Read Quechua Cuzco Bible 1988 NÚMEROS 11 Bible Online

NÚMEROS 11 - Quechua Cuzco Bible 1988 bible

NÚMEROS 11

¹Huk p'unchaymi Israel runakunaqa Señor Dios contra chhuchupakurqanku sasachakuykunapi kashasqankurayku. Señor Diostaq chayta uyarispa k'arakta phiñakurqan, hinaspan nina rawrayta kachamurqan, chaymi karpa-karpaq muyuriq huk cheqasninta rupharqan.

²Hinaqtinmi runakunaqa qaparispa Moisesta valekurqanku, Moisestaq paykunapaq Señor Diosmanta mañapurqan. Hinan ninaqa wañupurqan.

³Chaymi chay cheqasta Tabera[2] nispa suticharqanku, chaypi Señor Diospa ninan paykuna contra rawrasqanrayku.

⁴Israel runakunaqa tukuy t'aqa runakunawanmi huñu tiyarqanku, chay runakunan huk rikch'aq mikhunata munapakuqku. Chaymi Israel runakunapas paykunata qatichikuspa waqarqanku, hinaspa nirqanku: —¡Ay, aychallapas kanchu mikhunanchispaq!

⁵Egipto suyupiqa yanqallan challwata mikhurqanchis. Mikhullarqanchistaqmi pepinota, sandiata, porota, cebollata, ajotapas.

⁶Kunantaq kaypi yarqaymanta wañupushanchisña, manná nisqa mikhunallan kakushan, manan imapas kanchu, nispanku.

⁷Chay manna nisqa mikhunaqa q'elluman samaq resina hinan karqan, culantro muhumantaq rikch'akurqan.

⁸Tuta karpa-karpa pataman sulla chayaqtinmi manna nisqa mikhunapas chayallaqtaq. Runakunaqa chay mikhunata hoqariqmi lloqsirqanku, hinaspa kutarqanku mana chaytaq ch'aqerqankupas, chaymantataq mikhuyta wayk'ukurqanku, mana chaytaq tortatapas ruwakurqanku. Saborninmi karqan aceitewan chapusqa t'anta hina.

¹⁰Israel llapa familiakunan karpanku punkupi waqasharqanku, chaytan Moisesqa uyarirqan, hinan mana allinchu payman rikch'akurqan. Hinallataq Señor Diospas waqashasqanku hawa k'arakta phiñakurqan.

¹¹Moisestaq Señor Diosta nirqan: —¿Imanaqtintaq kay kamachiykita mana allinta ruwawanki? ¿Imamantataq ñoqa contra phiñakunki, kay runakunaq sasachakuyninta ñoqaman wikch'uykuwaspayki?

¹²Manan ñoqaqa paykunaq taytanpaschu mamanpaschu kani, chaychu niwankimanpas: Ñuñuq wawata hina marq'ayniykipi apay machulankuman prometesqay suyuman, nispa.

¹³¿Maymantataq horqomusaq aychata kay llapan runakunaman mikhuchinaypaq? Waqakuspan hamushallawanku: ¡Aychata qowayku mikhunaykupaq! nispa.

¹⁴Sapallayqa manan atiymanñachu kay llapan runakuna pusayta, sinchi sasan ñoqapaqqa kay llaqta pusayqa.

¹⁵Chay hinallatapuni ruwawanayki kaqtinqa, khuyapayawaspayki kawsayniyta qechupuway, aswan allinmi kanqa, manañataq sinchi sasachakuypiñachu kasaq, nispa.

¹⁶Hinan Señor Diosqa kutichirqan: —Qanchis chunka kurak runakunata huñumuway, ayllukunapi reqsisqayki kamachikuqkunata, hinaspa Ñoqawan Tupana Karpaman pusay, chaypitaq qanpiwan suyawankichis.

¹⁷Ñoqan uraykamuspa qanwan rimasaq, hinaspa qanman atiyniy qosqayta wakinta paykunaman qosaq, kay llaqta pusayta yanapanasuykipaq, ahinapi mana sapallaykiñachu kanki.

