Read Quechua Cuzco Bible 1988 AMÓS 4 Bible Online

AMÓS 4 - Quechua Cuzco Bible 1988 bible

AMÓS 4

¹Señor Diosmi nin: Kay simita uyariychis, Samariapi tiyaq warmikuna. Qankunan Basanpi wirayaykuq wakakuna hina kankichis, qankunan mana piniyoqkunata sarunchankichis, qankunan wakchakunatapas muchuchinkichis, qankunan qosaykichista kamachinkichis: Vinota haywawayku, machasaqku, nispa.

²Señor Diosmi ch'uya-kayninman hina jurarqan: P'unchaykunan chayamushasunkichisña ganchokunawan apanasuykichispaq, llapallaykichista anzuelowan aysanasuykichispaq.

³Hinan qati-qatilla q'asankunata lloqsinkichis, Hermón orqoneqmanmi qarqosqa kankichis, nispan nin Señor Diosqa.

⁴Qollana Señor Diosmi nin: Betelta riychis huchallikamunaykichispaq, Gilgalpi astawan Dios contra sayarimuychis, sapa paqar sacrificioykichiskunata apaychis, sapa kinsa p'unchaymanta diezmoykichistapas qoychis.

⁵Agradecekuypaq qonchuyoq t'antata ruphachiychis, hinantinpi willakamuychis tukuy sonqo ofrenda haywasqaykichista. ¡Chaypunin qankunamanqa gustasunkichis!

⁶Llapa llaqtaykichispin ñoqaqa yarqayta muchuchirqaykichis, llapa llaqtaykichispin ñoqaqa mikhunaykichista pisiyachirqani, chaypas manan kutirikamuwarqankichischu.

⁷Cosechapaq kinsa killaraq kashaqtinmi mana parachimurqaykichischu. Huk llaqtamanmi parachimurqani, hukkaq llaqtamantaq mana parachimurqanichu. Huk chakramanmi paramurqan, hukkaq chakramantaq mana paramurqanchu, hinan ch'akipurqan.

⁸Chaymi iskay kinsa llaqtakuna huk llaqtaman unu ukyaq thamarqanku, ch'akiyninkutaqa manataq thasnukurqankuchu, chaypas manan kutirikamuwarqankichischu.

⁹Ruphashaq wayrawanmi polvillowanmi muchuchirqaykichis, huertaykichistapas uvas chakraykichistapas naq'echirqanin, higos sach'aykichistapas olivo sach'aykichistapas langostan mikhuykurqan, chaypas manapunin kutirikamuwarqankichischu.

¹⁰Egiptoman hinan muchuchiqta chayachimurqaykichis, awqa-tinkuypin waynaykichiskunata wañuchirqani, caballoykichiskunatapas awqawan hap'ichirqani, karpa-karpaykichispi ayakunaq asnaynintapas muskhichirqaykichis, chaypas manan kutirikamuwarqankichischu.

¹¹Sodomatan Gomorratan thunirqani, chay hinatan qankunatapas thunirqaykichis, chaymi kanaykusqamanta sansashaq k'ullu hina horqosqa karqankichis, chaypas manan kutirikamuwarqankichischu.

¹²Chayrayku, Israel llaqtalláy, qantaqa muchuchisqaykin, chay hinatataq ruwasqayki chayqa, ñoqa Diosniykiwan tupanaykipaq wakichikuy, nispan nin Señor Diosqa.

¹³Qhawariy, Diosmi orqokunatapas ruwarqan, wayratapas kamarqan, yuyaykusqankunatapas runaman willan, pacha paqarimuqtapas laqhayaqman tukuchin, hallp'a pachaq orqo patankunatan purin. Señormi, Tukuy-atiyniyoq Diosmi sutinqa.