Read Quechua Cuzco Bible 1988 DANIEL 4 Bible Online

DANIEL 4 - Quechua Cuzco Bible 1988 bible

DANIEL 4

¹Ñoqa rey Nabukodonosormi kay pachantinpi tiyaq llapa llaqtakunaman, hatun suyukunaman, ima rimaytaña rimaqkunamanpas qelqamuykichis: Allintapuni kawsashaychis.

²Qollana Diospa musphanakunata utirayanakunata ruwapuwasqankunataqa qankunaman willanaypunin.

³¡Ancha hatunmi Diospa musphana ruwasqankunaqa! ¡Ancha atiyniyoqmi Diospa utirayana ruwasqankunaqa! Payqa wiñaypaqmi munaychakunqa, miray-miraykaman kamachikunqapas.

⁴Ñoqa Nabukodonosormi wasiypi qasilla kakusharqani, qhapaq wasiypi t'ikarisharqani.

⁵Ichaqa puñunapi puñushaspaymi mosqokurqani, chaymi mancharichiwarqan, yuyaykusqaykunapas rikhuriyta rikusqaykunapas q'aqchawarqan.

⁶Chaymi kamachikurqani Babiloniapi llapa yachayniyoqkuna ñawpaqeyman hamuspanku mosqokusqayta sut'inchawanankupaq.

⁷Hinan hamurqanku yachayniyoqkuna, watuqkuna, layqakuna, ch'askata qhawaspa watuqkunapas. Ñoqataq mosqokusqayta paykunaman willarqani, ichaqa manan atirqankuchu ñoqapaq sut'inchayta.

⁸Chayllamanmi Danielqa haykumuwarqan, payqa diosniypa sutin hina Belteshasar sutiyoqmi, paypin ch'uya dioskunaq espiritun kashan. Paymanmi mosqokusqayta willarqani:

⁹Watuqkunata kamachiq Belteshasar, yachanin ch'uya dioskunaq espiritun qanpi kasqanta, ima pakasqa yachaypas qanpaqqa sut'in. Chayrayku mosqoypi rikusqayta uyariway, hinaspa sut'inchapuway:

¹⁰Puñushaspaymi kay rikhuriykunata rikurqani: Hallp'a pampapin hatunkaray sach'a kashasqa.

¹¹Chay sach'an wiñarqan, hinaspan rakhuyarqan, umanmi hanaq pachakama chayarqan, teqsimuyuntin runakunataq chayta rikurqanku.

¹²Ancha munay raphiyoqmi karqan, askha ruruyoqmi karqan, llapallan chaymanta mikhurqanku. Salqa uywakunan chay k'uchupi llanthukurqanku, k'allmankunapin phalaq animalkuna q'esachakurqanku, chay sach'amantan llapa pachantin mikhurqan.

¹³Puñunaypi kashaspaymi rikhuriypi rikurqani hanaq pachamanta uraykamushaq ch'uya angelta,

¹⁴paymi kunkayoqta waqyakurqan: Chay sach'ata kumpaychis, k'allmankunatapas wit'uychis, raphinkunatapas raphinaychis, rurusqantapas t'akarpariychis. Chaypi llanthukuq uywakuna ayqechunku, k'allmankunapi tiyaq phalaq animalkunapas ripuchunku.

¹⁵Ichaqa pampapi k'ulluntapas saphinkunatapas saqeychis, fierro-bronce cadenawan chayta wataychis, hinaspa campo qora-qorapi saqeychis, chay pataman sulla sullamuchun, uywakunawan kuska campopi tiyachun.

¹⁶Yuyaynin t'ikrakuchun, hinaspa animalpa yuyaynin hina yuyayniyoq kapuchun, qanchis watantin chay hina kachun.

¹⁷Chay kamachikuytaqa angelkunan churan, chay yuyaykusqataqa ch'uya angelkunan rimarin, runakunaq kamachisqan suyukunata Qollana Diospa kamachikusqanta llapa runa yachananpaq. Paymi pimanchus kamachikuyta qoyta munasqanman qon, chay suyukunapin k'umuykukuq runamanpas kamachikuyta qon, nispa.

¹⁸Chay hinatan ñoqa rey Nabukodonosorqa mosqokurqani. Qan Belteshasarmi chayta sut'inchapuwanki. Kamachisqay suyupiqa manan mayqen yachayniyoqpas chayta sut'inchapuwayta atinchu, qanmi ichaqa sut'inchayta atinki, ch'uya dioskunaq espiritun qanpi kashasqanrayku, nispa.

¹⁹Chaymi Belteshasar sutichasqanku Danielqa huk rato utirayarqan, yuyaykusqankunapas musphachirqan. Ñoqataq payta nirqani: —Belteshasar, ama mosqokusqaywanpas sut'inchayninwanpas utirayaychu, nispa. Hinan Belteshasarqa kutichiwarqan: —¡Ay, reyníy, mosqokusqaqa awqaykikunapaq kachun, sut'inchaynintaq mana allinta ruwayta munaqniykikunapaq kachun!

²⁰Hatunkaray rakhu sach'atan rikurqanki, chaymi hanaq pachakama chayarqan, teqsimuyuntin runakunataq rikurqanpas.

