Read Quechua Cuzco Bible 1988 AMÓS 7 Bible Online

AMÓS 7 - Quechua Cuzco Bible 1988 bible

AMÓS 7

¹Kaytan Qollana Señor Diosqa rikuchiwarqan: Paytan yupa langostata kamashaqta rikurqani qhepa wiñay q'achu wiñarimushaqtin. Chayqa reypaq ichhusqanmantaña wiñamuq q'achun kasqa.

²Suyuntin qorata langosta mikhuyta tukushaqtintaq, ñoqa nirqani: —Qollana Señor Diosníy, pampachaykuwayku. ¿Pitaq Jacob llaqtaykita aysarinqa? Payqa huch'uyllan riki, nispa.

³Hinan rikuchiwasqanmanta yuyaykakapuspa Señor Diosqa nirqan: —¡Manan chayqa kanqañachu! nispa.

⁴Kaytan Qollana Señor Diosqa rikuchiwarqan: Señor Diostan rikurqanki, llaqtanta huchachananpaq ninata waqyashaqta. Hinan ninaqa manchay mama qochata ch'akirparichishasqa, campokunatapas ruphaykushasqa.

⁵Chaymi nirqani: —Qollana Señor Diosníy, sayapullayña. ¿Pitaq Jacob llaqtaykita aysarinqa? Payqa huch'uyllan riki, nispa.

⁶Hinan rikuchiwasqanmanta yuyaykakapuspa Qollana Señor Diosqa nirqan: —¡Manan chaypas kanqañachu! nispa.

⁷Kaytapas Señor Diosqa rikuchillawarqantaqmi: Paymi plomadawan perqasqa perqa qayllapi sayashasqa, makinpitaq perqaqpa plomadanta hap'ishasqa.

⁸Hinan Señor Diosqa tapuwarqan: —Amós, ¿imatan rikushanki? nispa. Ñoqataq: —Perqaqpa plomadantan, nirqani. Chaymi payqa niwarqan: —Kay plomadawanmi yachasaq Israel llaqtayqa kuskachus q'ewichus kashasqanta. Manan payta astawanpas pampachasaqchu

⁹Isaacpa wak'a dioskunata yupaychanan cheqaskunan thunisqa kanqa, Israelpa yupaychana wasinkunapas purunyachisqan kanqa. ¡Jeroboampa ayllun contrataq espadantin sayarisaq! nispa.

¹⁰Hinan Betelpi kaq sacerdote Amasiasqa Israel rey Jeroboamman willachimurqan: Amosmi Israel runakuna ukhupi awqayki sayarimun, llaqtaqa manañan rimashasqanta uyarinmanchu.

¹¹Kay hinata rimaspan Amosqa purin: Espadan Jeroboamtaqa wañuchinqa, Israeltaq llaqtanmanta karuman presopuni apachikunqa, nispan, nispa.

¹²Hinan Amasiasqa Amosta kamachirqan: —¡Yaw profeta, ripuy! ¡Judá suyuman ayqekuy! Chaypin profetizayta atinki mikhunaykita tarinaykipaq.

¹³Amañataq Betelpi profetizaychu, kayqa reypa ch'uya wasinmi, suyuq hatun yupaychana wasinmi, nispa.

¹⁴Amostaq Amasiasman kutichirqan: —Manan profetachu kani, manataqmi profeta t'aqamantapaschu, aswanpas uywa michiqllan kakuni, k'ita higostataqmi pallanipas.

¹⁵Señor Diosmi uywa michinamanta pusakamuwarqan, hinaspan niwarqan: Riy, Israel llaqtayman simiyta willamuy, nispa.

¹⁶Chayrayku, Señor Diospa siminta uyariy: Qanqa ninkin: Ama Israel contraqa profetizaychu, amallataq Isaacpa ayllun contrapas rimaychu, nispayki.

¹⁷Chaymi Señor Diosqa nin: Warmiykin llaqta ukhupi rabonaman tukupunqa, wawaykikunan espadawan wañuchisqa kanqa, hallp'aykipas sorteopin rakikunqa, qantaqmi wak runakunaq suyunpi wañunki, Israeltaqmi llaqtanmanta karuman presopuni apachikunqa, nispan, nispa.