Read Quechua Cuzco Bible 1988 DANIEL 5 Bible Online

DANIEL 5 - Quechua Cuzco Bible 1988 bible

DANIEL 5

¹Rey Belshasarmi waranqa umalli runankunaman hatun mikhuyta haywarqan, chay waranqawanmi vinota ukyarqan.

²Vinowan misk'illikuspanmi Belshasarqa kamachikurqan taytan Nabukodonosorpa Jerusalenpi Diospa wasinmanta apachimusqan qori qerukunata qolqe qerukunata apamunanpaq, chaykunapi reypas, umalli runankunapas, warminkunapas, tiyaqmasin warmikunapas ukyanankupaq.

³Chaymi Jerusalenpi Diospa wasinmanta apamusqanku chay qori qerukunata, qolqe qerukunata aparqanku, chaykunapin ukyarqan reypas, umalli runankunapas, warminkunapas, tiyaqmasin warmikunapas.

⁴Vinotan ukyarqanku, hinaspan yupaycharqanku qorimanta, qolqemanta, broncemanta, fierromanta, k'ullumanta, rumimanta ruwasqa dioskunata.

⁵Chay ratopachan runa maki rikhurirqorqan, k'anchashaq candeleroq qhepanpin qelqarqan reypa qhapaq wasin pachaswan llut'asqa perqa qhatapi. Qelqashaq makita rikuqtintaq,

⁶reytaqa chiri hump'iraq hoqarirqan, mancharikuqtintaq cuerpon ¡rass! nirqan, chaki moqonkunapas takapunakurqan.

⁷Chaymi reyqa kunkayoqta qaparirqan watuqkunata, layqakunata, ch'askata qhawaspa watuqkunata pusamunankupaq, hinaspan Babilonia suyu chay yachayniyoqkunata nirqan: —Pipas kay qelqasqata leeqqa sut'inchaynintapas willawaqqa, reypa sani-puka p'achanwanmi p'achachisqa kanqa, qori walqanawantaq kunkanman walqasqa kanqa, kamachikusqay suyupitaq kinsakaq kamachikuq kanqa, nispa.

⁸Hinan reypa yachayniyoq runankunaqa llapallanku haykurqanku, ichaqa manan mayqenninkupas chay qelqasqata leeyta atirqanchu, sut'inchayninta reyman willaytapas atirqankuchu.

⁹Chaymi rey Belshasarqa sinchitapuni mancharikurqan, uyanpas q'ellumanraq tukurqan, umalli runankunapas manan ima ruwaytapas atirqankuchu.

¹⁰Reypa mamanmi reypapas umalli runankunaqpas ch'aqwasqanta uyarispa hatun mikhuy mikhuna wasiman haykurqan, hinaspan nirqan: —¡Reyníy, wiñaypaqmi kawsanki! Ama mancharikuychu, ama uyaykipas q'ellumanraq tukuchunchu.

¹¹Kamachikusqayki suyupin huk runa kan, paypin ch'uya dioskunaq espiritun kashan. Taytaykiq kamachikusqan p'unchaykunapin payqa sut'i yuyayniyoq karqan, dioskuna hinan yuyayniyoq yachayniyoq karqan. Chay runatan taytayki rey Nabukodonosorqa churarqan llapa yachayniyoqkunata, watuqkunata, layqakunata, ch'askata qhawaspa watuqkunata kamachinanpaq.

¹²Chay runaqa Danielmi, paytan reyqa Belteshasar sutiwan suticharqan. Paymi kusa yuyayniyoq hamawt'a karqan, mosqokusqakunatapas atiqmi sut'inchayta, watuyta, mana atina simikunatapas sasakunatapas atiqmi sut'inchayta. Danielta waqyachimuy, paymi chay qelqasqaq sut'inchayninta willasunki, nispa.

¹³Hinan Danielta reyman pusaykurqanku. Reytaq Danielta tapuykurqan: —¿Qanchu Daniel kanki, Judá suyumanta taytaypa apamusqan runakunamanta huknin?

¹⁴Qanmantan willawanku dioskunaq espiritun qanpi kasqanta, kusa yuyaysapa yachaysapa kasqaykitapas.

