Read Quechua Cuzco Bible 1988 OSEAS 2 Bible Online

OSEAS 2 - Quechua Cuzco Bible 1988 bible

OSEAS 2

¹Hinan paykunaqa wawqenkuta ninqaku: Diospa llaqtanmi kankichis, nispa, panankutapas ninqaku: Diospa munakusqankunan kankichis, nispa.

²Señor Diosmi nin: Mamaykichista huchachaychis, payta huchachaychis, manan payqa warmiyñachu, manan ñoqapas qosanchu kani. Rabona-kayninta saqepuchun, rabona-kaynin achalakuykunata saqepuchun.

³Paqtan p'achanta ch'utispa q'alarpariyman, nacesqan p'unchaypi kasqanta hinan ruwayman, purunyachipuyman, ch'aki hallp'allamanña tukuchiyman, hinaspa ch'akiymanta wañuchiyman.

⁴Manan wawankunatapas khuyapayasaqchu, qhellipi purispa tarisqa wawakuna kasqanrayku.

⁵Mamanqa qhellipin purirqan, paykunata wachaqqa p'enqaytan ruwarqan, nirqanmi: Munakuwaqniykunata qatikusaq, paykunan qowan mikhunatapas, unutapas, millmatapas, linotapas, aceitetapas, ukyanatapas, nispan.

⁶Chaymi ñanninta khiskawan wisq'asaq, rumi perqawanpas muyuykachisaq ñanninkunata manaña tarinanpaq.

⁷Munakuqninkunaq qhepantan phawanqa, manataqmi taripanqachu, maskhaykunqan manataqmi tarinqachu. Chaymi ninqa: Ñawpaqkaq qosayman kutipusaq, paywanqa aswan allinmi karqani kunanmantaqa, nispa.

⁸Payqa manan yuyarikurqanchu ñoqa payman trigotapas, vinotapas, aceitetapas qosqayta. Ñoqan payman qolqetapas qoritapas askhata qorqani, paytaq ichaqa chaykunawan Baal nisqa diosta ruwachikurqan.

⁹Chaymi ñoqaqa qechukapusaq poqosqaña trigotapas ch'arwasqaña vinotapas. Qechukapullasaqtaqmi p'achakunanpaq qoykusqay millmaytapas linoytapas.

¹⁰Hinaspan munakuqninkunaq rikushasqan cuerponta q'alarparisaq. ¡Manan pipas makiymantaqa payta horqonqachu!

¹¹P'uchukachisaqmi lliw q'ochukuyninta, wata fiestankunata, Mosoq Killa p'unchayninkunata, samana p'unchayninkunata, llapa huñukuyninkunatapas.

¹²Uvas chakrankunatapas higos sach'ankunatapas chaqosaqmi, chaykunamantan payqa nirqan: Ñoqaqmi chaykunaqa, munakuwaqniykunaq pago qowasqanmi, nispa. Chaykunatan qoraq tukusqan chakraman tukuchisaq, hinan salqa uywakuna chayta mikhunqa.

¹³Hinaspan payta muchuchisaq Baal nisqa diospaq fiestata ruwasqanmanta. Chay fiestakunapin sacrificiota Baalpaq ruphachirqan. Hinallataq achalakunawan anillokunawan churakuspa munakuqninkunata qatikurqan, ñoqatataq ichaqa qonqapuwarqan. Ñoqa Señor Diosmi chaytaqa nini.

¹⁴Ñoqan paypa sonqonta suwasaq, hinaspan ch'inneqman pusasaq, chaypin misk'itapuni rimaykusaq.

¹⁵Hinamantataq uvas chakrankunata payman kutichipusaq, Akor wayq'otapas suyukuna punkumanmi tukuchisaq. Chaypin payqa sipasllaraq kashaspan k'askakuwasqanta hina k'askakapullawanqataq, Egiptomanta lloqsimpusqan p'unchaypi hina.

¹⁶Chaypachan: Qosay, niwanqa, manañataqmi: Baalníy[2], niwanqachu. Ñoqa Señor Diosmi chaytaqa nini.

¹⁷“Baal” nispa rimaynintan chinkachipusaq, manañataqmi hayk'aqpas chay sutita rimarinqachu.

¹⁸Chay p'unchaykunapin Israel llaqtapaq rimanakusaq salqa uywakunawan, phalaq animalkunawan mach'aqwaykunawan ima. Chinkachisaqmi kay suyupi wach'ina p'eqtatapas, espadatapas, hatun maqanakuytapas, chhaynapi llaqtayqa mana imanasqalla kakunanpaq.

¹⁹Israel llaqta, ñoqan qanwan wiñaypaq casarakusaq, chaninninpin qanwan casarakusaq, sumaqtan uywasqayki, mana p'itiytan munakusqayki khuyapayasqaykipas.

²⁰Qanwan casarakuspaymi hunt'aq qanpaq kasaq, chaypachan ñoqa Señor Diosta reqsiwanki.

²¹Ñoqa Señor Diosmi nini: Chay p'unchaykunapin llaqtaypa mañakusqanta uyarimusaq. Ñoqan hanaq pachamanta hallp'a pachaman parachimusaq,

²²hallp'a pachataq ruruchinqa trigota, uvasta, olivotawan, chaykunan Jezreelman qomusqa kanqa.

²³Ñoqan llaqtayta kay hallp'api serviwananpaq takyachisaq. “Mana Munasqa” nisqatan khuyapayasaq, “Mana Llaqtaychu” nisqatan: Qanmi llaqtay kanki, nisaq, paytaq: ¡Qanmi Diosniy kanki! niwanqa, nispa.