Read Quechua Cuzco Bible 1988 AMÓS 3 Bible Online

AMÓS 3 - Quechua Cuzco Bible 1988 bible

AMÓS 3

¹Israel runakuna, qankuna contra Señor Diospa rimasqanta uyariychis, Egipto suyumanta horqomusqan llaqta contra paypa rimasqanta uyariychis. Paymi nin:

²Kay pacha llapa llaqtakunamantaqa qankunallatan akllakurqaykichis, chaymi tukuy mana allin ruwasqaykichiskunamanta muchuchisqaykichis, nispa.

³Purinankupaq mana rimaykunakuspalla, ¿iskay runaqa ch'inneqpi kuska purinmanchu?

⁴Mana mikhunata hap'ispalla, ¿leonqa hatun yunkapi qaparinmanchu? Mana imatapas hap'ispalla, ¿uña leonqa t'oqonmanta qaparimunmanchu?

⁵Mana sipita kaqtin, ¿phalaq animalqa sipitapi urmanmanchu? Mana imatapas hap'ispalla, ¿toqllaqa pampamanta t'iwkanmanchu?

⁶Llaqtapi pututu mana waqaqtinqa, ¿runakuna mancharikunmanchu? ¿Ima mana allinpas llaqtapi kanmanchu Señor Diospa mana chayachimusqan?

⁷Manan, manapunin Señor Diosqa imatapas ruwanchu yuyaykusqanta kamachin profetakunaman manaraq willashaspanqa.

⁸¡Leonmi qaparinña! ¿Pitaq mana mancharikunmanchu? ¡Señor Diosmi rimarinña! ¿Pitaq mana profetizanmanchu?

⁹Asdod qhapaq wasikunapi willamuychis, hinallataq Egipto suyu qhapaq wasikunapipas: Samaria orqokunaman huñunakamuychis, hinaspa chaypi ch'aqwaykunata rikuychis, hinallataq chay ukhupi alqochakuykunatapas, nispa.

¹⁰Señor Diosmi nin: Manan chaninkaqta ruwayta yachankuchu, qhapaq wasinkupin qechusqatapas llat'anasqatapas huñunku.

¹¹Chayraykun suyuntinta huk awqa muyuykunqa, hinaspan pukaraykita thuninqa, qhapaq wasiykikunatapas llat'ananqa, nispan nin Qollana Señor Diosqa.

¹²Señor Diosmi nin: Imaynan michiqqa leonpa siminmanta ovejaq iskay chakinta qechun, otaq ninri puchullantapas, chay hinan Samariapi tiyaq Israel runakunaqa pisilla qhepanqaku, Damascomanta apamusqa sumaq puñunapi chutarayaqkunapas, nispa.

¹³Tukuy-atiyniyoq Señor Diosmi nin: Uyariychis, Jacobpa ayllun contra testigo kaychis.

¹⁴Huchallikusqankumanta Israelta muchuchisqay p'unchaypin Betelpi kaq altarkunata thunisaq, altar waqrakunapas willusqan kanqa, pampamantaq t'akarikunqa.

¹⁵Thunisaqmi chiraw mitapaq wasitapas q'oñi mitapaq wasitapas, thunisaqmi marfilwan[2] sumaqchasqa wasikunatapas, purunyachisaqmi chay munay wasikunatapas, nispan nin Señor Diosqa.