Read Quechua Cuzco Bible 1988 DANIEL 9 Bible Online

DANIEL 9 - Quechua Cuzco Bible 1988 bible

DANIEL 9

¹Media suyumanta Asueroq churin Darion Babilonia runakunaq suyunpi kamachikusharqan.

²Hinan ñawpaqkaq wata kamachikuyninpi ñoqa Danielqa Señor Diospa profeta Jeremiasman willasqan qelqapi allintapuni qhawarqani Jerusalenqa qanchis chunka watantin raqay-raqayman tukuchisqa kananta.

³Hinaspan ayunaspa, yana p'achawan churakuspa, uspha patapi tiyaykuspa Apu Señor Diosmanta mañakurqani, payta rogakurqani, valekurqani.

⁴Apu Señor Diosniymanmi mañakurqani, hinaspan willakurqani: Señor Diosníy, hatun manchakuna Dios, qanmi rimanakusqaykita hunt'anki, munakuqniykitapas kamachikuyniykikunata kasuqkunatapas manakunki.

⁵Huchallikurqaykun, mana chanintan ruwarqayku, millaytan ruwarqayku, qanta mana kasuspan kawsarqayku, kamachikusqaykikunatapas kamachikuy simiykikunatapas saqepurqayku.

⁶Manan kamachiyki profetakunata kasurqaykuchu, paykunan sutiykipi willawarqanku reyniykuman, kamachiqniykuman, machulaykuman, Israel llaqtantinmanpas.

⁷Señor Diosníy, qanqa chaninmi kanki, ichaqa ñoqayku Judá runakunapas Jerusalenpi tiyaqkunapas llapan Israel runakunapas kay p'unchaymi p'enqasqa kashayku. Qanmi mana kasukusqaykurayku ch'eqechiwarqankiku, chaymi sispa suyukunapipas karu suyukunapipas kashayku.

⁸Señor Diosníy, ñoqaykupas, reyniykupas, kamachikuqniykupas, machulaykupas p'enqasqan kashayku, qan contra huchallikusqaykurayku.

⁹Apu Señor Diosniyku, qan contraña sayarirqayku chaypas, qanmi khuyapayaqpas pampachaqpas kanki.

¹⁰Apu Señor Diosniyku, manan kasurqaykikuchu, kamachiyki profetakunawan churapuwasqaykiku yachachikuy simikunatapas manan kasurqaykuchu.

¹¹Llapa Israel runakunan yachachikuy simiykikunata mana kasurqankuchu, simiykita mana uyariyta munaspan t'aqakurqanku. Kamachiyki Moisespa kamachikuy siminpi qelqasqa kashaq ñakaykunan jurasqayki huchachaykunan chayamuwarqanku qan contra huchallikusqaykurayku.

¹²Qantaq ñoqayku contra, kamachiqniyku runakuna contrapas rimasqayki simikunata hunt'arqanki, kay manchay mana allinwan muchuchiwaspaykiku. Manan hayk'aqpas kay pachapiqa karqanchu Jerusalenman muchuy chayamusqanmanta aswanraqqa.

¹³Moisespa kamachikuy siminpi qelqaspa kashan chayman hinan kay tukuy mana allinkuna chayamuwarqanku, ñoqaykutaq ichaqa huchallikusqaykutapas mana saqepurqaykuchu, cheqaq-kayniykitapas manan makichu uyarirqayku sumaqta qhawariwanaykikupaq.

¹⁴Chaymi qanqa, Apu Señor Diosniyku, kay muchunata wakichirqanki, hinaspa ñoqaykuman chayachimuwarqankiku. Qanqa, tukuy ima ruwasqaykikunapipas chaninmi kanki, ñoqaykun ichaqa mana kasukurqaykikuchu.

¹⁵Apu Señor Diosniyku, qanmi Egipto suyumanta kallpasapa kayniykiwan llaqtaykita horqomurqanki, kunankaman chay ruwasqaykiwan mentasqa kashanki, ñoqaykun ichaqa huchallikurqayku, mana chanintan ruwarqayku.

