Read Quechua Cuzco Bible 1988 OSEAS 7 Bible Online

OSEAS 7 - Quechua Cuzco Bible 1988 bible

OSEAS 7

¹Israel llaqtayta hampichiqtiymi, paykunaq huchallikusqanku rikhurin, Samaria llaqtaq mana chanin ruwasqan rikhurin. Paykunaqa q'otushallankupunin, wasikunamanmi suwakuq haykunku, callekunapitaq runakunata ch'utinku.

²Ichaqa manan sonqonkupi reparankuchu tukuy mana chanin ruwasqankuta yuyayniypi hap'ishasqayta. Kunanqa ruwasqankun paykunata mat'iykushan, chaykunataqa qhawashallanipunin.

³Millay ruwasqankuwanmi reyta kusichinku, llullakusqankuwantaqmi uma runakunatapas kusichinku.

⁴Llapallankun wasanchaqkuna hina wasanchanku. Hornopi pisillata rawraq nina hinan kanku, masa chapusqaq poqonankama t'anta masaqqa mana allintachu rawrachin, chay nina hinan lep'eqenku.

⁵Reyninkuq hatun p'unchayninpin uma runankunaqa vinowan loqheyanku, reytaq asipayaqkunaman k'askakun.

⁶Contranpi yuyaykuspankuñan payman qayllaykunku, sonqonkun horno hina, tutantin pisillata rawran, tutamantataq qallusparaq rawraykushan.

⁷Llapallankun horno hina qanqeshanku, kamachiqninkutapas oqoykunkun. Sapanka reyninkun urmaytakama urmanku, manataqmi mayqenninkupas waqyakamuwanchu.

⁸Efraín runakunan llaqtakunaman chhaqrukapunku, Efraín runakunan huk uyan ruphasqa t'anta hina kapunku.

⁹Wak llaqtayoqkunan kallpanta mikhurqan, paytaq mana chayta reparanchu. Soqo umallañan kapurqan, paytaq mana chayta reparanchu.

¹⁰Israel runakunaq anchaykachayninkun paykuna contra rimarin, chaypas manan ñoqa Apu Señor Diosninkuman kutirikamuwankuchu, manan maskhallawankupaschu.

¹¹Efraín llaqtaqa urpi hinan, mana qhawarikuqmi mana yuyayniyoqmi, Egipto suyutan waqyakurqan, Asiria suyumanmi asuykurqan.

¹²Chayman rishaqtinkuqa, llikaytan paykunaman wikch'usaq, phalaq animalkunata hinan paykunata urmachisaq, huñunakusqankuta uyarispaymi paykunata hap'isaq.

¹³Paykunaqa ñoqamantan t'aqakurqanku, ¡imaynaraqmi kanqaku! Paykunaqa awqaymi sayarirqanku, chaymi wañuchisqa kanqaku. Ñoqan paykunata kacharichiyta munayman, paykunataq ichaqa ñoqa contra llullakunku.

¹⁴Manan tukuy sonqochu waqyakamuwarqanku, aswanpas puñunankupin yanqalla anchishanku, trigota vinota mañakunapaqmi mana iñiyniyoqkuna hina cuerponkuta kuchukunku. ¡Awqaymi sayaripushanku!

¹⁵Ñoqaña paykunata yachachirqani kallpacharqani chaypas, paykunaqa ñoqa contran mana allinkunata yuyaykunku.

¹⁶Mana valeq diosmanmi rinku, mana allin wach'i t'iwkachiq q'ewisqa p'eqta hinan kanku. Hatunchakuspa rimasqanku hawan uma runankutaqa espada wañuchinqa, chaymi Egipto suyupi paykunataqa asipayanqaku, nispa.