Read Quechua Cuzco Bible 1988 NÚMEROS 12 Bible Online

NÚMEROS 12 - Quechua Cuzco Bible 1988 bible

NÚMEROS 12

¹Mariapiwan Aaronpiwanmi Moisés contra rimarqanku Etiopía suyu warmiwan casarakusqan hawa.

²Nillarqankutaq: —¿Señor Diosqa Moisesllatachu rimaykun? ¿Manachu ñoqaykutapas rimaykullawankutaq? nispa. Señor Diostaq chayta uyarirqan.

³Moisesqa kay pachantin qharikunamantapas aswan huch'uyyaykukuqpunin karqan.

⁴Qonqayllan Señor Diosqa Moisesta Aaronta Mariatawan nirqan: — Qankuna kinsantiykichis Ñoqawan Tupana Karpaman hamuychis, nispa. Hinan kinsantinku karpaman rirqanku.

⁵Chaymantataq Señor Diosqa sayaq ati-phuyupi uraykamurqan, hinaspa karpa punkupi sayaykuspa Aaronta Mariatawan waqyarqan. Paykuna qayllaykuqtinkutaq

⁶Señor Diosqa nirqan: —¡Uyariwaychis! Qankuna ukhupi ñoqaq profetay kaqtinqa, ñoqan payman rikhuriypi rikuchikuni, mosqoypitaq rimaykunipas.

⁷Moisés kamachiywanmi ichaqa mana chhaynatachu ruwani, payqa atinikunaymi, llaqtay pusaqmi.

⁸Paywanqa uya-uya pura hinan rimani, ancha sut'itan rimani, manan pakasqapi hinachu. Rikch'ayniyta Moisés rikushaqtinqa, ¿imaynataq qankunaqa pay contra rimayta mana manchakunkichischu? nispa.

⁹Señor Diosmi sinchita paykunapaq phiñakurqan, hinaspa ripurqan.

¹⁰Karpamanta altoman phuyu suchuriqtintaq, Mariaqa aycha qaranpi millay onqoyniyoq karqapusqa, llapan aychanpas rit'i hina. Mariata Aarón qhawariqtintaq, aycha qaranpi millay onqoyniyoq kapushasqa.

¹¹Chaymi Aaronqa Moisesta nirqan: —Wiraqocháy, valekuykin, amapuni muchuchiwaykuchu chay huchaykumanta, mana yuyayniyoq hinan rimarqayku.

¹²Amayá Mariaqa kachunchu mamanpa wiksanpi wañuspa asnarishaq naceq wawa hinaqa, nispa.

¹³Hinan Moisesqa Señormanta mañakurqan: —Diosníy, valekuykin Mariata kunan qhaliyachinaykipaq, nispa.

¹⁴Señor Diostaq kutichirqan: —Paypa taytan uyanpi thuqaykunman chayqa, qanchis p'unchaymi p'enqasqa pakakunman. Chhaynaqa karpa-karpamanta hawaman qanchis p'unchayta wikch'uychis, chaymantataq karpa-karpaman kutimpunqa, nispa.

¹⁵Chaymi Mariaqa karpa-karpamanta hawaman qanchis p'unchayta wikch'usqa karqan. Chaykamataq Israel runakunaqa mana maymanpas puririrqankuchu, karpa-karpaman María kutimunankama.

¹⁶Chaymantataq Hazerotmanta puririrqanku, hinaspa Parán ch'inneqpi karpakurqanku.