¹⁶Señor Diosníy, lliw chanin ruwasqaykikunaman hina kunan amaña k'arakta phiñakuyñachu. Ñoqaykuqpas machulaykuqpas huchallikusqaykumantan Jerusalenpas llaqtaykipas llapa muyuriqniykupi tiyaqkunaq pisichasqan kashayku.

¹⁷Kunanqa, Diosniyku, kamachiykiq mañakusqanta rogakamusqantawan uyariykuway. Sutiykirayku, Señor Diosníy, sumaqta qhawarimuy raqay-raqay kashaq yupaychana wasiykita.

¹⁸Diosniyku, makilla uyariykamuway, sutiykiwan sutichasqa purunyasqa llaqtata allinta qhawariy. Manan chanin ruwasqaykuman hap'ipakuspaykuchu mañakamuykiku, aswanpas ancha khuyapayakuyniykiman hap'ipakuspaykun.

¹⁹¡Señor Diosníy, uyariykuwayku! ¡Pampachaykuwayku! ¡Señor Diosníy, makilla uyariykuwayku, hinaspa yanapaykuwayku! ¡Diosníy, qan kikiykirayku, sutiykiwan sutichasqa llaqtaykirayku runaykikunarayku amaña unayyachiychu! nispa.

²⁰Rimashallarqaniraqmi, mañakushallarqaniraqmi, huchaykunatapas, Israel llaqtaypa huchankunatapas willakushallarqaniraqmi, Diosniypa ch'uya orqonpaq Apu Señor Diosniymanta mañakuspay.

²¹Chayllamanmi ñawpaqta rikhuriypi rikusqay Gabriel runa usqhaylla phalamuspa chayamuwarqan ch'isiyaykuyta sacrificio haywana horata hina.

²²Hinaspan niwarqan: Daniel, kunanmi hamuni sut'inchaspa qanman entiendechinaypaq.

²³Mañakuyta qallarishaqtiykin Dios kutichimurqasunki, ñoqataq chayta qanman willanaypaq hamurqani, Diospa ancha munasqan kasqaykirayku. Chayrayku makilla uyariway rikhuriyta entiendenaykipaq:

²⁴Qanchis chunka semanan t'aqasqa kashan Israel llaqtaykipaq ch'uya llaqtaykipaqwan mana kasukuyta p'uchukachinapaq, huchatapas p'uchukachinapaq, mana chanin ruwasqata pampachanapaq, wiñaypaq chanin-kayta churanapaq, rikhuriypas profetizasqapas hunt'akunanpaq, Ch'uyay-Ch'uya Cheqastapas Diospaq wakmanta t'aqanapaq.

²⁵Kaytan yachanayki entiendenayki: Jerusalenta wakmanta sayarichinapaq perqanapaqwan kamachisqa simi lloqsimusqanmanta Diospa akllasqan Kamachikuq hamunankamaqa qanchis semanan kanqa soqta chunka iskayniyoq semanapiwan. Llaki-phutiy p'unchaykunapin llaqtata wakmanta sayarichinqaku, plazakunatawan llaqta waqaychana muyuriq hasp'isqa k'aktuntinta.

²⁶Soqta chunka iskayniyoq semana tukukuqtintaq Diospa akllasqan Kamachikuqqa wañuchisqa kanqa, ichaqa pay mana piniyoq kaspa. Huk hina runan hamunqa, soldadonkunataq Jerusalentapas yupaychana wasitapas thuninqa. P'uchukayqa millp'uq unu hinan chayarqamunqa, hatun maqanakuypas Diospa wakichisqan thuniykunapas p'uchukaykamataq kashanqa.

²⁷Hukkaq semanatataq askha runawan allintapuni rimanakunqa, chay kuskan semanatataq sacrificiotawan ofrendatawan qolluchinqa. Chay qhepatataq thuniqqa yupaychana wasi patapi millay-millayta churanqa, chay thuniq runaqa Diospa kamachikusqanman hina ch'usaqyachisqa kanankama, nispa.