Read Quechua Cuzco Bible 1988 DANIEL 7 Bible Online

DANIEL 7 - Quechua Cuzco Bible 1988 bible

DANIEL 7

¹Babilonia suyu rey Belshasarpa kamachikuyta qallarisqan watapin Danielqa puñushaspa mosqokurqan, rikhuriykunatapas rikurqan. Rikch'arispataq mosqokusqankunata qelqarqan.

²Danielmi nirqan: Tuta mosqokuspaymi rikushasqani hatun mama qochata tukuyneqmanta wayra phoqchiqechishaqta.

³Chayllamanmi mama qochamanta tawa hatunkaray animalkuna hukniray rikch'ayniyoqkama lloqsimushasqa.

⁴Ñawpaqkaqmi leonman rikch'akurqan, ichaqa anka hina raphrayoqmi karqan. Qhawashaqtiymi raphrankunata sik'irqanku, pampamantan sayarichirqanku hinan qhepa chakinkunawan sayaykurqan. Runa hinan sayarqan, runa yuyaymi qosqa karqan.

⁵Iskaykaqmi ukumariman rikch'akurqan. Chay animalmi phawaykunanpaq hinallaña sayasharqan, siminpi kinsa waqtan tullu achuykusqa. Huk kunkan chay animalta nirqan: ¡Phaway, askha aychawan saksamuy! nispa.

⁶Qhawashallarqanitaqmi, hinan kinsakaqpas leopardo hina rikhurimurqan, ichaqa tawa umayoqmi wasanpi tawa raphrayoqmi karqan, kamachikunanpaqtaq payqa churasqa karqan.

⁷Chaymantan tuta rikhuriykuna rikusqaypi rikullarqanitaq tawakaq animalta, sinchi manchakuymi karqan, allin kallpasapataq karqanpas. Fierro kiruyoqmi karqan, tukuytan millp'uykurqanpas ñut'urqanpas, puchuqtapas t'usturqanmi. Ñawpaq rikusqay animalkunamantapas manan rikch'ayllapas rikch'akurqanchu, chunka raphrayoqtaqmi karqanpas.

⁸Waqrakunata qhawashaqtiytaq, chaykuna ukhumanta huk huch'uy waqra rikhurimurqan, hinaspan ñawpaq waqrakunamanta kinsa waqrata sik'irqan. Chay waqran runa ñawi hina ñawiyoq karqan, siminpas anchaykachaspataq rimarqan.

⁹Qhawashaqtiymi, kamachikuy tiyanakunata churarqanku, Yuyaq Runataq tiyaykurqan. P'achanmi rit'i hina yuraq karqan, uma chukchanpas yuraq millma hinan karqan. Tiyananmi nina rawray karqan, chaypa ruedankunapas qanqeshaq nina rawrayllataq karqan.

¹⁰Paypa ñawpaqenmanta lloqsispan nina mayu phawarqan. Waranqaq waranqanmi payta servirqanku, aqo t'iyu hinan ñawpaqenpi sayasharqanku. Juzgana tribunalmi qallarirqan, qelqakunataq kicharisqa karqan.

¹¹Ñoqan qhawasharqani chay huch'uy waqraq anchaykachaspa rimashasqantaraq uyarispa. Qhawashaqtiytaq chay animalqa wañuchisqa llik'irqarisqa karqan, hinamantataq ruphananpaq ninaman wikch'uykusqa karqan.

¹²Wak animalkunamantapas atiyninkutan qechusqakuña, ichaqa pisi tiempollatañan paykunaqa kawsachisqa karqanku.

¹³Tuta rikhuriytan ñoqa qhawasharqani, chayllamanmi runata hina rikurqani, paymi phuyu ukhupi hamusharqan. Paymi Yuyaq Runaman qayllaykurqan, hinan Yuyaq Runaman asuykachirqanku.

