Read Quechua Cuzco Bible 1988 NÚMEROS 15 Bible Online

NÚMEROS 15 - Quechua Cuzco Bible 1988 bible

NÚMEROS 15

¹Señor Diosmi Moisesta nirqan:

²—Israel runakunata niy: Señor Diosmi nin: Hap'ikapunaykichispaq qosqaykichis chay suyuman haykuspaqa,

³ruphachina sacrificiotapas, wak sacrificiotapas haywawankichismanmi torotapas, ovejatapas, cabratapas, prometekusqaykichista hunt'aspa, otaq munayniykichismanta ofrendata qospa, otaq fiestapi ofrendata qospapas. Chay haywawasqaykichis mikhuna ofrendaqa sonqoyman chayaq sumaq q'apaymi kanqa.

⁴Borregotapas cabratapas apaq runaqa sapanka sacrificiopaqmi qonqa huk kilo sumaq hak'uta huk litro aceitewan pitusqata, huk litro vinotawan.

⁶Huk anejota apaqqa chay sacrificiotawan kuska haywanqa iskay kilo sumaq hak'uta huk litro yaparisqa aceitewan pitusqata,

⁷huk litro yaparisqa vinotawan, sonqoyman chayaq sumaq q'apaypuni kananpaq.

⁸Pipas prometekusqanta hunt'aspa otaq sumaq kawsay sacrificiota haywayta munaspapas huk torillota apanqa ruphachina sacrificiopaqpas wak sacrificiopaqpas chayqa,

⁹chay sacrificiotawan kuskan haywanqa kinsa kilo sumaq hak'uta yaqa iskay litro aceitewan pitusqata,

¹⁰yaqa iskay litro vinotawan, chaymi sonqoyman chayaq sumaq q'apayniyoq mikhuna ofrenda kanqa.

¹¹Toro sacrificiotapas, anejo sacrificiotapas, borrego sacrificiotapas, cabra sacrificiotapas haywawankichis chayqa, tupaqnin ofrendantintakama haywankichis hayk'aña kaqtinpas.

¹³Llapan Israel runakunan sonqoyman chayaq mikhuna ofrendata haywashawaspankuqa chay kamachikuyta hunt'anqaku.

¹⁴Wak llaqtayoq runakuna, qankuna ukhupi tiyaqpas mana chayqa purikuqllapas, sonqoyman chayaq sumaq q'apayniyoq mikhuna ofrendata ñoqaman haywayta munanqa chayqa, qankunapaq kamachikuy kikin kamachikuyllatataqmi hunt'anqaku. Chay kikin ruwaymi qankunapaqpas wak llaqtayoqpaqpas kanqa, ch'ulla kamachikuyllan wiñaypaq kanqa, qankunapaqpas mirayniykichispaqpas.

¹⁶Chay kikin kamachikuymi unanchaymi qankunapaqpas wak llaqtayoqpaqpas kanqa, nispa, nispayki.

¹⁷Señor Diosmi Moisesta nirqan:

¹⁸—Israel runakunata niy: Señor Diosmi nin: Ñoqa pusaykusqaykichis chay suyuman haykuspa,

¹⁹chay hallp'aq rurusqanta mikhuspaykichisqa, ofrenda haywawanaykichispaqmi wakinta t'aqankichis.

²⁰Imaynatachus haywawankichis ñawpaqkaq saruy trigota t'aqaspa chhaynallatataqmi ñawpaqkaq chapusqaykichis masamanta huk tortata ruwaspa haywawankichis.

²¹Ñawpaqkaq chapusqaykichis masa ofrendataqa qollawankichispunin qankunapas mirayniykichispas.

