Read Quechua Cuzco Bible 1988 JOEL 2 Bible Online

JOEL 2 - Quechua Cuzco Bible 1988 bible

JOEL 2

¹Señor Diosmi nin: Sión orqopi putututa tocaychis, ch'uya orqoypi waqrata waqachiychis awqakuna hamushasqanta willanapaq, nispa. Arí, Judá suyupi llapa tiyaqkuna khatatatachunku, Señor Diospa muchuchinan p'unchay chayamushasqanrayku. Chay p'unchayqa asuykamushanñan,

²tutayaq laqhayaq p'unchaymi kanqa, yana phuyu llanthu p'unchaymi kanqa. Langostakunaqa askhallaña kallpasapa soldadokuna hinan hamunku, chaykunaqa tutayaykuy hinan orqo patakunaman mast'arikamunku, manan hayk'aqpas chay hinaqa karqanchu, manallataqmi hayk'aqpas chay hinaqa kanqachu.

³Ñawpaqenkupi kaqtapas qhepankupi kaqtapas nina hinan tukurparinku. Manaraq chayamushaqtinkuqa Edén huerta hinan hallp'aqa, ripuqtinkutaq ch'inneq hina ch'usaq kapun, llapachallantan chaykunaqa mikhurqapun.

⁴Caballomanmi rikch'akunku, awqa-tinkuypi caballokuna hinan phawanku,

⁵orqo patakunaman p'itaspankuqa awqa-tinkuypi carretakuna hinan raqhaqenku, rastrojota ruphaykuq nina rawray hinan p'araqenku, maqanakunapaq wachuchakuq kallpasapa soldadokuna hinan kanku.

⁶Runakunan chaykunata qhawarispa khatatatanku, llapallankun q'ellumanraq tukunku.

⁷Awqa-tinkuyman phawaq soldadokuna hinan langostakunaqa phawanku, awqa-tinkuq runakuna hinan perqata seqanku. Sapankan wachuchasqa purin, manataq mayneqmanpas q'ewirinchu.

⁸Manan paykunaqa tanqanakunkuchu, sapankan purinanta purin, yarqha patantan pasanku, manataqmi wachuchakusqankuta rawinkuchu.

⁹Llaqtamanmi phawaykunku, perqa patantan phawanku, wasikunamanmi wichanku, suwa hinan ventananta haykunku.

¹⁰Ñawpaqenkupin hallp'a pacha khatatatan, hanaq pachan chukchun, intipas killapas tutayanmi, ch'askakunapas manan k'anchamunchu.

¹¹Señor Diosmi ejercitonpa ñawpaqenpi kunununuspa kamachikun, mana yupay atinan soldadokunaqa, kallpasapallañan kamachikusqanta hunt'aqkunaqa, hatunmi sinchi manchanataqmi Señor Diospa muchuchinan p'unchayqa, ¿pitaq chaytaqa muchunman?

¹²Señor Diosmi nin: Kunanqa tukuy sonqoykichiswan kutirikamuwaychis ayunaspa, waqaspa, llakikuspa ima, nispa.

¹³Llakikuyta rikuchinaykichispaq p'achaykichista qhasunaykichistaqa tukuy sonqoykichiswan llakikuychis. ¡Apu Señor Diosniykichisman kutirikuychis! Payqa sumaq sonqon, llakipayakuqmi, mana usqhay phiñakuqmi, mana p'itiy munakuqmi, muchuchiyta chayachimunantapas hoqarikapuyta munaqmi.

¹⁴Ichapaschá payqa huktaña yuyaykapunqa, hinaspa khuyapayasunkichis, sumaq cosechawantaq saminchasunkichispas. Hinan qankunaqa chakraq rurasqantapas vinotapas Apu Señor Diosniykichisman haywayta atiwaqchis.

¹⁵Sión orqopi putututa tocaychis, Diospa qayllanpi ayunanapaq llaqta runakunata kamachiychis, Diosmanta mañakunapaq runakunata huñuykuychis.

¹⁶Runakunata huñuychis, hinaspa ancha chaninpaq qhawariychis. Machu runakunata huñuychis, erqekunata ñuñuq wawakunatapas huñuychis. Chayllaraq casarakuqkunapas puñuna wasimanta lloqsimuchunku, huñunakuyman richunku.

