta wakmanta tarinmanñachu, unaytaña kawsaspapas. Millay runaqa huchan hawa manan kawsayninta waqaychayta atinmanchu.

¹⁴Awqa-tinkuy pututun waqamun, llapataqmi wakichikunku, ichaqa manan pillapas maqanakuqqa lloqsinchu, llapanmanpunin phiñakuyniytaqa chayachisaq.

¹⁵Hawapin maqanakuy kashan, ukhupitaqmi onqoywan yarqaywan kashan. Campopi kaqkunan hatun maqanakuypi wañunqaku, llaqta ukhupi kaqkunataqmi onqoypi yarqaypiwan wañunqaku.

¹⁶Chaymanta orqokunaman llapan ayqekuqkunataq sapankanku huchankumanta wañunqaku qheswa wayq'omanta mancharisqa urpi hina.

¹⁷Lliwpa makinmi sayk'upunqa, moqonkupas llaksakuywanmi tiwlikinqa.

¹⁸Llakikuymantan yana p'achawan churakunqaku, lliw ukhunkun chhaphchikunqa, hinallataq p'enqasqa uyantin chukchankupas ruturqosqa rinqaku.

¹⁹Qolqenkutapas qorinkutapas callekunamanmi q'opata hina wikch'upunqaku, manan qorinkupas qolqenkupas qespichinqachu ñoqa Señor Diospa phiñakuyniy p'unchaypiqa. Qori-qolqeqa manapunin yarqaytapas thanichinmanchu, manallataq wiksamanpas hunt'aykunmanchu, aswanmi huchaman tanqaykurqan.

²⁰Sumaq k'anchaq alhajankuwanmi umata hoqarirqanku, chaykunawantaqmi millakuy diosninkuta ruwakurqanku. Chayraykun alhajankuta tukuchisaq paykunaq millakunanman.

²¹Wak llaqta runakunatan chayarqachimusaq suwarqonanpaq, kay pachantinpi cheqnisqa runakunan hamunqaku paykunamanta qechunanpaq, hinaspan qhapaq-kayninkuta qhellichanqa.

²²Ñoqataqmi kay llaqtamanta hataripusaq. Hamunqataqmi suwakuna, ñoqa yupaychana munasqay wasiman haykuspan hinallata qhellichanqaku.

²³Suyuntinpin wañuchinakuy kashan, llaqtantinpitaq awqanakuy kashan, chayrayku fierro watanata ruway.

²⁴Ñoqan pusamusaq kay pachantinpi cheqnisqa runakunata, paykunan kay llaqtaq wasinkunata kaqnichakunqa. Atiyniyoqkunaq uma hoqariynintaqa chinkachipusaqmi, wak'a diosninku yupaychana cheqaskunapas lliwmi qhellichasqa kanqa.

²⁵Llaksakuy p'unchay chayamuqtinmi, thak-kayta munanqaku, manataq tarinqakuchu.

²⁶Chayamunqan llakikuna qati-qatiraq, mana allin willaykunapas yapa-yaparaq. Yanqanpaqmi huk profetata maskhanqaku paykunaman rikhuriypi rikusqanta willaykunanpaq, manan kanqachu sacerdotepas paykunaman Diospa kamachikuyninta yachachinanpaq, manallataq kurak runakunapas yuyaychaykunanpaq kanqachu.

²⁷Reymi yana p'achawan lutokunqa, kamachikuqtaqmi khuyay llakisqa kanqa, llaqtataqmi khatatatanqa. Ruwasqankuman hinan muchuchisaq, imaynatachus hukkunata t'aqtarqanku chay hinatan paykunatapas t'aqtasaq. Ahinapin yachanqaku ñoqa Señor Dios kasqayta, nispa.