Read Quechua Cuzco Bible 1988 OSEAS 6 Bible Online

OSEAS 6 - Quechua Cuzco Bible 1988 bible

OSEAS 6

¹Israel runakunan ninku: Haku Señor Diosman kutirikapusunchis. Paymi llik'irqariwarqanchis, payllataqmi qhaliyachiwasunchispas, paymi k'iriwarqanchis, payllataqmi k'irinchista watawasunchispas.

²Iskay p'unchay qhepatan kawsarichiwasunchis, kinsakaq p'unchaypin sayarichiwasunchis, paypa qayllanpitaqmi kawsasunchispas.

³Señor Diosta reqsisun, paytaqa reqsillasunpuni. Imaynan pachaqa illarimunqapuni, chay hinan Señor Diosqa chayamuwasunchispuni, imaynan paraqa qhepatapas ñawpaqtapas hallp'aman paramunpuni, chay hinan Señor Diosqa chayamuwasunchispuni, nispa.

⁴Señor Diosmi nin: Efraín llaqta, ¿imanasqaykitaq? Judá llaqta, ¿imanasqaykitaq? Munakuwasqaykichisqa pacha phuyu hinallan, chinkaripuq pacha paqar sulla hinallan.

⁵Chayraykun qankunatapas profetakunawan ñut'uchirqaykichis, simi rimarisqaykunawanmi wañuchirqaykichis. Imaynatachus kawsanaykichista munasqaymi k'anchay hina rikhurimun:

⁶Khuyapayakuq kanaykichistan munani, sumaq kawsay sacrificiokunataqa manan munanichu, ruphachina sacrificiokunataqa manan munanichu, aswanpas ñoqata reqsiwanaykichistan munani.

⁷Paykunan ichaqa rimanakusqayta Adán nisqa llaqtapi sarunchakurqanku, chaypin wasanchawarqanku.

⁸Galaad llaqtaqa runa wañuchiqkuna hunt'an, mana chanin ruwaqkunaq llaqtanmi.

⁹Imaynan suwakunaqa pitapas suyapanku, ahinatan sacerdote t'aqapas Shehem ñanpi runata wañuchinku, chay hinata ruwasqankuqa p'enqan.

¹⁰Israel suyupin millay qhellita rikurqani, chaypin Efraín runakunaqa wasanchashallankupuni, Israel runakunaqa qhellichakunkun.

¹¹Yaw Judá, ñan qanpaqpas muchunayki p'unchayta unanchaniña. Llaqtayta wakmanta t'ikarichiqtiymi,