Read Quechua Cuzco Bible 1988 DANIEL 10 Bible Online

DANIEL 10 - Quechua Cuzco Bible 1988 bible

DANIEL 10

¹Persia suyu rey Ciro iskay wata kurakña kamachikushaqtinmi Belteshasar sutichasqa Danielman Diosqa siminta willarqan: Simiqa cheqaqmi karqan ichaqa sinchi sasa entiendenan karqan. Chay simiqa rikhuriypin Danielman sut'inchasqa karqan.

²Chay p'unchaykunan ñoqa Danielqa kinsa semanantin llakipi kasharqani.

³Manan sumaq mikhunata mikhurqanichu, manan aychatapas vinotapas mallirqanichu, manan hawinawanpas hawikurqanichu kinsa semana hunt'akunankama.

⁴Ñawpaqkaq killaq iskay chunka tawayoq p'unchayninpin Tigris hatun mayu patapi kasharqani.

⁵Hinaspa qhawarispay rikurqani lino p'achawan p'achasqa runata, ch'uya qori chumpiwan chumpisqata.

⁶Cuerponmi q'ellu umiña hina k'ancharqan, uyanmi lliphllikiqman rikch'akurqan, ñawinmi rawrashaq nina hina karqan, makinpas chakinpas llusk'achasqa bronce hinan k'ancharqan, rimarisqan simikunataq ancha askhaq warararasqan hina karqan.

⁷Ñoqa Danielmi sapallay chay rikhuriyta rikurqani, manan ñoqawan kashaq runakunaqa chayta rikurqankuchu, aswanmi paykunaqa sinchita mancharikuspa pakakamuq ayqekurqanku.

⁸Sapallaymi qheparqani chay hatun rikhuriyta qhawarayaspay. Mana kallpayoqmi kapurqani, uyaypas q'elluyaykapurqanmi, kallpa wañuymi kapurqani.

⁹Rimasqanta uyarispaytaq yuyay chinkasqa pampaman uyanpamanta wikch'ukurqani.

¹⁰Chayllamanmi huk maki hap'iykuwaspa aysariwarqan, khatatataspa makiywan tawnaykukuspa qonqoriykukunaykama.

¹¹Hinaspan niwarqan: Daniel, Diosmi anchatapuni munakusunki, sayariy, makilla uyariway, qanman kachamusqan kani, nispa. Chayta rimaykuwaqtin hinataq khatatataspa sayarirqani.

¹²Hinan niwarqan: Daniel, ama manchakuychu. Sasakunata entiendenaykipaq Diosniykiq qayllanpi k'umuykukunaykipaq yuyaykukurqanki chay p'unchaymantapachan Diosqa mañakusqaykita uyarirqan, chaymi ñoqaqa hamurqani.

¹³Persia suyu kamachikuqmi ichaqa iskay chunka hukniyoq p'unchaynintin hark'awarqan, chaymi huknin uma ángel Miguel sutiyoq yanapaykuqniy hamurqan, chaypin Persia suyu reykunaq qayllanpi saqemurqani.

¹⁴Qhepa p'unchaykunapi llaqtaykipaq imachus chayamunanta qanman willaqmi hamuni, rikhuriyta rikusqaykiqa chay p'unchaykunapaqmi, nispa.

¹⁵Chayta niwashanankamaqa pampa qhawarisqan k'umurayasharqani, manataqmi rimariyta atirqanichu.

¹⁶Chayllamanmi runaman rikch'akuqqa simiyta llamiykuwarqan. Hinan ñawpaqeypi sayashaq runata nirqani: Wiraqocháy, chay rikhuriymi sinchita llakichiwan, mana kallpayoqmi kapuni.

¹⁷¿Imaynan kay kamachiykiqa wiraqochaywan rimanman mana kallpayoq kashaspay, manaña kuyuriytapas atishaspay? nispa.

¹⁸Chay runaman rikch'akuqtaq huktawan llamiykuwaspa kallpachawarqan,

¹⁹hinaspa niwarqan: Diosmi anchatapuni munakusunki, ama manchakuychu, ama llakipakuychu. Kallpata hap'iy, kallpachakuy, nispa. Pay rimapayawashanankamataqmi kallpachakusharqani, hinaspan nirqani: Wiraqocháy, kallpachawasqaykirayku rimaykuway, nispa.

²⁰Chaymi payqa niwarqan: ¿Yachankichu imaraykuchus qanman hamusqayta? Kunanqa kutipunaypunin Persia suyu kamachikuqwan maqanakunaypaq. Ñoqa kutipuqtiytaq Grecia suyu kamachikuq hamunqa.

²¹Ichaqa willasqaykiraqmi Cheqaq-kay Qelqapi imachus qelqasqa kashaqta. Manataqmi pipas paykuna contra yanapawanchu, aswanpas Israel runakunata kamachiq Miguel sapallanmi.