Read Quechua Cuzco Bible 1988 AMÓS 9 Bible Online

AMÓS 9 - Quechua Cuzco Bible 1988 bible

AMÓS 9

¹Altar qayllapi sayashaqtan Señor Diosta rikurqani, paymi nirqan: Tusa umakunata p'anaychis teqsikuna chhaphchirikunankama ¡Yupaychana wasipi kaq llapa runamantaq p'akirqarisqa urmaykuchun! Qhepaqkunatan espadawan wañuchisaq, manan mayqenninkupas ayqenqachu, manan pipas phawarikunqachu.

²Wañuy-pachapi pakakuqtinkupas, chaymantan paykunata aysamusaq, hanaq pachakama wichariqtinkupas, chaymantan paykunata uraykachimusaq.

³Carmelo orqo patapi pakaykukuqtinkupas chaypin paykunata maskhasaq hinaspan apamusaq. Mama qocha ukhuman rikunaymanta pakaykukuqtinkupas, chaymanmi mach'aqwayta kachasaq paykunata kaninanpaq.

⁴Awqanku kamachipaq aparikuqtinpas, chaymanmi espadata chayachisaq paykunata wañuchinapaq. ¡Paykunatan mana allinpaq qhawarisaq, manataqmi allinpaqchu qhawarisaq! nispa.

⁵Tukuy-atiyniyoq Señor Diosmi hallp'a pachata tupaykun, hinan chullurin, chaypi llapallan tiyaqkunataq waqaykunku, hallp'a pachantintaqmi wicharinpas uraykunpas, Egipto Nilo mayuq llimp'arisqanta chinkaykusqanta hina.

⁶Paymi hanaq pachapi tiyanan wasita wasichakun, kay pachatan azul bayetawan hina qataykun. Paymi mama qocha unuta huñuykamun, hinaspan chayta hallp'a pataman ch'aqchumun. Paypa sutinqa Señor Diosmi.

⁷Señor Diosmi Israel runakunata nin: ¿Manachu qankunaqa Etiopía runakuna hina kapuwankichis? ¿Manachu ñoqaqa Israelta Egipto suyumanta pusamurqani, Filistea runakunatapas Cretamanta pusamurqani, Siria runakunatapas Kirmanta pusamurqani? nispa.

⁸Qollana Señor Diosmi kay huchasapa suyu contra qhawashaspa nin: Ñoqan chay suyuta hallp'a pachamanta ch'inyachisaq, ichaqa manan llapallantapunichu Jacobpa aylluntaqa ch'usaqyachisaq.

⁹Kayqa ñoqan kamachisaq, hinaspa llapa hatun suyukuna purapi Israel aylluta suysuchisaq imaynan huk suysunapi mikhuy ruruqa suysukun hinata, manataq huk rurullapas pampaman urmanqachu.

¹⁰Llaqtaypi huchasapakunan ninku: Manan imapas chayamuwasunchu, manan mana allinqa taripamuwasunchu, nispa. Chaywanpas llapallanpunin espadawan wañuchisqa kanqaku, nispan nin Señor Diosqa.

¹¹Señor Diosmi nin: Chay p'unchaypin Davidpa urmasqa ch'ukllanta ñoqa sayarichisaq, q'asankunatan wisq'asaq, thunikusqankunatapas perqasaq, hinaspaymi ñawpa p'unchaykunapi kasqanta hina ch'ukllapullasaqtaq,

¹²Edommanta puchuqtapas hat'allinanpaq, hinallataq ñoqaqkaq llapa hatun suyukunatapas munaychakunanpaq. Ñoqa Señor Diosmi nini, chaytaqa hunt'asaqpunin.

¹³Kayqa p'unchaykunan chayamushan, yapuqmi ichhuqman aypanqa, uvasta saruqpas muhu apaqmanmi aypanqa, orqokunantapas moqokunantapas upi vinon phawarinqa.

¹⁴Israel llaqtaytaqa preso kasqanmantan pusakampusaq, hinan paykunaqa purunyachisqa llaqtakunata perqanqaku, chaykunapitaq tiyanqaku. Uvas yuratan plantanqaku, chay vinotan ukyanqaku, huertakunatan tarpunqaku, chay rurukunatan mikhunqaku.

¹⁵Hallp'ankupin paykunata tiyachisaq, manataqmi hayk'aqpas paykunaman qosqay hallp'ankunamantaqa wikch'usqachu kanqaku, nispa. Chay hinatan Apu Señor Diosniykiqa nin.