¹⁴Paymi kamachikuy atiyta chaskirqan, qhapaqchasqan karqan, rey kananpaq churasqan karqan, llapa llaqtakunan, hatun suyukunan, ima rimaytaña rimaqkunapas payta servinanku. Kamachikuyninqa wiñaypaq kamachikuymi, manan hayk'aqpas tukukunqachu, munaychakuyninqa mana qollochinan kanqa.

¹⁵Ñoqa Danielmi sinchita mancharikurqani, rikhuriykunata rikusqaymi sinchita llakichiwarqan.

¹⁶Huknin sayashaqmanmi asuykurqani, hinaspan chaykunata sut'inchapuwananpaq payta tapurqani. Chaymi payqa uyakuwaspa chaykunata sut'inchapuwarqan:

¹⁷Kay hatunkaray tawa animalkunaqa kay pachapi sayarinqaku chay tawa hatun suyukunan.

¹⁸Qollana Diospa llaqtanmi ichaqa munaychakuyta chaskinqaku, wiñay-wiñaypaqtaq kamachikunqaku, nispa.

¹⁹Hinan ñoqaqa tawakaq animalqa pichus kasqanta yachayta munarqani. Chay animalmi wakinmantapas hukniraqpuni karqan, sinchi manchakuymi karqan, fierro kiruyoqmi bronce silluyoqmi karqan. Tukuytan mikhurqan ñut'urqan, puchuqkunatataq t'usturqan.

²⁰Astawanraqmi yachayta munarqani umanpi kaq chunka waqranmantapas huch'uykaq waqranmantapas. Chay waqran hukkunamanta lloqsispa kinsata urmachirqan. Chay kikin waqrallataq ñawiyoq karqan, siminpas anchaykachaspa rimarqan, huk waqrakunamantapas aswan kuraktaq rikch'akurqan.

²¹Ñoqa rikushaqtiymi chay waqraqa Diospa llaqtan runakuna contra hatun maqanakuyta hatarichisharqan, hinaspa atipasharqan.

²²Chayllamanmi Yuyaq Runaqa hamuspan Qollana Diospa llaqtan runakunapaq chaninchapurqan, Diospa llaqtan runakuna munaychakuyta chaskinanku p'unchay chayamusqanrayku.

²³Kay hinatan sut'inchapuwarqan: Tawakaq animalqa kay pachapi tawakaq hatun suyun kanqa, llapa suyukunamantapas hukniraqmi kanqa, llapa pachatan millp'uykunqa, sarunqa, ñut'unqa.

²⁴Chunkantin waqranqa kaymi: chay hatun suyupin chunka reykuna kamachikunqaku, chaykunaq qhepantataq huk rey kamachikunqa, paymi ñawpaqkunamantapas hukniraqpuni kanqa, chay reykunamantataq kinsata wikch'unqa.

²⁵Qollana Dios contran rimanqa, Qollana Diospa llaqtan runakunatan sarunchanqa. Fiestakunatapas kamachikuy simitapas cambiaytan yuyaykunqa, Diospa llaqtan runakunataqmi kinsa wata kuskanpaq payman hap'ichisqa kanqa.

²⁶Ichaqa juzgana tribunalmi qallarinqa, hinaspan chay reypa kamachikusqanta qechunqaku, paytaqa pasaqpaqmi tukupunqaku.

²⁷Teqsimuyuntinpi llapa suyukunaq munaychakuynin, atiynin, hatun-kayninpiwantaq, Qollana Diospa llaqtan runakunaman qosqa kapunqa. Munaychakuyninkuqa wiñaypaqmi kanqa, teqsimuyuntin llaqtakunan paykunata servinqaku kasunqaku, nispa.

²⁸Chaykamallan chay rikusqaykunaqa. Ñoqa Danielmi hawapi-ukhupi sonqoyoq kasharqani, uyaypas q'elluyarqanraqmi, ichaqa manan chayta pimanpas rimarirqanichu.