Read Quechua Cuzco Bible 1988 DANIEL 6 Bible Online

DANIEL 6 - Quechua Cuzco Bible 1988 bible

DANIEL 6

¹Rey Darion yuyaykurqan pachak iskay chunka kamachikuqkunata suyunpi churayta, hinantin kamachisqan suyupi kamachikunanpaq.

²Paykunata kamachinanpaqtaq kinsa hatun uma qollanakunata churarqan. Paykunamanmi suyupi kamachikuqkunaqa imatapas willananku karqan, ama reyqa imapipas imanasqapaschu kananpaq. Danielqa hatun uma qollanan karqan.

³Chay Danielmi wakin hatun uma qollanakunamantapas suyupi kamachikuqkunamantapas aswan allin kasqanta rikuchirqan, payqa aswan kusa imapas ruwananpaq kasqanrayku. Hinan reyqa yuyaykurqan tukuy kamachikusqan suyupi kamachiqpaq Danielta churayta.

⁴Chaymi wakin uma qollanakunapas suyupi kamachikuqkunapas Danielta imallapipas ch'ataytapuni munaspa hatun suyu kamachishasqanpi mana allinta tariytapuni maskharqanku, ichaqa manan ima pantasqallantapas tarirqankuchu, payqa hunt'aqtaq chanin ruwaqtaq kasqanrayku. Chaymi mana imallatapas pantasqanta huchanta paymanta willayta atirqankuchu.

⁵Chaypas paykunaqa ninakurqankun: Kay Daniel contraqa manan imallatapas tarisunchu ch'atananchispaq, aswanpas Diosninpa kamachikuyninta ruwasqallantan pay contrataqa tarisunchis, nispa.

⁶Hinaspanmi chay hatun uma qollanakunaqa suyupi kamachikuqkunapas reyman usqhaylla phawarqanku, hinaspan nirqanku: —¡Rey Darío, wiñaypaqmi kawsanki!

⁷Hatun suyupi llapan hatun uma qollanakuna, prefectokuna, kamachikuqkuna, umalli runakuna, yuyaychaqkuna ima huñunakuspan rimanakuyku kayta kamachikunaykipaq kasuchikunaykipaqwan: Pipas kinsa chunka p'unchay ukhupi mayqen diosmantapas otaq runamantapas mañakunman, manataq reyllamantachu mañakunman chayqa, leonkuna ukhuman wikch'uykusqa kachun, nispa.

⁸Chayrayku kay kamachikuy simita churaspa qelqay ama p'akisqa kananpaq, imaynan Media suyuq Persia suyuq kamachikuynin simikunapas mana p'akikunchu hinata, nispa.

⁹Chaymi rey Darioqa kamachikuy simita firmarqan.

¹⁰Danieltaq kamachikuy simi firmasqaña kasqanta yachaspa wasinman haykurqan. Altos wasinpin Jerusalenman qhawashaq ventanakuna karqan, chaypin kinsa kutita p'unchay qonqorikurqan Diosmanta mañakunanpaq graciastapas qonanpaq, imaynan ruwallaqpuni hinata.

¹¹Hinan chay runakunaqa huñunakuspanku Danielpa wasinman haykurqanku, hinaspan payta hap'irqanku Diosninmanta mañakushaqta yanapaynintapas valekushaqta.

¹²Hinaspankun reyman rirqanku kamachikusqan simimanta rimapayaq, paytan nirqanku: —Qanmi kamachikuy simita churarqanki pipas kay kinsa chunka p'unchay ukhupi mayqen diosmantapas otaq mayqen runamantapas mañakunman, manataq qanllamantachu chayqa, leonkuna ukhuman wikch'uykusqa kananpaq, ¿hinachu manachu? reyniyku, nispa. Reytaq kutichirqan: —Arí, hinapunin. Kamachikuy simiqa hunt'akunanmi Media runakunaq Persia runakunaq kamachikuy siminman hina, manan chayqa p'akisqa kayta atinmanchu, nispa.

