Read Quechua Cuzco Bible 1988 NÚMEROS 1 Bible Online

NÚMEROS 1 - Quechua Cuzco Bible 1988 bible

NÚMEROS 1

¹Israel runakunaq Egipto suyumanta lloqsimusqan wata kurakña kashaqtinmi, iskaykaq killaq qallariynin p'unchaypi Sinaí ch'inneqpi Dioswan Tupana Karpapi Señor Diosqa Moisesta nirqan:

²—Israel llapan runakunata yupay, ayllunkuman hina familiankuman hina sutinmantakama. Qanpiwan Aaronpiwanmi yupaspa qelqankichis iskay chunka kinsayoq watayoqmanta wichayman hayk'achus awqa-tinkuy atiq qharikuna kasqanta.

⁴Sapanka ayllumanta huk umalli yanapasunkichis,

⁵chay umallikunan kaykuna: Rubén ayllumanta: Sedeurpa churin Elisur,

⁶Simeón ayllumanta: Zurisadaipa churin Selumiel,

⁷Judá ayllumanta: Aminadabpa churin Naasón,

⁸Isakar ayllumanta: Zuarpa churin Natanael,

⁹Zabulón ayllumanta: Helonpa churin Eliab,

¹⁰Josepa miraynin Efraín ayllumanta: Amiudpa churin Elisama, Josepa miraynin Manasés ayllumanta: Peduarpa churin Gamaliel,

¹¹Benjamín ayllumanta: Gedeoniq churin Abidán,

¹²Dan ayllumanta: Amisadaipa churin Ahiezer,

¹³Aser ayllumanta: Okranpa churin Pagiel,

¹⁴Gad ayllumanta: Reuelpa churin Eliasaf,

¹⁵Neftalí ayllumanta: Enanpa churin Ahira, nispa.

¹⁶Chaykunan akllasqa karqan yanapaqpaq, sapankataq ayllunkupi umalli karqan.

¹⁷Hinan chay kikin p'unchaypi Moisesqa Aaronpiwan akllasqa umallikunapiwan llapa runakunata huñuykurqan. Israel runakunan ayllunkuman hina familiankuman hina pikunachus machulanku kasqanta willakurqanku. Chaymi iskay chunka watayoqmanta wichayman sapanka qharikunata sutinmantakama qelqarqanku.

¹⁹Señor Diospa Moisesta kamachisqanman hina. Chay hinatan Moisesqa Sinaí ch'inneqpi runakunata yuparqan.

²⁰Iskay chunka watayoqmanta wichayman awqa-tinkuy atiq qharikunatan sutinkumantakama yuparqanku ayllunkuman hina familiankuman hina: Jacobpa phiwi churin Rubén ayllumanta yuparqanku tawa chunka soqtayoq waranqa phisqa pachakniyoq qharikunata.

²²Simeón ayllumanta yuparqanku phisqa chunka isqonniyoq waranqa kinsa pachakniyoq qharikunata.

²⁴Gad ayllumanta yuparqanku tawa chunka phisqayoq waranqa soqta pachak phisqa chunkayoq qharikunata.

²⁶Judá ayllumanta yuparqanku qanchis chunka tawayoq waranqa soqta pachakniyoq qharikunata.

²⁸Isakar ayllumanta yuparqanku phisqa chunka tawayoq waranqa tawa pachakniyoq qharikunata.

³⁰Zabulón ayllumanta yuparqanku phisqa chunka qanchisniyoq waranqa tawa pachakniyoq qharikunata.

³²Josepa miraynin Efraín ayllumanta yuparqanku tawa chunka waranqa phisqa pachakniyoq qharikunata. Josepa miraynin Manasés ayllumanta yuparqanku kinsa chunka iskayniyoq waranqa iskay pachakniyoq qharikunata.

³⁶Benjamín ayllumanta yuparqanku kinsa chunka phisqayoq waranqa tawa pachakniyoq qharikunata.

³⁸Dan ayllumanta yuparqanku soqta chunka iskayniyoq waranqa qanchis pachakniyoq qharikunata.

⁴⁰Aser ayllumanta yuparqanku tawa chunka hukniyoq waranqa phisqa pachakniyoq qharikunata.

⁴²Neftalí ayllumanta yuparqanku phisqa chunka kinsayoq waranqa tawa pachakniyoq qharikunata.

⁴⁴Chaykunatan yuparqanku Moisespiwan Aaronpiwan chunka iskayniyoq umallikunapiwan. Chay umallikunan ayllunkuq rantinpi akllasqa karqanku.

⁴⁵Llapan Israel qharikunataq iskay chunka watayoqmanta wichayman awqa-tinkuy atiqkuna

⁴⁶soqta pachak kinsayoq waranqa phisqa pachak phisqa chunkayoq karqanku.

⁴⁷Leví ayllu familiakunaqa manan wakin ayllukunawan yupasqachu karqan,

⁴⁸Señor Diosmi Moisesta nisqa:

⁴⁹Israel ayllukunata yupaspaykiqa, aman Leví ayllutaqa yupankichu.

⁵⁰Aswanpas kamachikuy simiyoq p'alta rumi waqaychana karpapi llank'anankupaqmi churanki, tukuy serviciokunata lliw kaqninkunatawan waqaychanankupaq. Paykunan astanqaku chay karpata tukuy serviciokunatapas. Karpaq muyuriqninpitaq karpakuspa tiyanqaku.

⁵¹Chay karpata astana kaqtinqa, paykunan karpataqa paskanqakupas sayarichinqakupas. Pipas mana Leví runa kashaspa chay karpaman asuykuqqa wañuchisqan kanqa.

⁵²Israel wakin ayllukunataq t'aqa-t'aqa karpakuspa tiyanqaku, sapanka t'aqa banderantinkama.

⁵³Leví runakunataq Ñoqawan Tupana Karpaq muyuriqninpi tiyanqaku, chay karpata qhawaspanku, Israel runakuna contra mana phiñakunaypaq, nispa.

⁵⁴Hinan Israel runakunaqa Moisesta Señor Diospa kamachisqanman hina lliwta ruwarqanku.