Read Quechua Cuzco Bible 1988 AMÓS 2 Bible Online

AMÓS 2 - Quechua Cuzco Bible 1988 bible

AMÓS 2

¹Señor Diosmi nin: Moab runakunaqa sinchitañan huchallikun, paykunataqa muchuchisaqpunin, Edom reypa tullunkunatan ruphaykachirqan usphayachinankama.

²Chaymi Moab suyuta ninawan hap'iykachisaq, Kiriotpi qhapaq wasikunatataq ruphaykunqa. Hinan Moabqa awqa-tinkuy qaparkachaypi pututupas waqashaqtin wañunqa.

³Moab kamachikuqtan wañuchisaq, hinallataq llapa uma runakunatapas, nispan nin Señor Diosqa.

⁴Señor Diosmi nin: Judá runakunaqa sinchitañan huchallikun, paykunataqa muchuchisaqpunin, yachachikuyniykunatan qhawarparirqanku, manataq kamachikuy simiykunata kasukurqankuchu, aswanpas tayta-mamankuq yupaychasqan idolokunata yupaychaspa pantapurqanku.

⁵Chaymi Judá suyuta ninawan hap'iykachisaq, Jerusalenpi qhapaq wasikunatataq ruphaykunqa, nispa.

⁶Señor Diosmi nin: Israel runakunaqa sinchitañan huchallikun, paykunataqa muchuchisaqpunin, chanin runatan qolqeman vendenku, wakcha runatataq iskay usut'aman chhalanku.

⁷Mana piniyoqkunatan sarunchakunku, huch'uyyaykukuqpa uyarichikusqantapas hark'anku. Churipas taytapas kaq sipasllamanmi suchuykunku, chhaynatan ch'uya sutiyta qhellichanku.

⁸Prendasqa p'acha patapin mayqen altar qayllapipas t'inkikunku. Multa sik'isqa vinotataqmi diosninkuq wasinpi ukyanku.

⁹Ñoqataq ichaqa ñawpaqenkupi Amor runakunata wañurqarichirqani, sayayninkun cedro sach'a hina karqan, encina sach'a hinataq ch'ilallaña, ñoqataq k'allmankunatapas p'akirqarirqani, saphinkunatapas t'irarqarirqani.

¹⁰Qankunataqa Egipto suyumantan horqomurqaykichis, hinaspan tawa chunka watantin ch'inneqninta purichimurqaykichis, Amor runakunaq hallp'anta hat'allinaykichispaq.

¹¹Wakin churiykichistan profetata sayarichirqani, wakin waynaykichistataq Nazir[1] nisqa runay kananpaq t'aqakurqani Israel runakuna, ¿manachu chayqa chay hina?

¹²Qankuna ichaqa Nazir runaykunaman vinota ukyachirqankichis, profetakunatataq: Ama profetizaychischu, nirqankichis.

¹³Kunanqa ñoqan pampaman ñit'iykusqaykichis, imaynan winay q'epintin carretaqa pampata ñit'iykun hinata.

¹⁴Usqhaylla phawaqpas manan ayqeyta atinqachu, kallpasapatapas manan kallpanqa yanapanqachu, qharillaña kaqpas manan qespichikunqachu.

¹⁵P'eqtawan wach'iqpas manan chutayta atinqachu, usqhaylla phawaqpas manan qespichikunqachu, caballopi sillakuqpas manan qespichikunqachu.

¹⁶Chay p'unchaypiqa aswan qharillaña kaqpas mana imantinmi ayqekunqa, nispan nin Señor Diosqa.