Read Quechua Cuzco Bible 1988 NÚMEROS 14 Bible Online

NÚMEROS 14 - Quechua Cuzco Bible 1988 bible

NÚMEROS 14

¹Hinan Israel runakunaqa qapariyta qallarirqanku, chay tutantinmi waqaspa illarirqanku.

²Llapallanmi paykunaqa Moisés contra Aarón contrapiwan chhuchupakuspanku nirqanku: —¡Allinmi kanman karqan Egipto suyupi wañukapuqtinchispas, mana chaytaq kay ch'inneqpi wañukapuqtinchispas!

³¿Imapaqmi Señor Diosqa kay suyuman pusamuwanchis, maqanakuypi wañunanchispaqchu? Warminchiskunata wawanchiskunataqa awqanchismi presota apanqa. ¡Aswan allinmi kanman Egipto suyuman kutipusunman chayqa! nispanku.

⁴Hukkuna hukkunawantaq ninakurqanku: —Huk umallita churakusun, hinaspa Egiptoman kutipusun, nispa.

⁵Hinan Moisesqa Aaronpiwan llapa runakunaq ñawpaqenpi uyampamanta pampaman wikch'ukurqanku.

⁶Suyu qhamiyaq riq Josuetaq Calebpiwan llakikuymanta p'achankuta llik'ikurqanku,

⁷hinaspa llapan Israel runakunata nirqanku: —¡Qhamiyaq risqayku hallp'aqa ancha allinpunin!

⁸Señor Dioschus sumaqta qhawariwasun chayqa, yanapawasunmi chay hallp'aman haykunanchispaq, payqa qowasunpuni. Chay suyuqa imaymanaq hunt'asqa wiñanan hallp'an kasqa.

⁹Chhaynaqa ama Señor Dios contra k'ulluchakuychischu, amataq chay suyupi tiyaq runakunatapas manchakuychischu, paykunata atipayqa t'anta mikhuy hinallan kanqa. Paykuna waqaychaqqa manan pipas kanchu, yanapaqninchismi ichaqa Señor Diosninchis. ¡Ama paykunata manchakuychischu! nispa.

¹⁰Chaywanpas runakunaqa ch'aqeytapunin paykunata munarqanku. Chaymi Señor Diospa lliphlli-kaynin Dioswan Tupana Karpapi rikhurirqan llapa Israel runakuna rikushaqtin,

¹¹hinan Señor Diosqa Moisesta nirqan: —¿Hayk'aqkamataq kay runakunari pisichashallawanqa? Paykuna ukhupi askha milagrokunata ruwashaqtiypas, ¿manapunichu hap'ipakuwanqaku?

¹²Huk millay wañuy onqoyta kachamusaq wañunankupaq, ahinapin paykunata ch'usaqyachisaq, qanmantataq ichaqa hatarichisaq huk hatun llaqtata, paykunamanta aswan atiyniyoqta, nispa.

¹³Moisestaq ichaqa kutichirqan: —Señor Diosnilláy, qanqa atiyniykiwanmi kay llaqtata Egipto suyumanta horqomurqanki. Egipto runakunaqa ruwasqaykita yachaspankun

¹⁴Canaán suyupi tiyaq runakunaman willanqaku. Señor Diosnilláy, kay llaqta chawpipi kashasqaykitaqa Canaán runakunapas uyarillanqakutaqmi, sut'ita rikuchikusqaykitapas, ñoqayku patapi phuyuyki kashasqantapas, p'unchaypi ñawpaqeykuta sayaq phuyupi rishasqaykitapas, tutataq sayaq ninapi rishasqaykitapas yachanku.

¹⁵Hukpaqkama kay llaqtata wañuchiqtiykiqa, mentasqa kasqaykita yachaq suyukunachá ninqaku:

¹⁶—Señor Diosqa Israel runakunatan qonanpaq prometesqan hallp'aman mana pusaykuyta atirqanchu, chaymi ch'inneqpi wañuchirqan, nispa.

¹⁷Chayrayku, Señor Diosnilláy, valekuyki hatun atiyniykita kunan rikuchinaykipaq, qanmi niwarqankiku:

¹⁸—Ñoqa Señor Diosqa manan usqhaylla phiñakuqchu kani, mana p'itiyllapuni munakuqmi kani, huchallikusqatapas mana kasukusqatapas pampachanin, chaywanpas huchayoqtaqa manapunin hinallatachu qhawani, aswanmi tayta-mamakunaq huchallikusqanmanta muchuchini wawankunata, nietonkunata, nietonpa wawankunata ima, nispayki.

¹⁹Chhaynaqa, mana p'itiy munakuq kasqaykiman hina kay llaqtaq huchanta pampachaykuy, kay llaqtataqa Egiptomantapachan kaykamaña muchushanki, nispa.

²⁰Hinan Señor Diosqa kutichirqan: —Allinmi, mañakuwasqaykiman hina pampachanin huchankuta.

