Read Quechua Cuzco Bible 1988 OSEAS 1 Bible Online

OSEAS 1 - Quechua Cuzco Bible 1988 bible

OSEAS 1

¹Judá suyupi rey Uzías, rey Jotam, rey Ahaz, rey Ezekías kamachikushaqtinkun, Israel suyupitaq Joaspa churin rey Jeroboam kamachikushaqtin, Señor Diosqa Beeriq churin Oseasta rimaykurqan.

²Señor Diosmi Oseaswan rimaykachiyta qallarishaspa payta nirqan: Llaqtayqa wasanchawaspanmi t'aqakapuwan, chayrayku rispa rabona warmiwan casarakamuy. Hinaspa chay rabonapi wawakunata churiyamuy, hinan “wasanchaq warmiq wawankuna” nisqa kanqaku, nispa.

³Chaymi Oseasqa Diblaimpa ususin Gomerwan casarakurqan. Paymi wiksallikuspa qhari wawata Oseaspaq wachakurqan.

⁴Hinan Señor Diosqa Oseasta nirqan: Kay pisi p'unchaykunallamantan rey Jehupa ayllunta muchuchisaq Jezreelpi runakunata wañurqarichisqanmanta, hinaspaymi wichay lado Israel suyuta chinkachipusaq, chayrayku wawata Jezreel[1] sutiwan sutichay.

⁵Chay p'unchaypin Jezreel wayq'opi Israel soldadokunaq atiyninta p'uchukachipusaq, nispa.

⁶Huktawanmi Gomerqa wiksallikuspa warmi wawata wachakurqan. Hinan Señor Diosqa Oseasta nirqan: Wawata “Mana Munasqa” nisqata sutichay, manañan Israel runakunata astawanpas llakipayasaqñachu huchankuta pampachashanaypaq.

⁷Aswanpas Judá runatan llakipayasaq, hinaspan ñoqa kikiy Apu Señor Diosninku paykunata qespichisaq, ichaqa manan wach'ina p'eqtawanchu, espadawanchu, awqa-tinkuywanchu, caballokunawanchu, caballoyoq soldadokunawanpaschu, nispa.

⁸Mana Munasqa nisqa wawata p'itipusqan qhepatataq Gomerqa wakmanta wiksallikurqan, hinaspan huk qhari wawata wachakurqan.

⁹Hinan Señor Diosqa Oseasta nirqan: Wawata “Mana Llaqtaychu” nisqata sutichay, manan qankunaqa llaqtayñachu kapunkichis, manan ñoqapas Diosniykichisñachu kapuni, nispa.

¹⁰Chaypas Israel runakunaqa mama qocha aqo t'iyu hinan kanqaku, “Manan Llaqtaychu” nisqa cheqaspin “Kawsaq Diospa Wawankuna” nisqa kanqaku.

¹¹Chaypachan Judá suyu runakunapas Israel suyu runakunapas hukllaman huñuykukunqaku, ch'ulla kamachiqllata churakunqaku, suyunkupipas t'ikarinqaku. ¡Jezreelpa t'ikarisqan p'unchayqa ancha hatunmi kanqa!