Read Quechua Cuzco Bible 1988 AMÓS 8 Bible Online

AMÓS 8 - Quechua Cuzco Bible 1988 bible

AMÓS 8

¹Huk rikhuriytawanmi Qollana Señor Diosqa rikuchiwarqan poqosqa frutayoq p'uktita.

²Paymi niwarqan: —Amós, ¿imatataq rikushanki? nispa. Chaymi kutichirqani: —Poqosqa frutayoq p'uktitan, nispa. Hinan Señor Diosqa niwarqan: —Israel llaqtaypaqmi p'uchukanan chayamun, manan astawanpas payta pampachasaqchu.

³Chay p'unchaypiqa yupaychana wasipi takinankumantapas anchinqakun. Askha ayan kanqa, ch'inllan hinantinman chaykunata wikch'unqaku, nispan nin Qollana Señor Diosqa.

⁴Kayta uyariychis, wakchakunata saq'aqkuna, llapa huch'uyyaykukuqtapas sinchita wakchayachiqkuna.

⁵Qankunan ninkichis: ¿Hayk'aqtaq mosoq killa p'unchay tukukunqa t'iyu mikhuyta qhatunanchispaq? ¿Hayk'aqtaq samana p'unchaypas tukukunqa trigo taqekunata kicharinanchispaq? ¡Tupunata huch'uyyachisun, hayk'achus valesqantapas wichachisun, q'otunapaq balanzatapas waqllichisun!

⁶¡Trigo k'urmutawanpas qhatusun! ¡Mana piniyoqkunata qolqewan rantisun, wakchakunatapas iskay usut'awan chhalasun! nispa.

⁷Señor Diosmi Jacobpa yupaychanan sutipi jurarqan: Manan hayk'aqpas qonqasaqchu tukuy imaymana ruwasqankuta, nispa.

⁸¿Manachu hallp'aqa chaywan chhaphchikunqa? ¿Manachu chaypi llapa tiyaqqa waqaykunqa? Pachantinmi wicharinqapas uraykunqapas, Egipto Nilo mayuq llimp'arisqanta chinkaykusqanta hina.

⁹Qollana Señor Diosmi nin: Chay p'unchaymi intita chawpi p'unchaypi haykuchisaq. k'anchay p'unchaypitaq hallp'a pachata tutayaykuchisaq.

¹⁰Fiestaykichistan wañuqmanta waqayman tukuchisaq, llapa takiykichiskunatataq anchiy harawiman: Llapatan luto p'achawan p'achachisaq, llapa runaq umantapas llakikuy señalpaq rutuchisaq. Chay p'unchaytaqa sapan churi chinkaykapuqmanta waqanaman hinan tukuchisaq, hinan may llakikuywan tukuykapunqa.

¹¹P'unchaykunan chayamushanña, chaykunapin kay pachaman yarqayta chayachimusaq, manan mikhunamanta yarqaytachu, manan unumanta ch'akichikuytachu, aswanpas ñoqaq simiy uyariymanta yarqachikuytan.

¹²Kachi Qochamantan mama qochakama kayman chayman purinqaku, wichaymantan inti lloqsimuykama puriykachanqaku, simiyta maskhaspa, manataq chayta tarinqakuchu.

¹³Chay p'unchaypin munay sipaskunapas waynakunapas ch'akisqa pisipanqaku.

¹⁴Hinallataq Samariapi wak'a diospa sutinpi juraqkunapas, Danpi idoloq sutinpi jurani, niqkunapas, Beersebapi wak'a diospa sutinpi juraqkunapas lliwmi urmanqaku, manañataq astawanpas sayarinqakuñachu, nispa.