¹³Hinan paykunaqa yapamanta nirqanku: —Judá suyumanta apamusqa Danielqa manan manchakusunkichu, manan kamachikuy simi qelqasqaykitapas kasukunchu, aswanmi kinsa kutitaraq p'unchay mañakun, nispa.

¹⁴Chayta uyarispanmi reyqa maytapuni llakikurqan, hinaspan Danielta qespichiytapuni munarqan. Inti haykuykaman Danielta qespichiytapuni munaspa reyqa imaymanata yanakurqan.

¹⁵Chay runakunan ichaqa reyman kutispa nirqanku: —Qanqa allintan yachanki, Media runakunaq Persia runakunaq kamachikuy siminman hinaqa manan reypa ima hark'asqan simitapas otaq ima kamachikusqan simitapas pipas p'akinmanchu, nispa.

¹⁶Hinaqtinmi reyqa kamachikurqan Danielta apamuspanku leonkuna ukhuman wikch'uykunankupaq. Manaraq wikch'uykushaqtinkutaq reyqa Danielta nirqan: —Tukuy sonqoykiwan servisqayki Diosniyki qespichisunki, nispa.

¹⁷Rumita apamuspataq t'oqota chaywan wisq'aykurqanku, reytaq selloyoq anillonwan umalli runankunaq anillonpiwan chayta selloykurqan, Danielpaq rimanakusqa hunt'akunanpaq.

¹⁸Chaymantataq reyqa wasinta ripurqan, hinaspa mana mikhusqa puñunanman siriykurqan. Manan taki tocanakunatapas qayllanman apamurqankuchu, manan chay tuta chhikallantapas puñurqanchu.

¹⁹Tutallamanta sayarispanmi reyqa phawaylla leonkunaq t'oqonman rirqan.

²⁰T'oqoman qayllaykuspataq waqay-waqay kunkanwan Danielta waqyarqan: —Daniel, kawsaq Diospa kamachin, ¿tukuy sonqo servisqayki Diosniykiqa leonkunamanta qespichisunkichu? nispa.

²¹Hinan Danielqa nirqan: —Reyníy, ¡wiñaypaqmi kawsanki!

²²Diosniymi angelninta kachamuwan, paymi leonkunaq siminta wisq'arparin. Manan Dios contraqa huchallikurqanichu, qan contrapas manan ima mana allintapas ruwarqanichu, chaymi leonkunaqa mana k'iriwanchu, nispa.

²³Chaymi reyqa maytapuni kusikuspa kamachikurqan Danielta t'oqomanta horqomunankupaq. Danielta t'oqomanta horqomuspankutaq mana ima k'irillatapas tarirqankuchu, Diosninman hap'ipakusqanrayku.

²⁴Chaymantataq reyqa kamachikurqan Danielta ch'ataq runakunata apamunankupaq, hinan paykunaqa warmintin wawantin leonkuna ukhuman wikch'uykusqa karqanku, leonkunataq t'oqomanpas chayraq urmaykushaqtinku paykunata hap'irparispa tullunkunata lliwta p'akirqarirqan.

²⁵Hinaqtinmi rey Darioqa qelqarqan kay pachantinpi tiyaq llapa llaqtakunaman, hatun suyukunaman, ima rimaytaña rimaqkunamanpas: Allintapuni kawsaychis.

²⁶Ñoqan kayta kamachikuni: Hinantinpi kamachikusqay hatun suyupi llapalla Danielpa Diosninta manchakuchunku yupaychachunku. Paymi kawsaq Diosqa, wiñay-wiñaypaqmi sayashanpas. Kamachikuyninqa manan hayk'aqpas qollunqachu, munaychakuyninpas manan hayk'aqpas tukukunqachu.

²⁷Paymi qespichinpas kacharichinpas, hanaq pachapipas kay pachapipas señalkunatan musphanakunatan ruwan. Paymi Danielta leonkunaq mikhunanmanta qespichirqan, nispa.

²⁸Danielqa allillanpunin kasharqan Darío kamachikushaqtinpas Persia suyu rey Ciro kamachikushaqtinpas.