Read Quechua Cuzco Bible 1988 JONÁS 4 Bible Online

JONÁS 4 - Quechua Cuzco Bible 1988 bible

JONÁS 4

¹Nínive runakunata Dios mana muchuchisqanmi mana Jonaspa sonqonpaq hinachu karqan, chaymi phiñakurqan.

²Señor Diosmanta mañakuspataq nirqan: —Señor Diosníy, kay hinapuni kanantan llaqtaypi kashaspayraq yacharqani. Chaymi Españaman ayqekapuyta munarqani, ñoqaqa yacharqanin sumaq sonqoyoq, khuyapayakuq, mana usqhay phiñakuq Dios kasqaykita. Mana p'itiy munakuqmi kanki, muchuchinayki kashaqtinpas huktaña yuyaykuqmi kanki.

³Kunanqa, Señor Diosníy, wañuchipuwanaykitan mañakuyki, aswan allinmi wañukapunay kawsashanaymantaqa, nispa.

⁴Señor Diostaq payta nirqan: —¿Qanpaq allinchu kay phiñakusqaykiqa? nispa.

⁵Hinan Jonasqa llaqtamanta lloqsispa llaqtaq inti lloqsimuy kinrayninpi tiyarqan, chaypi ch'ukllakuspataq chay ukhupi llanthukurqan llaqtapi imachus kananta rikunanpaq.

⁶Apu Señor Diostaq huk higuerillata wiñachirqan, chay yuran wiñarqan Jonaspa umanta llanthuykunanpaq, allinpi kananpaq. Hinaqtinmi Jonasqa chay yurata qhawarispa anchatapuni kusikurqan.

⁷Paqarisnin p'unchay illarimuqtintaq Diosqa huk kuruta kachamurqan, hinan chay kuru higuerillata k'uturqan, chaymi ch'akipurqan.

⁸Inti lloqsimuqtintaq Diosqa inti lloqsimuy kinraymanta rupha wayrata wayrachimurqan, Jonaspa umanta inti kankaqtintaq yuyaynin chinkarqan, hinan wañuyta mañakurqan: —Aswan allinmi wañukapunay kawsashanaymantaqa, nispa.

⁹Diostaq ichaqa Jonasta nirqan: —¿Allinchu higuerilla ch'akisqanmanta sinchita phiñakusqayki? nispa. Paytaq kutichirqan: —¡Arí, sinchi phiñasqapunin wañusaq! nispa.

¹⁰Hinaqtinmi Señor Diosqa payta nirqan: —Higuerillataqa manan qanchu mallkirqanki wiñachirqanki, huk tutallapin wiñamurqan hukkaq tutapitaq ch'akipurqan, chaypas qanqa chay yurata khuyapayashanki.

¹¹Chayri, ¿manataqchu ñoqaqa Nínive llaqtata khuyapayayman, chay hatun llaqtata? Chaypin iskay chunka waranqa mana huchallikuq wawachakuna kashan, kallantaq askha animalkunapas, nispa.