Read Quechua Cuzco Bible 1988 AMÓS 6 Bible Online

AMÓS 6 - Quechua Cuzco Bible 1988 bible

AMÓS 6

¹¡Imaynaraqmi kankichis Sionpi chutarayaqkuna! ¡Imaynaraqmi kankichis mana imatapas manchakuspa Samariapi tiyaqkuna! Aswan allin hatun suyupi uma runakunan kankichis, qankunamanmi Israel aylluqa phawarin.

²Riychis Kalne llaqtata, hinaspa qhawamuychis, chaymanta hatun Hamat llaqtata riychis, hinamantaq Filistea runayoq Gatman uraykuychis. Qankunari, aswan ¿allinchu chay llaqtakunamanta kankichis? Hallp'ankupas, ¿aswan hatunchu hallp'aykichismanta?

³Qankunaqa hatun llaki p'unchay chayamunanta mana kasurparinkichischu, chay hinapin mana chanin ruwayta suyupi t'ikarichishankichis.

⁴¡Imaynaraqmi kankichis marfilwan sumaqchasqa puñunakunapi puñuqkuna! ¡Imaynaraqmi kankichis munay tiyanakunapi aysarayaqkuna! Oveja t'aqamanta apamusqa borregokunatan mikhunkichis, hinallataq wirayachisqa torillokunatapas.

⁵Arpaq waqasqanpin takikunata paqarichinkichis, David hinan taki tocanakunata kamarinkichis.

⁶Qerukunapin vinota ukyankichis, ancha chaniyoq hawinakunawanmi hawikunkichis, manataq Josepa muchunanmantaqa llakikunkichischu!

⁷Chaymi kunanqa preso riqkunaq ñawpaqenta wak suyuman rinkichis, aycha kusichiqkunaq aysarayaynintaq tukukunqa, nispa.

⁸Qollana Señor Diosmi pay kikinpa sutinpi juran, Tukuy-atiyniyoq Señor Diosmi nin: Jacobpa anchaykachasqantan millakuni, qhapaq wasinkunatapas cheqnikunin, awqamantaqmi hap'iykachisaq, llaqtatapas chaypi ima hayk'a kaqtapas, nispa.

⁹Kay hinataq kanqa, chunka runachus huk wasipi qhepanqa chayqa, chunkantinmi wañunqa.

¹⁰Sinchipunin manchakuyqa kanqa, huk wawqechus mayqen ayatapas wasinmanta horqonanpaq hoqarishaspa, wasi ukhuman haykuqta ninqa: ¿Pipas qanwan kashanraqchu? nispa chayqa, hukninmi: Manan, nimunqa. Ñawpaqkaqtaq ninqa: ¡Upallay, paqtan Señor Diospa sutinta rimariwaq! nispa.

¹¹Señor Diosmi kamachikun, hatuchaq wasitapas t'oqorqarichin, huch'uykaq wasitapas q'asarqarichin.

¹²¿Caballokunaqa qaqa-qaqanta phawanchu? ¿Mama qochata torokunawan yapunkuchu? ¡Chaypas qankunaqa chaninchaytan venenoman tukuchirqankichis, kuskachaytapas ajenjoman tukuchirqankichis!

¹³Qankunaqa yanqan kusikunkichis Lodebar llaqtata llallisqaykichiswan, alabakunkichistaq Karnaim llaqtata atiyniykichiswan hap'isqaykichista.

¹⁴Allintapuni qhawariy, Israel ayllu, Tukuy-atiyniyoq Señor Diosmi nin: Qankuna contran huk hatun suyuta sayarichimusaq, chaymi Hamat q'asamanta Arabá wayq'oman haykuq mayukama sarunchasunkichis, nispa.