¹⁸Chhaynaqa runakunata kamachiy: Paqarinpaq ch'uyanchakuychis, paqarinmi aychata mikhunkichis, Señor Diosmi uyarirqan waqaspa nisqaykichista: ¡Ay, aychallapas kanchu mikhunaykupaq! ¡Egipto suyupiqa aswan allinmi karqanchis! nispa. Señor Diosmi aychata qosunkichis,

¹⁹hinan mikhunkichis manan huk p'unchayllachu, iskay p'unchayllachu, phisqa p'unchayllachu, manataq chunka p'unchayllapaschu, iskay chunka p'unchayllapaschu,

²⁰aswanpas huk killa hunt'an mikhunkichis amikunaykichiskama, millakunaykichiskama qankunawan kashaqtin Señor Diosta pisichasqaykichisrayku, hinaspa: ¡Imapaqmi Egipto suyumanta hamurqanchis! nispa ñawpaqenpi waqasqaykichisraykupiwan, nispayki, nispa.

²¹Hinan Moisesqa kutichirqan: —Ñoqawan hamuq runakunaqa soqta pachak waranqa qharikunan kanku chakillapi puriqkuna, ninkitaq: Huk killa hunt'an aychata mikhunkichis, nispa.

²²¿Maypitaq kashan askha ovejapas askha wakapas, chayta nak'aspa llapan runaman aypachinaypaq? Mama qochapi kaq llapan challwakunataña qosunman chaypas manan aypanmanchu, nispa.

²³Señor Diostaq ichaqa kutichirqan: —¿Atiyniyqa huch'uyllachu? Kunanmi rikunki simiy hunt'akunqachus manachus chayta, nispa.

²⁴Chaymi Moisesqa lloqsispa Señor Diospa nisqan simikunata runakunaman willarqan, hinaspa qanchis chunka Israel kurak runakunata huñurqan, kamachirqantaq karpa muyuriqpi kashanankupaq.

²⁵Hinan Señor Diosqa phuyupi uraykamuspa Moiseswan parlarqan. Chaymantataq Moisesman qosqan wakin atiyninta qanchis chunka kurak runakunaman qorqan. Paykunataq atiyta chaskirqospapacha profetizayta qallarirqanku, ichaqa manan chay hina wakmanta karqanñachu.

²⁶Qanchis chunka akllasqa kurak runakunamanta iskay qharikuna Dioswan Tupana Karpata mana risqakuchu, aswanpas karpa-karpapi qhepakusqaku, paykunaq sutinmi karqan hukpa Eldad hukkaqpataq Medad. Chaywanpas paykunaqa Diospa atiyninta chaskillarqankutaqmi, chaymi karpa-karpapi profetizayta qallarirqanku.

²⁷Huk waynataq Moisesman willaq phawarirqan: ¡Eldadpiwan Medadpiwanmi karpa-karpapi profetizashanku! nispa.

²⁸Hinan wayna-kayninmantapacha Moisespa kamachin Nunpa churin Josueqa nirqan: —¡Wiraqocháy Moisés, hark'ay chay runakuna ama rimananpaq! nispa.

²⁹Moisestaq kutichirqan: —¿Ñoqamantachu sienteshanki? ¡Ojalachá llapan runakunamanpas Señor Diosqa atiyninta qonman, hinaspa llapanku profeta kankuman! nispa.

³⁰Chaymantataq Moisesqa Israel kurak runakunapiwan karpankuman kutipurqanku.

³¹Señor Diosmi Mama Qocha cheqasmanta wayrachimurqan, chay wayran yuthukunata apamurqan huk metro altollanta phalashaqta. Hinan yuthukunaqa karpa-karpaq muyuriqninman hunt'aykurqan huk p'unchay puriykama karuyoqta.

³²Chaymi Israel runakunaqa chay p'unchay tuta illariq, qhepantin p'unchay ch'isiyaq yuthukunata hap'irqanku. Pisi hap'iqmi chunka carga yuthuta hap'irqan, chaykunatan ch'arkikurqanku karpa-karpaq muyuriqninpi.

³³Ichaqa Israel runakuna chayllaraq yuthu aychata khamurishaqtinmi Señor Diosqa paykuna contra k'arakta phiñakurqan, hinaspan muchuchispa askha runakunata wañuchirqan.

³⁴Chaymi chay cheqasta suticharqanku Kibrot-hataava[3] nispa, huk rikch'aq mikhunata munapakuq runakunata chaypi p'ampasqankurayku.

³⁵Kibrot-hataavamanta Israel runakunaqa Hazerotkama purirqanku, hinaspa chaypi qhepakurqanku.