Read Quechua Cuzco Bible 1988 EZEKIEL 8 Bible Online

EZEKIEL 8 - Quechua Cuzco Bible 1988 bible

EZEKIEL 8

¹Kamachi-kaypaq apasqa kasqaykumanta soqta wataq soqta killanpa phisqa p'unchayninpin wasiypi tiyakusharqani Judá suyu kurak runakunapiwan, hinaspan qonqaylla Qollana Señor Diospa atiyninta sonqoypi repararqani.

²Rikurqanitaq rawrashaq runata hina. Cinturanmanta uranmanmi rikch'akusqa nina hina, chaymanta wichayninmantaq allin llusk'achasqa bronce hina k'anchasqa.

³Chay runataq makiman rikch'akuqta haywarimuwaspa chukchaymanta hap'irqowarqan. Hinan Diospa Espiritunqa wayrapi hoqarirqowarqan, Diospa rikhuriypi rikhuriwasqanpin apawarqan Jerusalenman, hinaspan churaykuwarqan yupaychana wasiq ukhukaq pationpa wichay qhawaq punkuman, Señor Diosta phiñachiq wak'a idolonkuq kasqanman.

⁴Chaypin Israelpa Diosninpa lliphlli-kaynin kashasqa pampapi rikusqay hinallataq.

⁵Niwarqantaq: Qan, runa, wichay ladota qhawariy, nispa. Ñoqataq wichay ladota qhawarirqani, hinaspan rikurqani punku haykuna altar qayllapi Señor Diosta phiñachiq wak'a idolota.

⁶Chaymanta nillawarqantaq: Qan, runa, ¿rikunkichu Israel runakunaq millay p'enqayta kaypi ruwashasqankuta? Chay ruwasqankuwanmi wasiymantapas aswan-aswanta karunchachiwanku. Kunanpas rikullankitaqmi aswan millaykunataraq, nispa.

⁷Chaymantataq apawarqan patio haykuna punkuman, perqapitaq kasqa huk t'oqo.

⁸Hinan niwarqan: Qan, runa, t'oqota hatunyachiy, nispa. Ñoqataq t'oqota hatunyachispa haykunata tarirqani.

⁹Nillawarqantaq: Haykuy, hinaspan chaypi rikumunki mana chanin millay ruwasqankuta, nispa.

¹⁰Haykuspa qhawariqtiytaq, llapan perqakunapi kashasqa k'iñaspa ruwasqa imaymana rikch'aq suchuq animalkuna, wak millay qhelli animalkuna, Israel llaqtaq millay wak'a idolonkunapiwan.

¹¹Israel suyuq qanchis chunka kurak runankunan chaykunaq ñawpaqenpi sayashasqaku, paykunawanmi kashallasqataq Safanpa churin Jaazaniaspas. Sapankataq incienso q'osñichina hap'intinkama, chaymantataq sankhu q'osñiraq sayarisqa.

¹²Hinan niwarqan: Qan, runa, ¿rikunkichu Israel taytakunaq wak'a idolonkuq wasichanpikama pakallapi ruwashasqankuta? Paykunaqa ninkun: ¡Manan Señor Diosqa rikuwanchischu! ¡Suyunchistapas wikch'upunmi! nispanku, nispa.

¹³Chaymantapas nillawarqantaq: Aswan millay ruwashaqkunataraqmi rikunki, nispa.

¹⁴Apallawarqantaq Señor Diospa wasin wichay lado punku haykunaman. Chaypin askha warmikuna tiyarayashasqa Tamuz nisqa diosmanta waqaykukuspa.

¹⁵Nillawarqantaq: Qan, runa, ¿rikushankichu kayta? Chaymantapas aswan millaytaraqmi rikullankitaq, nispa.

¹⁶Chaymantan apallawarqantaq Señor Diospa wasinpa ukhu pationman, yupaychana wasiman haykuna punkuwan altarpiwan tupaypin kashasqa iskay chunka phisqayoq Israel qharikuna, yupaychana wasita qheparparispanku. Inti haykuy ladoman qhawantinkama pampaman k'umuykukuspa intita yupaychashasqaku.

¹⁷Hinan Señor Diosqa niwarqan: ¿Rikunkichu kay ruwasqankuta? ¡Judá llaqta runakunaqa manan saksankuchu kay hina p'enqay huchakunata ruwaspankupas! Chaymantapas awqanakuywanmi suyuntinta hunt'aykachishanku, kuti-kutirispan phiñachiwanku. Chaymi millay asnachisqanku senqayman chayamun.

¹⁸Chayraykun paykunata phiñakuspa muchuchisaq, manapunin khuyapayaykusaqpaschu. Qaparikuspaña waqyakamuwaqtinkupas, manapunin uyariq tukusaqchu, nispa.