Read Quechua Cuzco Bible 1988 JOEL 3 Bible Online

JOEL 3 - Quechua Cuzco Bible 1988 bible

JOEL 3

¹Señor Diosmi nin: Judá suyutapas Jerusalén llaqtatapas wakmantan t'ikarichisaq,

²chay p'unchaykunapin llapa hatun suyukunata huñuykamusaq, hinaspan chaykunata Diospa Juzganan Wayq'o nisqaman uraykachisaq. Chaypin paykunata juzgasaq kaqniy Israel llaqtayta mana allinta ruwasqankumanta. Paykunan Israel runakunata hatun suyukuna ukhuman ch'eqechirqanku, hinaspan hallp'ayta paykuna rakinakurqanku.

³Llaqtay runakunapaqmi sortearqanku, rabona warmiwan puñuyta munaspan qhari wawakunata pagarqanku, vino ukyayta munaspan warmi wawakunata qorqanku.

⁴Yaw Tiro llaqta, yaw Sidón llaqta, yaw Filistea suyu, ¿imanaytan munawankichis? ¿Aynita kutichiwaytachu munankichis? Aynita kutichiwaqtiykichisqa ruwawasqaykichismantan usqhaylla muchuchisqaykichis.

⁵Qankunan qolqeytapas qoriytapas suwawarqankichis, yupaychana wasiykichiskunamanmi aswan chaniyoq kaqniykunatapas aparqankichis.

⁶Judá runakunatapas Jerusalén runakunatapas Grecia suyu runakunamanmi venderqankichis, ahinapin hallp'ankumanta karuncharqankichis.

⁷Kayqa, maymanchus vendesqaykichismantan ñoqa paykunata pusampusaq, hinaspaymi qankunatapas kaqllatataq muchuchisqaykichis.

⁸Churiykichiskunatapas ususiykichiskunatapas Judá runakunamanmi vendesaq, paykunataq karupi kaq Sabá suyu runakunaman vendenqaku. Ñoqa Señor Diosmi chayta nini.

⁹Kayta hatun suyukuna ukhupi willariychis: Yaw hatun suyukuna, ¡awqa-tinkuypaq wakichikuychis! ¡Kallpasapakunata sayarichiychis! ¡Maqanakuqkuna hamuchunku hinaspa maqaq phawaykuchunku!

¹⁰Rejaykichista takaspa espadata ruwakuychis, ichhunaykichismantataq lanzata ruwakuychis. Pisi kallpayoqpas nichun: ¡Kallpasapan kani! nispa.

¹¹Muyuriq llapallan hatun suyukuna, usqhamuychis, hinaspa chayman huñukamuychis, nispa. ¡Señor Diosnilláy, paykunata maqanankupaq kallpasapaykikunata kachamuy!

¹²Señor Diosmi nin: Hatun suyukuna sayarichunku, hinaspa Diospa Juzganan Wayq'o nisqaman uraykuchunku, chaypin tiyaykusaq muyuriq llapa hatun suyukunata juzganaypaq.

¹³Millay ruwasqankuqa sinchiyaykunmi, chayrayku poqosqaña trigota hina ichhuychis, hamuychis, sarunapi hunt'a uvasta hina paykunata saruychis, vino waqaychana t'oqokunapas llimp'arichun, nispa.

¹⁴¡Aqo t'iyu hinan runaqa Juzgana Wayq'o nisqapi kashanqa! Señor Diospa muchuchinan p'unchaymi chayamushan, chay wayq'opin paykunata taripanqa.

¹⁵Intipas killapas tutayaykunmi, ch'askakunapas laqhayaykunmi.

¹⁶Señor Diosmi Sión orqomanta manchakuyta qaparimun, Jerusalenmantan kunununumun, hinan hanaq pachapas kay pachapas khatatatan. Señor Diosmi ichaqa llaqtanpa pakakunan kanqa, Israel runakunaq pukaran kanqa.

¹⁷Señor Diosmi nin: Chay qhepatataq yachankichis ñoqaqa Apu Señor Diosniykichis kasqayta, ch'uya orqoy Sionpi tiyasqaytapas. Ch'uyan Jerusalenqa kanqa, manañan chaynintaqa wak llaqtayoqkuna purinqachu.

¹⁸Chay p'unchaykunan orqokunamanta upi vino phawamunqa, moqokunamantan leche lloqllarimunqa, Judapi llapa k'ahakunatataq unu phawamunqa. Yupaychana wasiymantan unu pukyu phullpumunqa, chaymi Acacia Sach'ayoq Wayq'o nisqata qarpanqa.

¹⁹Egipto suyun purunyachisqa kanqa, Edom suyutaq ch'inneqman tukuchisqa kanqa Judá runakunata millayta maqasqankurayku, hallp'ankupi mana huchallikuqta wañuchisqankurayku.

²⁰Ñoqan wañuchisqankumanta aynita kutichisaq, huchallikuqtaqa manan pampachasaqchu. Judá suyun ichaqa wiñaypaq tiyaqniyoq kanqa, Jerusalenpas tiyaqnillayoqpunin kanqa, ñoqa Señor Diostaq Sionpi tiyasaq, nispa.