Read Quechua Cuzco Bible 1988 NÚMEROS 13 Bible Online

NÚMEROS 13 - Quechua Cuzco Bible 1988 bible

NÚMEROS 13

¹Señor Diosmi Moisesta nirqan:

²—Sapanka ayllumanta huk kamachikuqta akllay, hinaspa paykunata kachay Canaán suyuta qhamiyamunankupaq, chay suyutan Israel runakunaman qosaq, nispa.

³Hinan Moisesqa Señor Diospa kamachisqanman hina Parán ch'inneqmanta qhamiyaqkunata kacharqan. Llapan chay qharikunaqa Israel ayllukunapi kamachikuqkunan karqanku.

⁴Sutinkutaq kaykuna karqan:

⁵Rubén ayllumanta Zakurpa churin Samúa,

⁶Judá ayllumanta Jefoneq churin Caleb,

⁷Isakar ayllumanta Josepa churin Igal,

⁸Efraín ayllumanta Nunpa churin Oseas,

⁹Benjamín ayllumanta Rafupa churin Palti,

¹⁰Zabulón ayllumanta Zodiq churin Gadiel,

¹¹Josepa miraynin Manasés ayllumanta Susiq churin Gadi,

¹²Dan ayllumanta Gemaliq churin Amiel,

¹³Aser ayllumanta Mikaelpa churin Setur,

¹⁴Neftalí ayllumanta Vapsiq churin Nahbi,

¹⁵Gad ayllumanta Makiq churin Gewel.

¹⁶Chaykunan karqan Canaán suyuta Moisespa qhamiyaqta kachasqan qharikuna. Nunpa churin Oseastaqa Moisesmi Josué sutiwan churarqan.

¹⁷Moisesmi paykunata Canaán suyu qhamiyaqta kachashaspa nirqan: —Neguev ch'inneqninta riychis, hinaspa orqo-orqonta puriychis.

¹⁸Imaynachus suyu kasqantaqa allinta qhawamuychis, hinallataq chaypi tiyaq runakunapas atiyniyoqchus icha pisi kallpachus, askhachus icha pisillachus kanku chaykunatawan qhawamuychis.

¹⁹Llaqtankunatapas allinta qhawamuychis, karpa-karpapichus tiyanku icha muyuriq perqayoq llaqtapichus tiyanku chayta. Tiyasqanku hallp'apas allinchus icha manachus,

²⁰allin hallp'achus icha purunchus, sach'akunapas kanchus manachus chaykunatawan qhawamuychis. Kallpachakuychis, ama qonqaychischu chay suyupi wakin rurukunata apamuyta, nispa. Risqanku tiempoqa ñawpaqkaq uvas cosecha hoqariy tiempon karqan.

²¹Hinan paykunaqa rispanku Canaán suyuta qhamiyarqanku, uray ladonpi Zin ch'inneqmanta wichay ladonpi Hamat Q'asawan kuska kashaq Rehob llaqtakama.

²²Neguevninta rispanku Hebronkama chayarqanku. Chaypin tiyasqaku Anakpa miraynin Ahimán, Sesai, Talmaipiwan. (Hebrón llaqtaqa Egipto suyupi Zoán llaqtamanta qanchis wata ñawpaqtaraqmi sayarichisqa kasqa).

²³Eskol wayq'oman chayaspankun, huk k'allmata wit'urqanku uvas ruru ch'ampantinta, k'aspiman warkuykuspataq iskaymanta wantupi apamurqanku. Apamullarqankutaq granadakunatapas higostapas.

²⁴Chay wayq'otan suticharqanku Eskol[4] nispa, Israel runakuna chaypi uvas ch'ampa k'allmata wit'usqankurayku.

²⁵Chaymantataq suyuta tawa chunka p'unchay qhamiyaspaña kutimpurqanku

²⁶Parán ch'inneqpi Kadesman, chaypin kasharqanku Moisespas Aaronpas llapan Israel runakunapas. Hinan qhamiyaq kachasqakunaqa tukuy rikusqankuta paykunaman willarqan, chay suyumanta apasqanku rurutapas rikuchirqan.

²⁷Hinaspan Moisesta nirqanku: —Kachawasqaykiku suyutaqa rirqaykun, cheqaqtapunin imaymanaq hunt'asqa wiñanan hallp'a kasqa, kaymi chay hallp'aq rurun.

²⁸Chaypi tiyaq runakunan ichaqa atiyniyoq kasqaku, llaqtankupas sinchi hatuntaq allin perqasqataq kasqa. Hinallataq rikumurqayku Anakpa miraynin hatuchachaq runakunata.

²⁹Neguev hap'iypin Amalek runakuna tiyasqaku, orqo-orqopitaq Het runakuna, Jebus runakuna, Amor runakunapiwan tiyasqaku, Mama Qocha patapitaq Jordán mayu qayllapiwan Canaán runakuna tiyasqaku, nispanku.

³⁰Hinan Calebqa Moisespa ñawpaqenpi kashaq runakunata ch'inyachispa nirqan: —¡Haku puririsun, hap'isunmi chay suyuta, ñoqanchisqa paykunata atipasunpunin! nispa.

³¹Riqmasin qharikunataq ichaqa kutichirqanku: —¡Manan chay runakunataqa phawaykuyta atisunmanchu! ¡Paykunaqa aswan atiyniyoqmi ñoqanchismantaqa! nispa.

³²Hinallataq Israel runakunaman qhamiyaq risqanku suyumanta mana allinta willaspa nirqanku: —Qhamiyaq risqayku hallp'apiqa kikinpi tiyaq runakunan mikhuy pisi kaqtin wañunku, chaypi tiyaq llapan qharikunapas sinchi hatunmi kasqaku.

³³Rikumullarqaykutaqmi Anakpa miraynin hatuchachaq runakunatapas. Paykunaq qayllanpi kaspaykuqa t'isku-t'isku hina huch'uylla kasqaykutan reparakurqayku, paykunapas ahinatan qhawariwarqanku, nispanku.