Read Quechua Cuzco Bible 1988 DANIEL 2 Bible Online

DANIEL 2 - Quechua Cuzco Bible 1988 bible

DANIEL 2

¹Wata kurakña kamachikushaspanmi Nabukodonosorqa mosqokurqan, hinaspan hawapi-ukhupi sonqoyoq karqan, manañataq puñuypas aysarqanchu.

²Chaymi reyqa waqyachimurqan yachayniyoqkunata, watuqkunata, layqakunata, ch'askata qhawaspa watuqkunatawan, mosqokusqanta payman sut'inchanankupaq. Paykunan hamuspa reypa ñawpaqenpi sayaykurqanku.

³Reytaq paykunata nirqan: —Mosqokunin, hawapi-ukhupi sonqoyoqmi kashani, chay mosqokusqaytan yachayta munashani, nispa.

⁴Hinan ch'askata qhawaspa watuqkuna Arameo rimaypi reyta rimapayarqanku: —¡Wiñaypaq reyqa kawsachun! Mosqokusqaykita kamachiykikunaman willawayku, ñoqaykutaq imachus kasqanta sut'inchapusqaykiku, nispa.

⁵Reytaq paykunata nirqan: —Allintañan yuyaykuni, manachus mosqokusqayta willawankichis, imachus kasqantapas manachus sut'inchapuwankichis chayqa, kuchurqarisqan kankichis, wasiykichispas thunisqan kanqa.

⁶Ichaqa mosqokusqaytachus willawaspaykichis sut'inchapuwankichis chayqa, qokuykunata, premiokunata qosqaykichis, anchatan hatunchasqaykichispas. Chhaynaqa imatachus mosqokusqayta willawaychis sut'inchapuwaychistaq, nispa.

⁷Hinan paykunaqa huktawan nirqanku: —Mosqokusqaykita willawayku, ñoqaykutaq sut'inchasqata willasqaykiku, nispa.

⁸Reytaq paykunata nirqan: —Ñoqaqa reparashaykichispunin unayyachishasqaykichista, yachankichisñan allintaña yuyaykusqayta.

⁹Manachus mosqokusqayta willawankichis chayqa, ch'ulla muchuchiyllan qankunapaq kashan. Cheqaqtapunin rimanakushankichis llullakuspa q'otuwanaykichispaq, imapas kaqtin qollunanta suyaspaykichis. Chhaynaqa, mosqokusqayta willawaychis, ahinapin yachasaq sut'inchapuwayta atisqaykichista, nispa.

¹⁰Ch'askata qhawaspa watuqkunataq reyman kutichirqanku: —Manan kay pachapi runa kanchu reypa mañakusqanta sut'inchayta atinanpaq. Manallataqmi mayqen reypas, munayniyoqña atiyniyoqña kaspapas chay hinataqa tapurqanchu mayqen layqatapas, watuqtapas, ch'askata qhawaspa watuqtapas.

¹¹Reypa mañakusqanqa sinchi sasan, manan pipas kanchu reypaq chayta sut'inchayta atinanpaq, aswanpas dioskunallan atinman, chaykunaqa manan runa ukhupichu tiyanku, nispa.

¹²Chaymi reyqa k'araktapuni phiñakurqan, hinaspan kamachikurqan Babilonia suyupi chay yachayniyoqkunata llapanta wañuchinankupaq.

¹³Yachayniyoqkunata wañuchinapaq kamachikuy simi unanchasqa kaqtintaq, Danieltapas amigonkunatapas wañuchinankupaq maskharqanku.

¹⁴Reypa guardia capitannin Ariuk Babiloniapi yachayniyoqkunata wañuchinanpaq lloqsiqtinmi, Danielqa payta yachaywan allin yuyaywan rimapayarqan:

¹⁵—¿Imanaqtinmi reyqa chunkay-chunkata kamachikun? nispa. Chaymi Ariukqa Danielman sut'inta willarqan.

¹⁶Hinan Danielqa reypata rispa valekurqan suyaykunanpaq, ahinapi reypa mosqokusqanta payman sut'inchananpaq.