¹⁷Yupaychana wasiq ukhukaq pationpi altar qayllapi Señor Diosta serviq sacerdotekuna waqaspa mañakuchunku: Señor Diosnillayku, runaykikunata khuyapayaykuy, ama llaqtaykita k'aminapaq hap'iykachiychu, ama wak suyukuna paykunamanta asikuchunkuchu, llaqtakunapas ama nichunkuchu: ¿Maytaq Diosninkuri? nispa, nispanku.

¹⁸Señor Diosqa hallp'anmantan wañurqanraq, llaqtan runakunatan llakipayarqan,

¹⁹chaymi Señor Diosqa paykunaman kutichimurqan: Qosqaykichismi trigotapas, vinotapas, aceitetapas, chaykunawanmi saksaykunkichis, manañan hayk'aqpas wak suyukuna qankunamanta asikunqañachu.

²⁰Wichaymanta wakwamuq langostatan qayllaykichismanta karunchasaq, hinaspan chaykunata ch'aki hallp'a ch'inneqman wikch'usaq. Ñawpaq puriqkunatan inti lloqsimuy Kachi Qochaman wikch'uykusaq, qhepa puriqkunatataq inti haykuy mama qochaman wikch'uykusaq, chaykunapin ismurispa asnarinqaku, qankunata muchuchisqasuykichismantan langostakunata chay hinata ruwasaq, nispa.

²¹Hallp'alláy ama manchakuychu, Señor Diospa musphanakunata ruwasqanmanta kusikuy q'ochukuy.

²²Salqa animalkuna, ama manchakuychischu, q'achu pampakunan q'omeryarinña, sach'akunan rururinña, higos sach'apas uvas yurapas rurusapañan.

²³Sionpi tiyaqkuna, kusikuychis, Apu Señor Diosniykichispa ruwasqanmanta q'ochukuychis. Paymi chaninchasqaña kasqaykichista rikuchinapaq ñawpaqkaq paratapas qhepakaq paratapas chayachimusunkichis, imaynan unay watakunata parachimurqan hinata.

²⁴Erakunan trigo hunt'a kanqa, vino waqaychanakunapas aceite waqaychanakunapas llimp'arinqan.

²⁵Señor Diosmi nin: Ñoqan qankuna contra chayachimurqani ejercitota hinaraq langostakunata, hinan wakwamuspa hatun langosta, langosta uña, wak langostakunapas llapallanta mikhuspa tukurqan, kunantaq chay watakunapi langostaq mikhusqankumanta kutichipusqaykichis.

²⁶Saksanaykichiskaman mikhunkichis, hinaspa ñoqa Apu Señor Diosniykichista yupaychawankichis, ñoqan ancha musphanakunata ruwapurqaykichis. Manañan hayk'aqpas qankunaqa p'enqachisqachu kankichis,

²⁷hinaspan yachankichis qankunawan kashasqayta, ñoqaqa Apu Señor Diosniykichis kasqayta, manataq wak diosqa kasqantapas. ¡Manañataqmi hayk'aqpas llaqtay Israelqa p'enqachisqachu kanqa!

²⁸Chaykuna qhepatan llapa runaman Espirituyta kachaykamusaq, hinan churiykichiskunapas ususiykichiskunapas sutiypi willakunqaku, machu runaykichiskunapas mosqokunqaku, wayna churiykichiskunapas rikhuriykunatan rikunqaku.

²⁹Chay p'unchaykunapiqa Espirituytaqa kachaykamullasaqtaqmi qhari kamachiykunamanpas warmi kamachiykunamanpas.

³⁰Hanaq pachapipas kay pachapipas musphanakunatan rikhurichisaq, runakunan wañuchinakunqaku, llaqtakunan ruphaykachisqa kanqa, q'osñin putuminqa.

³¹Ñoqa Señor Diospa manchana hatun p'unchayniy manaraq chayamushaqtinmi inti tutayanqa, killataq yawar pukaman tukunqa, nispa.

³²Señor Diospa prometekusqanman hinan Sión orqopi pakaykukuna kanqa, paypa akllakusqankunan Jerusalenpi qespichisqa qhepanqaku, chaymi pipas Señor Diosmanta yanapayta mañakuqqa qespichisqa kanqa.