Read Quechua Cuzco Bible 1988 OSEAS 9 Bible Online

OSEAS 9 - Quechua Cuzco Bible 1988 bible

OSEAS 9

¹Israel runakuna ama kusikuychischu, ama Diospi mana iñiyniyoqkuna hina q'ochukuychischu. Diosniykichismanta t'aqakuspaykichismi qhellipi purirqankichis, Trigo saruchinakunapi qhellipi purisqaykichismantan pago chaskiykusqaykichiskunata munarqankichis.

²Trigoykichispas aceiteykichispas manan mikhunaykichispaq kapunqachu, upi vinoykichispas manan kapunqachu.

³Manan Señor Diospa suyunpi tiyankichisñachu, aswanmi Efraín runakunaqa Egipto suyuman kutinkichis, Asiria suyupitaq mana mikhuna qhelli mikhunata mikhunkichis.

⁴Manan vino ofrendakunata Señor Diosman hich'ankichischu, manan sacrificiokunatapas payman haywankichischu. Chay sacrificiokunapas ayaq kasqanpi mikhuna hinan kanman, pipas chayta mikhuqqa qhellichakunmanmi. Mikhunaykichisqa yarqaynillaykichispaqmi kanqa, manan Señor Diospa wasinman apaykunkichischu.

⁵¿Imanankichistaq raymi p'unchaypi? ¿Imanankichistaq Señor Diospa fiesta p'unchayninpi?

⁶¡Uyariychis! Muchunamanta ayqeshaqtiykichispas Egipto runakunan hap'isunkichis Menfis llaqtapin p'ampasqa kankichis. Qolqe illaykichistan kisa p'ampaykunqa, tiyanaykichispitaq khiska wiñaykunqa.

⁷Muchuna p'unchaykunañan chayamun, ayni-kutichina p'unchaykunañan chayamun. Israel suyun chayamusqantaña yachanqa. Qankunan ninkichis: Profetaqa mana yuyayniyoqmi, Diospa yuyaychasqan runaqa waq'an, nispa. Hucha q'epin kankichis, chaymi sinchita cheqnikuwankichis.

⁸Efraín runakunata qhawanaypaqmi Diosqa ñoqa profetanta churawan, qankunan ichaqa tukuy ñanniykunapi urmachiyta munawankichis, Diospa wasinpipas ñoqataqa cheqnikuwankichismi.

⁹Gabaa llaqtapi sucedesqanta hinan sinchitapuni waqllipurqankichis. Señor Diostaqmi mana chanin ruwasqaykichista yuyarinqa, hinaspan huchallikusqaykichismanta muchuchisunkichis, nispa.

¹⁰Señor Diosmi nin: Israelta chayllaraq tarishaspayqa ch'inneqpi uvastapas tarishayman hinan karqan, ñawpaq rikhuriq higosta hinan machulaykichiskunataqa rikurqani. Ichaqa Baal-peorman chayaspankun Baal nisqa diosman sonqollikurqanku, chay munakusqanku ídolo hinan ancha millakuyman tukupurqanku.

¹¹Efrainpa hatun-kayninqa urpi hinan phalaripunqa, manañan kanqachu naceqkunapas, wiksallisqakunapas, wiksapi kamakuqkunapas.

¹²Wawankutaña uywanqaku chaypas, ñoqan llapallanta wañuchisaq, ¡Imaynaraqmi paykunaqa kanqaku paykunamanta t'aqakuqtiy!

¹³Ñoqan Efrainta rikurqani Tiro llaqta hina munay patapi sayarichisqata, chaywanpas wawankunataqa wañuchinapaqmi horqomunqa, nispa.

¹⁴Señor Diosníy, paykunaman qoy ... ¿Imatan qonki? Wiksankuta sulluqman tukuchiy, ñuñunkutapas ch'alqe ñuñuman tukuchiy.

¹⁵Señor Diosmi nin: Gilgalpin mana chanillantapuni ruwashanku, chaymi paykunata chaypi cheqnikuni. Millaykunata ruwasqankumantan wasiymanta paykunata qarqosaq, manañan paykunata munakusaqchu. Llapa umallinkunaqa ñoqa contra sayariqkunan.

¹⁶Efraín runakunaqa polvillo onqoyniyoq mallki hinan, ch'akisqa saphiyoqkunan, manañan rurupunkuchu. Wawayoqña kanku chaypas, ñoqan luylusqa wawankuta wañuchisaq, nispa.

¹⁷Diosniymi paykunata wikch'unqa, manan Dios kasuyta munarqankuchu. Hatun suyukuna ukhupitaqmi tumaqaya purinqaku.