¹⁷Hinaspan Danielqa wasinta ripuspa amigonkuna Ananiasman, Mishaelman, Azariasmanwan chayta willamurqan.

¹⁸Paymi paykunata mat'irqan mañakunankupaq Hanaq Pacha Diosqa khuyapayaspa reypa mosqokusqanta sut'inchananpaq. Ahinapin Danielpas amigonkunapas chay wakin Babilonia yachayniyoqkunawan kuska mana wañunqakuchu.

¹⁹Hinan Diosqa rikhuriypi chay tuta Danielman reypa mosqokusqanta sut'incharqan, chaymi Danielqa Hanaq Pacha Diosta yupaychaspa

²⁰nirqan: Diosníy, sutiykiqa wiñay-wiñaypaq yupaychasqan, qanqa yachayniyoqmi atiyniyoqmi kanki.

²¹Qanmi tiempokunatapas mitakunatapas chayachimunki, qanmi reykunatapas wikch'unki churanki. Qanmi yachayniyoqkunamanpas yachayta qonki, yuyayniyoqkunamanpas yuyayta qonki.

²²Qanmi sasa yachaykunatapas pakasqakunatapas sut'inchanki, qanmi imachus laqhapi kaqtapas yachanki, qanqa k'anchaypin kashanki.

²³Machulaykunaq Diosnin, qantan agradecekuykipas yupaychaykipas, yachaytan kallpatan qowarqanki. Kunanmi mañakamusqaykuta yachachiwanki, reypa mosqokusqantan rikuchiwankiku, nispa.

²⁴Ariukta reyqa kamachisqa Babiloniapi yachayniyoqkunata wañuchinanpaq, hinan Danielqa Ariukpata rispa nirqan: —Yachayniyoqkunataqa ama wañuchiychu, reyman pusaway, ñoqan paypaq sut'inchapusaq, nispa.

²⁵Hinaqtinmi Ariukqa Danielta reyman usqhaylla pusarqan, hinaspan reyta nirqan: —Judamanta apamusqakuna ukhupin huk qharita tarimuni, paymi mosqokusqaykita sut'inchapusunki, nispa.

²⁶Hinan reyqa Belteshasar nisqa Danielta nirqan: —¿Atiwaqchu mosqokusqayta willawayta sut'inchapuwayta? nispa.

²⁷Chaymi Danielqa reyta nirqan: —Reypa yachay munasqantaqa yachayniyoqkunapas, watuqkunapas, layqakunapas, ch'askata qhawaspa watuqkunapas manan willayta atisunkikumanchu.

²⁸Ichaqa pakasqa yachaykunata sut'inchaq Diosmi hanaq pachapi kan, paymi willarqasunki qhepa p'unchaykunapi imaynachus kananta. Mosqokusqaykitan willasqayki, puñushaspa rikusqaykikunata.

²⁹Reyníy, puñunapi kashaspaykin yuyaykusqanki qhepa tiempopi imaynachus kananta, hinan pakasqa yachaykunata sut'inchaqqa imaynachus kananta rikuchirqasunki.

³⁰Ñoqamantaq chay pakasqa yachayta Diosqa sut'inchawan, manan runamanta aswan yachayniyoq kasqayraykuchu, aswanpas qanman sut'inchasqata willanaypaqmi, sonqoykipi yuyaykusqaykikunata yachanaykipaqwanmi.

³¹Qanmi, reyníy, hatunkaray llut'asqa runata ñawpaqeykipi sayashaqta rikushasqanki, chayqa k'anchashaqtaq sinchi manchakuytaqmi karqan.

³²Chaypa umanqa ch'uya qorimantan karqan, qhasqonwan makinkunawantaq qolqemanta, wiksanwan teqninkunawantaq broncemanta,

³³chakankunan fierromanta, chakinkunataq wakin fierromanta wakin k'arpamanta.

³⁴Qhawashaqtiykin ranramanta ch'eqtasqa qaqa urmaykamurqan, ichaqa manan runaq ch'eqtasqanchu karqan, hinan fierroyoq k'arpayoq chakinkunaman chayaspa ñut'urparirqan.

