Read Quechua Cuzco Bible 1988 AMÓS 5 Bible Online

AMÓS 5 - Quechua Cuzco Bible 1988 bible

AMÓS 5

¹Israel runakuna, simiykunata uyariychis, qankunamanta kay harawisqayta uyariychis:

²Ch'uya sipas Israelmi urmaykapun, manañan astawanpas sayarinñachu. Pampapin wikch'urayapushan, manan pipas sayarichiqnin kanchu, nisqayta.

³Qollana Señor Diosmi Israel llaqtata nin: Waranqa runawan hatun maqanakuyman lloqsiq llaqtaqa pachakllawanñan kutimpunqa, pachakwan lloqsiq llaqtapas chunkallawanñan kutimpunqa.

⁴Asuykamuwaychis, kawsankichismi.

⁵Ama Betelman asuykuychischu, amataq Gilgata riychischu, amallataq Beersebamanpas uraykuychischu. Gilgalpi tiyaqkunaqa preso apasqapunin kanqa, Betel llaqtapas thunisqan kanqa, nispa.

⁶Chhaynaqa Diosman asuykuychis, kawsankichistaqmi, paqtan Josepa ayllunta nina hina ruphaykunman, Betelpi mana pipas nina wañuchiq kaqtin.

⁷¡Imaynaraqmi kankichis chaninchaytapas ajenjota hina hayaman tukuchiqkuna! ¡Imaynaraqmi kankichis kuskachaytapas pisicharpariqkuna!

⁸Señor Diosmi Qototapas Hatun Cruztapas ruwaqqa, paymi laqhayaqta p'unchayman tukuchiqqa, p'unchaytapas laqhayaqman tukuchiqqa, paymi mama qocha unuta phuyuchimuqqa, hinaspa hallp'a pataman chayta ch'aqchuqqa. Paymi kallpasapakunata wañurqarichiqqa, pukarasqa llaqtatapas thunichiqqa. Paypa sutinqa Señor Diosmi.

¹⁰¡Imaynaraqmi kankichis juzganapi chanin rimaqta cheqnikuqkuna! ¡Imaynaraqmi kankichis cheqaqkaqta rimaqtapas millakuqkuna!

¹¹Qankunaqa mana piniyoqtan sarunchankichis, trigo llank'asqanku rurutapas sik'inkichis, chayrayku ch'eqosqa rumimanta wasikunata perqarqankichis chaypas, manan chaykunapi tiyankichischu, sumaq uvas yurakunata plantarqankichis chaypas, manan vinota ukyankichischu.

¹²Ñoqaqa yachanin askha kuti mana kasukusqaykichista, askhallataña huchallikusqaykichistapas. Yachanin chanin runata llakichisqaykichista, lluk'iykusqatapas chaskikusqaykichista, wakchakunaq juzganapi uyarichikusqanta waqllichisqaykichistapas.

¹³Chaymi allin yuyayniyoqqa upallakun, chay p'unchay mana allin kasqanrayku.

¹⁴Allinkaqta munaychis, amataq mana allinkaqtachu, hinan kawsankichis. Ahinapin Tukuy-atiyniyoq Señor Diosqa qankunawan kashanqa, imaynan nirqankichis hina.

¹⁵¡Mana allinkaqta cheqnikuychis! ¡Allinkaqta munakuychis! Juzganapipas maychus chaninchanallapuni kashachun, ichapas Tukuy-atiyniyoq Señor Diosqa Josepa ayllunmanta puchuqta khuyapayanman.

¹⁶Tukuy-atiyniyoq Señor Diosmi nin: Llapa plazakunapin waqay kanqa, llapa callekunapin sonqo nanay waqay kanqa. Chakrapi llank'apakuqkunatapas waqapakuqkunatapas waqanankupaq waqyanqaku.

¹⁷Llapa uvas chakrakunapin waqaykunqaku, ñoqaqa muchuchinaypaqmi chayamusqaykichis, nispan nin Señor Diosqa.

¹⁸¡Imaynaraqmi kankichis Señor Diospa chayamunallantaña munaqkuna! ¡Imaynataq qankunapaq chay p'unchayri kanqa? Laqhayaqmi kanqa, manataq k'anchaychu.

¹⁹Leonmanta ayqekushaspa ukumariwan tinkuq hinan kanqa, otaq wasinman haykushaspa perqaman tawnaykukuqtin mach'aqwaypa kanisqan hina.

²⁰Arí, Señor Diospa p'unchayninqa laqhayaqmi kanqa, manataq k'anchayniyoqchu, tutayaqmi kanqa, manataq k'anchayniyoqchu.

²¹Tukuy-atiyniyoq Señor Diosmi nin: Cheqnikunin, millakunin fiestaykichiskunataqa, manataqmi kusikusaqchu huñunakuyniykichiswanqa.

²²Ruphachina sacrificiotaña haywawankichis chaypas, manan chaykunataqa chaskisaqchu. Ofrendaykichistaqa manan qhawarillasaqpaschu, manallataq wirayachisqa animalniykichistapas allipunachiq sacrificioykichistapas.

²³Karunchawaychis yupa takiyniykichiskunata, arpaykichiskunaq waqasqantapas manan uyarisaqchu.

²⁴Aswanpas chaninchayqa unu hina hunt'a phawachun, kuskachaypas mana tukukuq mayu hina kachun.

²⁵Yaw Israel ayllu, ¿chayri ch'inneqpi tawa chunka watantinqa sacrificiokunatapas ofrendakunatapas haywawarqankichischu? Manan.

²⁶Kunanpas reyniykichis Sikut-tan ch'askaykichis Kiyutan ruwakusqaykichis idolokunatan wantunkichis.

²⁷Damasco llaqtaq haqayninkaman astachisqaykichis, nispa.