Read Quechua Cuzco Bible 1988 ABDÍAS 1 Bible Online

ABDÍAS 1 - Quechua Cuzco Bible 1988 bible

ABDÍAS 1

¹Qollana Señor Diosmi huk rikhuriypi Abdiasman rikuchispa Edom suyumanta payman rimaykurqan. Señor Diosmi willawarqanku: Huk willakuqtan hatun suyukunaman kacharqani: ¡Sayariychis! ¡Edom llaqta contra awqa-tinkuq risunchis! nispa, nimunanpaq. Qollana Señor Diosmi Edomta nin:

²Hatun suyukuna ukhupin huch'uyllata churayki, ancha pisichasqan kanki.

³Hatunchakuq sonqoykin q'oturqasunki. Qanqa qaqa k'aktukunapin tiyashanki, hanaqpipunin tiyashanki, sonqoykipin ninki: ¿Pitaq pampaman urmaykachiwanman? nispayki.

⁴Anka hinaña wichayman seqawaq chaypas, ch'askakuna ukhupiña q'esachakuwaq chaypas, chaymantapas urmaykachimusqaykipunin.

⁵Suwakunaña hamusunkiman chaypas, tuta suwakunaña hamusunkiman chaypas, manan llapantachu apankuman. Uvas pallaqkunaña hamusunkiman chaypas, qhellapallatapas saqenkumanmi, ichaqa llapallan q'alanasqan kapushanki.

⁶¡Yaw Esaú, sinchitapunin kaqniykikunata llat'anarqasunkiku! ¡Llapallantan illaykikunata suwarqasunkiku!

⁷Llapa qanwan huñukuqkunan q'oturqasunkiku, qorpaykikunan qarqorqasunkiku. Sumaq kawsaq-masiykikunapas awqaykin sayaripurqanku, mikhuq-masiykikunapas toqllatan churarqasunkiku, ichaqa manan qanqa imatapas reparankichu.

⁸Edom suyuta muchuchispaymi hamawt'ankunata chinkachisaq, Esaupa orqonkunapi yachayniyoqkunatapas chinkachisaqmi.

⁹Temán llaqta kallpasapakunan manchasqa khatatatanqaku, Esaupa orqonkunapi tiyaq llapa runan wañunqaku.

¹⁰Jacob wawqeykita maqasqamantan wañuchisqaykimantawanmi sinchi p'enqasqa kanki, wiñaypaqmi ch'inyachipusqa kanki.

¹¹Karu llaqtayoqkuna kaqninkunata llat'anashaqtinkun, wak llaqtayoqkuna punkunkunanta haykushaqtinkun, Jerusalenpaq sorteashaqtinkun, qanpas hukninku hinallataq karqanki, wakneqpitaq sayaykurqanki.

¹²Manan qanqa llakipi kashaqtin wawqeykita kusipayanaykichu karqan, manan chay chinkaripushasqanku p'unchaypi Judá runakunamanta kusikunaykichu karqan, manan llaki-phutisqan p'unchaypi hatunchakunaykichu karqan.

¹³Manan chay waqasqan p'unchaypi llaqtay punkunta haykunaykichu karqan, manan chay muchusqan p'unchaypi mana allin kasqanta pisichanaykichu karqan, manan chay ñak'arisqan p'unchaypipas kaqninkunata suwakunaykichu karqan.

¹⁴Manan ñan palqakunapipas sayanaykichu karqan ayqekushaqkunata wañuchinaykipaq, manan hap'iykachinaykichu karqan llaki-phutiy p'unchaypi puchuqkunatapas.

¹⁵Llapa hatun suyukunata muchuchinay p'unchaymi sispaykamushanña, chaypachan qanpa ruwasqaykita hina ruwasunkiku, qanllamantaqmi imachus chaskinaykiqa chayasunki.

¹⁶Imaynan llaqtayqa ch'uya orqoypi haya muchuyta ukyarqan, chay hinatan llapa hatun suyukunapas hayata ukyashallanqakupuni. Ukyanqakun, machaykunqakun, t'iyusqan wañupunqaku.

¹⁷Ichaqa Sión orqopin wakillan qespikunqaku, Sionmi ch'uya kapunqa, Jacobpa mirayninkunan hallp'ankuta wakmanta hap'ikapunqaku.

¹⁸Esaupa mirayninkunaqa k'ukmu hinan kanqa, Jacobpa mirayninkunataq nina hina kanqa, Josepa mirayninkunapas rawray hinan kanqa, chay ninan hap'irispa ruphaykunqa, manan pipas Esaupa ayllunpiqa qhepanqachu.

¹⁹Neguev ch'inneqpi kaqkunan Esaupa orqonkunata hap'inqaku, Shefela nisqa moqo-moqopi kaqkunataq Filistea suyuta hap'inqaku. Hap'illanqakutaqmi Efraín hallp'atapas Samaria hallp'atapas, Benjamín ayllutaq Galaadta hap'inqa.

²⁰Kamachipaq apasqa askha Israel runakunan Canaán suyu runakunaq hallp'anta Sarepta llaqtakama hap'inqaku. Sefarad llaqtapi kashaq Jerusalenmanta kamachipaq apasqakunataq Neguev ch'inneqpi kaq llaqtakunata hap'inqaku.

²¹Sión orqopi qespichisqa runakunan Esaupa orqo-orqonkunata kamachinankupaq wicharinqaku, ahinapin Señor Diosqa munaychakapunqa.