²²Mayqenniykichispas mana yuyaypichu Moiseswan kamachisqay mayqen simiytapas p'akinkichis,

²³otaq mirayniykichispas hamuq tiempopi mana yuyaypichu p'akinman,

²⁴llapa llaqtapas mana reparakuspa huchallikuwaqchis chayqa, llapa llaqta huk torillota sonqoyman chayaq sumaq q'apayniyoq ruphachina sacrificiota haywawankichis, chay sacrificiotawan kuskataq ruru ofrendatapas vino ofrendatapas haywawankichis, hinallataq huk orqo cabratapas hucha pampachay sacrificiota hina.

²⁵Hinan sacerdoteqa chay orqo cabrata haywawanqa llapa Israel runakunaq huchan pampachasqa kananpaq, ñoqataq huchaykichista pampachasqaykichis, mana yuyaypichu huchallikusqaykichisrayku, mikhuna ofrendatapas hucha pampachay sacrificiotapas haywawasqaykichisraykupiwan.

²⁶Llapaykichismi qankunapas qankunawan tiyaq wak llaqtayoqkunapas pampachasqa kankichis, llapa llaqta mana yuyaypichu huchallikusqaykichisrayku.

²⁷Mana yuyaypichu huk runa huchallikuspaqa, paymi watayoq cabrata hucha pampachay sacrificiopaq apamunqa.

²⁸Chaytan sacerdoteqa ñoqaman sacrificiota haywawanqa chay runaq mana yuyaypichu huchallikusqan pampachasqa kananpaq, hinan ñoqa chay huchata pampachasaq.

²⁹Mana yuyaypichu huchallikusqapaqqa chay kikin kamachikuyllan kanqa, qankunapaqpas qankunawan tiyaq wak llaqtayoqkunapaqpas.

³⁰Ichaqa huk runa yuyaypi huchallikunqa, Israel runapas wak llaqtayoqpas chayqa, ñoqatan sarunchawan. Chayrayku chay runaqa ayllun ukhupi wañuchisqa kanqa.

³¹Simiytan pisichan manataq kamachisqayta hunt'anchu, chaymi hukpaqkama ch'usaqyachisqa kanqa, pay kikinmi wañuchinapaq huchallikurqan, nispa, nispayki.

³²Israel runakuna ch'inneqpi kashaqtinmi samana p'unchaypi huk qharita llant'a pallashaqta tarirqanku.

³³Hinaspan chay qharita Moisesman Aaronman llapa runakunamanwan aparqanku.

³⁴Chaymi paykunaqa huk karpaman wisq'arqanku, manaraqmi unanchasqachu karqan imaynatachus chay runata ruwananpaq.

³⁵Hinan Señor Diosqa Moisesta nirqan: —Chay runaqa wañuchinapaq huchachasqan kanqa, llapan Israel runakuna karpa-karpamanta sapaqman horqospa rumiwan ch'aqechunku, nispa.

³⁶Chaymi Israel runakunaqa karpa-karpamanta sapaqman horqospanku, wañunankama ch'aqerqanku, Señor Diospa Moisesta kamachisqanman hina.

³⁷Señor Diosmi Moisesta nirqan:

³⁸—Israel runakunata niy: Señor Diosmi nin: Qankunapas mirayniykichispas p'achaykichispa ch'ullpanpi chhaqchakunata ruwakunkichis. Chay chhaqchapiqa huk sani-puka q'aytun kanqa.

³⁹Chay chhaqchakunata rikuspan qankunaqa tukuy kamachikuyniyta yuyarinkichis, ahinapin hunt'ankichis, amataq kikiykichispa yuyayniykichiswan munayniykichiswanpas waqllinaykichispaq aysachikunkichischu.

⁴⁰Llapan kamachikuyniykunata makilla hunt'ankichis, chhaynapin ñoqa Diosniykichispaq t'aqasqa kankichis.

⁴¹Ñoqan Apu Señor Diosniykichis kani, Diosniykichis kanaypaqmi Egipto suyumanta horqomurqaykichis. Ñoqaqa Apu Señor Diosniykichismi kani, nispa, nispayki.