²¹Munay raphiyoqmi rurusapataqmi karqanpas, llapataq chayta mikhurqanku. Chay sach'a llanthupin campo uywakunapas llanthukurqanku, k'allmankunapin phalaq animalkunapas q'esachakurqanku.

²²Reyníy, qanmi chay sach'aqa kanki, wiñarqankin, atiyniyoqmi kapurqanki. Atiyniykin yapakurqan hinaspa hanaq pachakama chayarqan, kay pachantintataq kamachirqankipas.

²³Rikullarqankitaqmi hanaq pachamanta uraykamushaq ch'uya angeltapas, paymi nirqan: Sach'ata kumpaychis, hinaspa ñut'uychis. K'ulluntawan saphinkunatawan ichaqa kaq pampapi saqenkichis, fierro-bronce cadenawan wataychis, hinaspa campo qora-qorapi saqeychis. Sullaq sullasqan kachun, qanchis watantin campopi uywakunawan tiyachun, nispa.

²⁴Reyníy, kaymi sut'inchayninqa, Qollana Diospa qan contra kamachikusqanpas:

²⁵Runakuna ukhumantan wikch'usunkiku, salqa uywakunawanmi tiyanki, waka hinan qorata mikhunki, sullan sullaykusunki. Qanchis watantinmi chay hina kanki, runakunaq kamachikusqan suyukunapi Qollana Diospa kamachisqanta yachanaykikama, pitachus munasqanta payqa kamachikuqpaq churaq kasqantapas yachanaykikama.

²⁶Chay angelmi nillarqantaq k'ulluntawan saphinkunatawan kaq pampapi saqenapaq. Chayqa sut'inchan maypachachus Diosqa lliwpi kamachikuq kasqanta yachanki chaypacha yapamanta rey kapunaykitan.

²⁷Chayrayku, reyníy, kay kunaykusqayta hap'ikuy: Chaninkaqta ruway, amaña huchallikuychu, mana chanin ruwayniykikunata saqepuspa wakcha runakunata khuyapayay, ichapaschá chaywan allinraq kashawaq, nispa.

²⁸Chaykunan rey Nabukodonosorman chayamurqan.

²⁹Chunka iskayniyoq killaña kashaqtinmi, Babilonia llaqta qhapaq wasin patapi purishaspa,

³⁰reyqa nirqan: ¡Ancha hatunmi Babilonia llaqtaqa! Ancha atiyniywanmi kay llaqtata suyu kamachinay llaqta kananpaq sayarichirqani, hinallataq ancha qhapaq kasqayta rikuchinaypaq, nispa.

³¹Hinan rimayta manaraq tukushaqtin hanaq pachamanta huk kunka nimurqan: Rey Nabukodonosor, uyariway. Kamachikusqayki suyupiqa manañan kamachikapunkichu.

³²Runakuna ukhumantan wikch'usqa kanki, salqa uywakunawanmi tiyanki, waka hinan qorata mikhunki. Qanchis watantinmi chay hina kanki, runakunaq kamachisqan suyupi Qollana Diospa kamachikusqanta yachanaykikama, pitachus munasqanta payqa kamachikuqpaq churaq kasqantapas yachanaykikama, nispa.

³³Kaq ratopachan Nabukodonosorpaq simi hunt'akurqan, hinan runakuna ukhumanta wikch'usqa karqan. Waka hinan qorata mikhurqan, sullaq sullasqanmi karqan, chukchanpas anka phuru hinaraqmi wiñarqan, sillunkunapas phalaq animalkunaq sillun hinaraqmi wiñarqan.

³⁴Chay unanchasqa tiempo hunt'akuqtintaq, ñoqa Nabukodonosorqa hanaq pachata qhawarirqani, hinan yuyayniyta hap'ikurqani. Hinaspaymi Qollana Diosta yupaycharqani, Wiñaypaq Kawsaq Diosta qhapaqchaspa hatunchaspa: Diosqa wiñaypaqmi kamachikun, miray-miraykaman munaychakun.

³⁵Qayllanpiqa manapas kankumanchu hinan kay pachapi llapa runakunaqa. Payqa ima munasqantan ruwan hanaq pachapi kaqkunawanpas kay pachapi kaqkunawanpas. Manan pipas atiynintaqa hark'ayta atinmanchu, manan tapullanmanpaschu: ¿Imanashankitaq? nispapas, nispa.

³⁶Chay kikinpachan yuyayniyta hap'ikurqani, qhapaq-kayniypas hatun-kayniypas kutimpuwarqanmi kamachisqay suyu atiyniyoq kananpaq. Kamachikuqniykunapas yuyaychaqniykunapas maskhawarqankun, wakmantan hatun suyupi kamachikuqta churawarqanku, hinan ñawpaqmantapas aswan atiyniyoqraq kapurqani.

³⁷Kunanqa, ñoqa Nabukodonosorqa yupaychanin, hatunchanin, qhapaqchanin Hanaq Pacha Reyta. Imapas ruwasqanqa cheqaqmi chaninmi, anchaykachaqkunatapas payqa k'umuykachiyta atinmi.