¹⁵Ñawpaqeymanmi pusamuwanku yachayniyoqkunata layqakunata kay qelqasqata leenankupaq sut'inchapuwanankupaqwan, ichaqa manan sut'inchayta atinkuchu.

¹⁶Ñoqan uyarini sut'inchayta atisqaykita, sasakunatapas sut'inchasqaykita. Kay qelqasqatachus leeyta atinki, sut'inchapuwankitaq chayqa reypa sani-puka p'achanwanmi p'achachisqayki, qori walqanawanmi kunkaykiman walqachisqayki, hinaspan kinsakaq kamachikuq kamachikusqay suyupi kanki, nispa.

¹⁷Hinan Danielqa reyman kutichirqan: —Qanpaq regaloykikunaqa kachun, qonayki premiokunatapas hukkunaman qoy. Chay qelqasqataqa leepusqaykipunin, sut'inchaynintapas willasqaykipunin.

¹⁸Reyníy, Qollana Diosmi taytayki Nabukodonosorta churarqan suyuta kamachinanpaq, hinallataq payta hatuncharqan, qhapaqcharqan, hatun rey kananpaq.

¹⁹Payta Dios hatunchaqtinmi llapa llaqtakuna, hatun suyukuna, ima rimaytaña rimaqkunapas payta manchakurqanku, qayllanpi khatatatarqanku. Taytaykiqa pitachus munaq chaytan wañuchiq, pitachus munaq chaytan mana wañuchiqchu. Pitachus munaq chaytan hatunchaq, pitachus munaq chaytan k'umuykachiq.

²⁰Ichaqa sonqonpi hatunchakuqtinmi, anchaykachaspa k'ulluchakuqtinmi, kamachikusqan tiyanamanta wikch'usqa kapurqan, qhapaq-kayninpas qechusqa kapurqan.

²¹Runakuna ukhumantan qarqosqa karqan, yuyayninmi uywaq yuyaynin hina kapurqan, salqa asnokunawanmi tiyarqan. Waka hinan q'achuta mikhurqan, cuerponmanpas sullamurqanmi, runakunaq kamachisqan suyukunata Qollana Diospa kamachisqanta yachanankama, pitachus pay munan chayta kamachikuqpaq churaq kasqantapas yachanankama.

²²Qantaq, churin Belshasar, chay hina kasqanta yachashaspa mana k'umuykukurqankichu,

²³aswanpas Hanaq Pacha Señor Dios contran umata hoqarirqanki, hinaspan wasinmanta qerukunata apachimurqanki. Chaykunapin vinota ukyarqankichis qanpas, umalli runaykikunapas, warmiykikunapas, tiyaqmasiyki warmikunapas, hinallataq yupaycharqanki qolqemanta, qorimanta, broncemanta, fierromanta, k'ullumanta, rumimanta ruwasqa dioskunata. Chaykunaqa manan rikunkuchu, manan uyarinkuchu, manan imatapas yachankuchu. Kawsachiqniyki Diostataq ichaqa mana yupaycharqankichu, paymantan imatapas chaskinki.

²⁴Chaymi payqa kay simikunata qelqananpaq makita rikhurichimurqan.

²⁵Kay qelqasqaqa: MENE, MENE, TEKEL, PARSIN, ninmi.

²⁶Kaymi chaykuna sut'inchayqa: MENE: Diosmi kamachikusqayki p'unchaykunata yuparqan, hinaspan p'uchukachipun.

²⁷TEKEL: balanzapin aysasqa karqanki, pisirqankitaqmi.

²⁸PARSIN: kamachisqayki suyun rakikapurqan, hinaspan Media suyu runakunaman Persia suyu runakunamanwan qosqa kapun, nispa.

²⁹Hinan rey Belshasarqa kamachikurqan Danielta reypa sani-puka p'achanwan p'achachinapaq, kunkanmanpas qori walqanata warkunapaq, hinaspa kamachisqan suyupi kinsakaq kamachikuq kasqanta willachimunapaqpas kamachikurqan.

³⁰Chay tutapachan Babilonia suyu runakunaq reynin Belshasarqa wañuchisqa karqan.

³¹Media suyumanta Dariotaq kamachisqan suyuta hap'irqan, soqta chunka iskayniyoq watayoq kashaspa.