²¹Ñoqaqa cheqaqtapunin kawsani, cheqaqtapuni lliphlli-kayniypas kay pachaman hunt'aykun

²²chay hinallataqmi cheqaqtapuni niyki: lliphlli-kayniyta rikuqkunapas, Egiptopipas ch'inneqpipas milagro ruwasqaykunata rikuqkunapas, yapapas-yapa ch'inneqpi wateqawaqkunapas, kamachikuyniyta mana kasukuqkunapas

²³manan rikunqakuchu machulankuman prometesqay hallp'ataqa. Ñoqa pisichawaqniykunaqa manapunin mayqenpas chay hallp'ataqa rikunqachu.

²⁴Caleb kamachiytan ichaqa qhamiyaq risqan suyuman pusaykusaq, hinaspa paypa miraynin chay suyuta hap'ikapunqa, paypa yuyayninqa manan wakinkunaq hinachu karqan, payqa tukuy sonqon kasuwarqanpas.

²⁵Chay suyu wayq'okunapiqa Amalek runakunan Canaán runakunapiwan tiyanku, chayrayku qankunaqa paqarin kutiripuychis, ch'inneqman riq ñanninta ripuychis Puka Qocha ladoman, nispa.

²⁶Chaymantataq Señor Diosqa Moisesta Aarontawan nirqan:

²⁷—¿Hayk'aqkamataq kay Israel millay runakunaq chhuchupakusqanta muchusaq? Ñoqa contra rimasqankuta uyariniñan.

²⁸Chayrayku paykunata nimuychis: Señor Diosmi nin: Ñoqaraykun jurani, imaynan rimarqankichis ahinatan qankunata ruwasqaykichis.

²⁹Iskay chunka watayoqmanta wichayman yupasqa runakunan kaypi wañunkichis ñoqa contra rimasqaykichis hawa, ayaykichispas kay ch'inneqpi wikch'usqan kanqa.

³⁰Manan mayqenniykichispas haykunkichischu hap'ikapunaykichispaq cheqaqtapuni prometesqay hallp'amanqa, Calebpiwan Josuellapiwanmi haykunqaku.

³¹Aswanpas “awqanchispa makinmanchá urmanqa” nisqaykichis wawaykichistan pusaykusaq pisichasqaykichis suyuman, paykunan chay suyuta hap'ikapunqaku.

³²Qankunataq ch'inneqpi wañunkichis,

³³ichaqa mana hunt'aq k'ullu kasqaykichisraykun wawaykichis muchuspa michipakuq hina purinqaku tawa chunka wata, llapaykichis kay ch'inneqpi wañunaykichiskama.

³⁴Qhamiyaqkunaqa tawa chunka p'unchaymi Canaán suyuta qhamiyarqanku, ahinallataqmi huchaykichismanta tawa chunka watata muchunkichis, sapa p'unchaymanta huk watata. Ahinapin qankuna contra kashaspay ruwasqayta yachankichis, nispa, nispaykichis.

³⁵Ñoqa Señor Diosmi chayta sut'inchani. Ahinatan ruwasaq ñoqa contra huñukuq kay millay runakunataqa, kay ch'inneqpin wañuyninku taripanqa, nispa.

³⁶Suyu qhamiyaqta Moisespa kachasqan qharikunan kutipuspanku, suyumanta mana allinta willaspa runakunata chhuchupachirqanku,

³⁷chaymi Señor Diosqa millay onqoywan wañuchirqan chay runakunata.

³⁸Llapan chaykunamantaqa Josuepiwan Calebllapiwanmi kawsarqanku.

³⁹Señor Diospa nisqan simikunatan Moisesqa Israel runakunaman willarqan, hinan paykunaqa llapanku sinchita llakikurqanku.

⁴⁰Qhepantin paqartaq tutallamanta hatarispanku aswan alto orqo-orqoman wicharqanku, paykunaqa ninakurqankun: — Huchallikurqanchismi, chaywanpas haku puririsun Señor Diospa prometewasqanchis cheqasman, nispa.

⁴¹Moisestaq ichaqa nirqan: —¿Imanaqtintaq Señor Diospa kamachisqanta mana kasukunkichischu? ¡Manan atipankichischu!

⁴²Ama riychischu, awqaykichismi atipamusunkichis. Señor Diosqa manan qankunawanñachu, aswanpas t'aqarikapunñan.

⁴³Amalek runakunan Canaán runakunapiwan chaypi kashanku, qankunataq maqanakuypi wañunkichis. Qankunaqa Señor Diostan saqerparirqankichis, chaymi Señor Diosqa mana qankunawanñachu, nispa.

⁴⁴Paykunataq ichaqa mana chaytapas kasukuspa aswan alto orqo-orqoman wicharqanku, ichaqa Señor Diospa rimanakuynin cajapas Moisespas manan karpa-karpamanta kuyurirqanchu.

⁴⁵Hinan orqo-orqopi tiyaq Amalek runakunaqa Canaán runakunapiwan paykuna contra uraykamurqanku, hinaspa Israel runakunata sinchita atipaspanku Hormakama qatirqanku.