Read Quechua Cuzco Bible 1988 DANIEL 12 Bible Online

DANIEL 12 - Quechua Cuzco Bible 1988 bible

DANIEL 12

¹Chay p'unchaykunapin llaqtaykita amachaq hatun kamachikuq Miguel sayarinqa. Khuyay llaki-phutiy p'unchaykunan kanqa, manan hayk'aqpas hatun suyukunaq kasqanmantapacha chay hinaqa chay p'unchaykama karqanchu. Ichaqa chay p'unchaykunapin llaqtayki qespichisqa kanqa, Diospa qelqanpi llapa qelqasqa kaqkuna.

²Askha wañusqakunan kawsarimunqaku wakinmi wiñaypaq kawsanankupaq, wakintaq wiñaypaq p'enqasqa pisichasqa kanankupaq.

³Hamawt'akunaqa hanaq pacha k'anchay hinan k'anchanqaku, askha runata chanin kawsayman kutirichiqkunapas ch'askakuna hinan wiñay-wiñaypaq k'anchanqaku.

⁴Qantaq Daniel, p'uchukay tiempokama qelqa k'uyuta k'uyuy, sellowanpas wisq'aykuy. Askha runan kayman chayman phawanqaku astawan yachayta maskhaspa, nispa.

⁵Chaymantataq ñoqa Danielqa qhawarirqani, hinaspan iskay runata rikurqani, hukninta kayneq mayu patapi, huknintataq mayu chimpapi sayashaqta.

⁶Hukninmi mayu pata wichaypi sayashaq lino p'achayoq qharita tapurqan: ¿Hayk'aqtaq kay utirayanakunari p'uchukanqa? nispa.

⁷Hinan lino p'achayoq qhariqa iskaynin makinta hanaq pachaman haywarispa Wiñaypaq Kawsaq Diospa sutinpi jurarqan: Paytan uyarirqani: Kinsa wata kuskanmi kanqa. Diospa llaqtanpa atiynin thunisqaña kaqtinmi tukuy chaykuna hunt'akunqa, nispa nishaqta.

⁸Ñoqan rimasqanta uyarirqani, ichaqa manan entienderqanichu. Chaymi tapurqani: Wiraqocháy, ¿imaynatataq chaykunaqa tukukapunqa? nispa.

⁹Hinan payqa niwarqan: Ripuy, Daniel, chay simikunaqa p'uchukay tiempokaman pakasqa kashan, sellowan wisq'asqa kashan.

¹⁰Askhan probasqa kaspanku ch'uyanchasqapuni kanqaku. Millay runakunaqa millayllatapunin ruwashanqaku, manan mayqenninkupas imachus kashasqanta repararqanchu, hamawt'akunan ichaqa chayta repararqanku.

¹¹Sapa p'unchay sacrificio haywanata qolluchispa millay-millay qhellichaqta churasqanku tiempomantapachaqa kanqa waranqa iskay pachak isqon chunkayoq p'unchaymi.

¹²Kusisamiyoqmi waranqa kinsa pachak kinsa chunka phisqayoq p'unchay suyakuqqa.

¹³Qantaq p'uchukaykama hunt'aq kay. Qanqa wañunkin, herenciaykita chaskinaykipaqtaq p'uchukay p'unchaykunapi kawsarimunki, nispa.