Read Quechua Cuzco Bible 1988 DANIEL 8 Bible Online

DANIEL 8 - Quechua Cuzco Bible 1988 bible

DANIEL 8

¹Iskay wata kurakña rey Belshasar kamachikushaqtinmi ñoqa Danielqa iskaykaq rikhuriyta rikurqani.

²Rikhuriypin provinciaq hatun llaqtan Susapi kashasqani, Ulai nisqa mayu patapi.

³Qhawarispan rikurqani mayu patapi huk anejo sayashaqta. Hatuchaq iskay waqrayoqmi karqan, hukninmi aswan hatun hukkaqmantaqa karqan, chay aswan hatunkaqtaq qhepataña wiñarqan.

⁴Anejotan rikurqani inti haykuyman, wichayman, urayman waqrapakushaqta, manataq mayqen animalpas chaywan churanakuyta atirqanchu, atiyninmantapas pipas kacharichiyta atirqanchu. Ima munasqantan ruwarqan, aswan-aswantan hatunchakurqan.

⁵Chay rikusqaypi yuyaykushaqtiymi huk orqo cabra inti haykuyneqmanta qonqaylla rikhurimurqan, phawayllan phawamurqan mana pampatapas saruykuspa. Chay cabran mat'inpi hatun waqrayoq karqan.

⁶Mayu patapi rikusqay iskay waqrayoq anejoman chayaspataq sinchi phiñasqa tukuy kallpanwan takarqan.

⁷Anejoman imaynatachus phawaykusqantan rikurqani, sinchi phiñasqan chaypa iskaynin waqranta p'akirparirqan, anejotaq mana kallpayoq kapurqan paywan churanakunanpaq. Pampaman kumparqospanmi sarurparirqan, manataq pipas anejota kacharichiq karqanchu.

⁸Orqo cabrataq sinchitapuni hatunchakurqan, ichaqa sinchi kallpasapa kashaqtinmi chay hatun waqranqa p'akikurqan, chay waqraq rantinpitaq tawantin kinrayman tawa waqrakuna wiñamurqan.

⁹Hukninkumantan huch'uy waqra wiñamurqan, sinchitataq wiñarqan uray ladoman, inti lloqsimuy ladoman, Munayllaña Hallp'amanwan.

¹⁰Hanaq pacha ch'askakunaman chayanankama wiñarqan, hanaq pacha wakin ch'askakunatapas pampamanmi wikch'umurqan, hinaspan chaykunata sarurparirqan.

¹¹Ch'askakunata Kamachiq contrapas hatunchakurqanmi, sapa p'unchay sacrificio haywanatapas hark'akurqanmi, Dios yupaychana wasitapas qhellicharqanmi,

¹²Dios sonqo runakunatapas muchuchirqanmi. Sapa p'unchay sacrificio haywanantaqa Diospa wasinpin millayta huchallikurqan. Cheqaq yupaychanatapas wikch'urqanmi. Ima munasqantan ruwarqan, imapas paypaqqa allinkamataq karqan.

¹³Hinamantataq huk angelpa rimasqanta uyarirqani, hukkaq angeltaq chay rimashaqta tapurqan: ¿Hayk'aqkamataq chay rikhuriypi rikusqaqa kanqa? ¿Hayk'aqkamataq Diospa wasinpi millayta huchallikunqaku sacrificiota sapa p'unchay haywanankutaqa? ¿Hayk'aqkamataq Dios yupaychana wasitapas qhellichanqaku, hanaq pacha ejercitotapas muchuchinqaku? nispa.

¹⁴Hinan payqa nirqan: Waranqa pachak phisqa chunkayoq p'unchaymi mana sacrificiota haywanqakuchu tutamantapas ch'isiyaykuytapas. Chay qhepatataq Diospa wasinqa ch'uyayachisqa kapunqa, nispa.

¹⁵Chay rikhuriyta ñoqa Daniel rikuspay entiendeytapuni munashaqtiymi, ñawpaqeypi huk runaman rikch'akuq rikhuriwarqan.

¹⁶Hinan Ulai nisqa mayumanta huk kunkata uyarirqani, chay kunkan waqyakurqan: Gabriel, chay rikhuriyta Danielman sut'inchay, nispa.

¹⁷Chaymi payqa asuykamuwarqan, qayllaykamuwaqtintaq sinchita q'aqchakuspa pampaman uyanpamanta urmarqani. Paytaq niwarqan: Qan, runa, entiendey, kay rikhuriyqa p'uchukay tiempopi hunt'akunanpaqmi, nispa.

¹⁸Pay rimaykuwashaqtintaq ñoqaqa yuyay chinkasqa pampaman uyayoq wikch'urayasharqani, paytaq llamiykuwaspan sayarichiwarqan.

¹⁹Hinaspan niwarqan: Ñoqan willasqayki k'arakta phiñakuspa Diospa imatachus ruwananta, rikhuriyqa p'uchukay tiempopin hunt'akunqa.

²⁰Iskay waqrayoq anejo rikusqaykiqa Media suyu Persia suyu reykunan.

²¹Orqo cabraqa Grecia suyu reymi, mat'inpi hatun waqraqa ñawpaqkaq reymi.

²²Ñawpaqkaq waqra p'akikuqtin wiñaq tawa waqraqa chay hatun suyumanta tawa suyukuna sayarimunanmi, ichaqa manan ñawpaqkaq hina kallpasapachu kanqaku.

²³Chay tawa reykuna kamachikuyta tukushaqtinkutaq, huchallikuqkuna sinchitapuni huchallikuqtinku, anchaykachaq yuyaysapa rey kamachikuq sayarinqa.

²⁴Kallpasapan kanqa, ichaqa manan paypa kallpanwanchu. Sinchitan purunyachinqa, imapas paypaqqa allinkaman kanqa. Atiyniyoqkunatan wañuchinqa, Diospa llaqtantapas wañuchinqan.

²⁵Yuyaysapa kasqanwanmi q'otuspa ruwasqankunaqa paypaq allin kanqa. Sonqonpin hatunchakunqa, qonqayllan askha runata wañuchinqa. Kamachikuqkunaq Kamachiqnin contran sayarinqa, ichaqa runaq mana wañuchisqanmi wañunqa.

²⁶Ch'isiyaykuytapas tutamantapas haywana sacrificio rikhuriymanta willasqayqa cheqaqmi, qantaq chay rikhuriyta sonqollaykipi hap'iy, unay tiempomantaraqmi hunt'akunqa, nispa.

²⁷Hinaqtinmi ñoqa Danielqa pisi kallpayarqani, hinaspan iskay-kinsa p'unchayta onqorqani. Qhaliyaspaytaq reypa churawasqan llank'anapi llank'arqani. Ichaqa chay rikhuriypa mancharichisqanmi kasharqani, manataqmi chay rikhuriytaqa entiendeyta atirqanichu.