Read Quechua Cuzco Bible 1988 NÚMEROS 10 Bible Online

NÚMEROS 10 - Quechua Cuzco Bible 1988 bible

NÚMEROS 10

¹Señor Diosmi Moisesta nirqan:

²—Qolqe takasqamanta iskay trompetata ruwakuy, chay trompetakunan kanqa runakunaq huñunakunanta willanaykichispaq, astakunankuta willanaykichispaqpas.

³Iskaynin trompetata tocaqtiykichismi llapa Israel runakuna ñawpaqeypi huñukunqaku Ñoqawan Tupana Karpa haykunapi.

⁴Huk trompetallata tocaqtiykichisqa ayllu umallikunallan huñukunqaku.

⁵Trompetakunata p'iti-p'itispa tocaqtiykichisqa inti lloqsimuy lado karpakunapi tiyaq ayllukuna puririnqaku,

⁶wakmanta p'iti-p'itispa tocaqtiykichistaq uray lado karpakunapi tiyaq ayllukuna puririnqaku. Trompetakunata p'iti-p'itispa tocasqaqa puririnaykichispaq señalmi kanqa.

⁷Mana p'iti-p'itispa trompetakunata tocayqa runakunaq huñukunanpaq señalmi kanqa.

⁸Chay trompeta tocaqkunaqa Aaronpa miraynin sacerdotekunan kanqaku. Chaymi qankunapaq mana kuyuq kamachikuy kanqa.

⁹Hallp'aykichispi qankunata awqaykichis sarunchaqtin paykunawan awqa-tinkuq rinkichis chayqa, trompetakunata p'iti-p'itispa tocankichis. Hinan ñoqa Apu Señor Diosniykichisqa qankunata yuyarisqaykichis, hinaspa awqaykichismanta qespichisqaykichis.

¹⁰Chay trompetakunataqa tocallankichistaqmi kusikuspaykichis unanchasqa p'unchaykunapi, Mosoq Killa Fiestakunapi, ruphachina sacrificiota haywaspa, sumaq kawsay sacrificiota haywaspa ima. Ahinapin qankunata ñoqa yuyarisqaykichis, ñoqaqa Apu Señor Diosniykichismi kani, nispa.

¹¹Egiptomanta lloqsimusqanku qhepata iskaykaq wataq iskay killanpa iskay chunka p'unchayninpin Dioswan Tupana Karpa patamanta phuyu hatarirqan.

¹²Chaymi Israel runakunaqa Sinaí ch'inneqmanta puririrqanku. Hinan phuyuqa Parán ch'inneqpi sayarqan.

¹³Señor Diospa Moiseswan kamachisqanman hina puririrqanku:

¹⁴Ñawpaqta rirqan Judá nisqa t'aqa banderantin, umallinkutaq karqan Aminadabpa churin Naasón.

¹⁵Isakar ayllutan umallirqan Zuarpa churin Natanael.

¹⁶Zabulón ayllutan umallirqan Helonpa churin Eliab.

¹⁷Chaymantataq Gersonpa mirayninpiwan Merariq mirayninpiwan Dioswan Tupana Karpata paskarqanku, paykunan karpata astanankupaq churasqa karqanku, chaymi paykunaqa aparikuspa puririrqanku.

¹⁸Chaymantataq Rubén nisqa t'aqa banderantin puririrqan, umallinkutaq Sedeurpa churin Elisur karqan.

¹⁹Simeón ayllutan umallirqan Zurisadaipa churin Selumiel.

²⁰Gad ayllutan umallirqan Reuelpa churin Eliasaf.

²¹Chaymantataq Kohatpa miraynin rirqan, ch'uya kaqkunata aparikuspa. Paykunaq chayananpaqqa Dioswan Tupana Karpata sayarichirqankuñan.

²²Chaymantataq Efraín nisqa t'aqa banderantin puririrqan, umallinkutaq Amiudpa churin Elisama karqan.

²³Manasés ayllutan umallirqan Pedasurpa churin Gamaliel.

²⁴Benjamín ayllutan umallirqan Gedeoniq churin Abidán.

²⁵Wakin ayllukunaq qhepallantañan rirqan Dan nisqa t'aqa banderantin, umallinkutaq Amisadaipa churin Ahiezer karqan.

²⁶Aser ayllutan umallirqan Okranpa churin Pagiel.

²⁷Neftalí ayllutan umallirqan Enanpa churin Ahira.

²⁸Chay hinatan Israel ayllukunaqa astakushaspanku purirqanku.

²⁹Huk p'unchaymi Moisesqa Madián runa Reuelpa churin Hobab cuñadonta nirqan: —Qowanankupaq Señor Diospa prometewasqanku suyumanmi ñoqayku ripushayku. Haku ñoqaykuwan, allintan rikusqaykiku, Señor Diosqa Israelta sumaqta rikunanpaqmi prometekurqan, nispa.

³⁰Hinan Hobabqa kutichirqan: —Manan riymanchu, ñoqaqa hallp'aymanmi kutipusaq, aylluykunaq kasqan cheqasman, nispa.

³¹Moisestaq anchata valepakuspa nirqan: —Amayá ripuychu, qanqa allintan reqsinki ch'inneqpi karpakuna cheqaskunata, chhaynaqa kusata pusawankikuman.

³²Ñoqaykuwan riqtiykiqa Señor Diospa tukuy qowasqanku kaqkunatan qosqaykiku, nispa.

³³Chaymantataq Israel runakunaqa Señor Diospa orqonmanta ripurqanku, hinaspa kinsa p'unchay purirqanku. Señor Diospa rimanakuynin cajatataq paykunaq ñawpaqenta aparqanku, samaykunankupaq huk cheqasta maskhaspanku.

³⁴Sapa p'unchay puririqtinkun Señor Diospa phuyunqa paykunaq altonta rirqan.

³⁵Rimanakuy cajata hoqarishaqtinkun Moisesqa khaynata nirqan: —¡Sayariy, Señor Diosníy! ¡Awqaykikunata ch'eqechiy! ¡Cheqnikuqniykikunatapas ayqechiy! nispa.

³⁶Rimanakuy cajata churaykuqtinkutaq Moisesqa nirqan: ¡Kunanqa kutirimuy, Señor Diosníy, waranqa-waranqa Israel llaqtaykiman! nispa.