³⁵Ñut'usqallataqmi karqan fierropas, k'arpapas, broncepas, qolqepas, qoripas. Hinan eray mitapi ñut'u pajata hina wayraqa chaykunata phukurparirqan mana yupillankupas qhepanankama. Chay qaqataq teqsimuyuntinman hunt'aykuq orqo kapurqan.

³⁶Chaymi chay mosqokusqaykiqa, kunantaq imachus kasqanta sut'inchapusqayki.

³⁷Qanmi, reyníy, reykunaq reynin kanki. Hanaq Pacha Diosmi qorqasunki munaychakuyta, kamachikuyta, atiyta, qhapaq-kaytapas.

³⁸Llapa runatapas uywakunatapas, phalaq animalkunatapas qanmanmi qorqasunki, tukuypi kamachikunaykipaqmi churarqasunki. Qanmi chay qori uma kanki.

³⁹Qanpa qhepaykitan atiyniykimanta pisipacha atiyniyoq hatun suyu sayarimunqa. Hinamantataq bronce hina kinsakaq hatun suyu sayarimunqa, chay suyun kay pachantinta kamachinqa.

⁴⁰Chay qhepatataq tawakaq hatun suyu fierro hina ch'ila kanqa. Imaynan fierroqa tukuyta p'akin ñut'un, ahinatan tukuy suyukunata p'akinqa ñut'unqa.

⁴¹Fierroyoq k'arpayoq chakinkunata dedonkunata rikurqanki, chayqa t'aqanasqa suyun kanqa. Imaynan fierrota k'arpawan chhaqrusqata rikurqanki hinan, chay suyuqa kallpayoq kashaspapas manan fierro hina kallpayoqchu kanqa.

⁴²Chaki dedokuna fierroyoq k'arpayoq kasqanrayku chay suyuqa wakin kallpasapa wakintaq pisi kallpayoq kanqa.

⁴³Imaynan fierrota k'arpawan chhaqrusqata rikurqanki, chay hinan casarakuy rimanakuykunawan huñukunqaku, ichaqa manan k'askanakunqakuchu, imaynan fierrowan t'uruwan mana k'askanakunkuchu hina.

⁴⁴Chay reykuna kamachikushaqtinmi, Hanaq Pacha Diosqa mana hayk'aq thunikuq suyuta sayarichinqa, manataqmi wak suyuqa chayta kamachinqachu, aswanpas llapa suyukunatan ñut'uspa tukunqa, wiñaypaqtaq kashanqa.

⁴⁵Rikurqankin riki mana runaq ch'eqtasqallan urmaykamuq qaqata, chay qaqan ñut'urqan fierrota, bronceta, k'arpata, qolqeta, qoritawan. Chhaynatan Hatun Diosqa qanman rikuchirqasunki imaynachus qhepaman kananta. Mosqokusqaqa cheqaqmi, sut'inchasqapas cheqaqllataqmi, nispa.

⁴⁶Hinaqtinmi rey Nabukodonosorqa qonqoriykukuspa Danielman pampakama k'umuykukurqan, hinaspan kamachikurqan sacrificiokunatapas payman haywanankupaq, inciensowanpas q'osñichinankupaq.

⁴⁷Hinaspataq Danielta nirqan: —Cheqaqtapunin Diosniykichisqa dioskunaq Diosnin, reykunaq Apun, pakasqa yachaykunatapas sut'inchaq, atirqankin kay pakasqa yachayta sut'inchayta, nispa.

⁴⁸Hinaspanmi reyqa Danielta qollana kamachikuqta churarqan, askhallaña qokuykunatapas qollarqantaq. Hinaspan payta churarqan, Babilonia nisqa provinciata kamachinanpaq, chay suyupi yachayniyoqkunaq qollanan kananpaqwan churarqan.

⁴⁹Danielmi reyta valekurqan, chaymi reyqa Babilonia suyu kurak provinciapi kamachikuq kanankupaq churarqan Shadrakta, Meshakta, Abed-negotawan. Danieltaq reypa wasinpi wakin oficialninkunawan kasharqan.