Read Quechua Cuzco Bible 1988 NÚMEROS 16 Bible Online

NÚMEROS 16 - Quechua Cuzco Bible 1988 bible

NÚMEROS 16

¹Leví ayllumanta Kohatpa miraynin Izharpa churin Koré, Rubén ayllumanta Eliabpa churinkuna Datanwan Abiramwan, Peletpa churin Onpiwanmi hatunchakuspanku

²Moisés contra sayarirqanku. Paykunawantaq huñukurqan iskay pachak phisqa chunkayoq Israel runakuna, chaykunan karqan llaqta kamachiq qharikuna, llaqtaq huñukuyninpi umalli qharikuna.

³Paykunan llapanku huñukurqanku, hinaspan Moisesman Aaronmanwan qayllaykuspa nirqanku: —¡Chaykamalla kachun munaychakuyniykichisqa! Llapa llaqtan Señor Diospaq t'aqasqa, payqa llapanchiswantaqmi kashan. ¿Imanaqtinmi qankunaqa Señor Diospa llaqtanta hatun atiyniyoq hina kamachinkichis? nispanku.

⁴Chayta uyarispan Moisesqa uyanpamanta pampaman wikch'ukurqan,

⁵chaymantataq Koreta llapan paywan kashaqkunatawan nirqan: — Paqarin tutamantan Señor Diosqa sut'inchanqa pichus paypa akllakusqanpas paypaq t'aqasqa kaqpas kasqanta. Chay akllakusqan qharillatan Señor Diosqa ofrendata haywaqpaq qayllaykuchinqa.

⁶Qan, Koré, qanwan huñukuq runakunapiwan. incienso q'osñichinakunata paqarin tutamanta apamuychis, hinaspa sansata churaykuspa inciensota chayman hich'aykunkichis, hinaspataq Señor Diospa altarninman churankichis. Mayqen qharitachus Señor Dios akllakunqa, chay qharin Señor Diospaq t'aqasqa kanqa. ¡Leví runakuna amaña hatunchakuychischu! nispa.

⁷

⁸Moisesqa Koreta ayllu-masinkunatawan nillarqantaq: —¡Yaw Leví runakuna, uyariwaychis!

⁹¿Imanaqtintaq pisipaq hap'inkichis Israelpa Diosnin llaqtan ukhumanta akllakuspa payman qayllaykuchisqasuykichista? Paymi akllarqasunkichis paywan Tupana Karpapi llank'anaykichispaq, kay llaqtata servinaykichispaqpas.

¹⁰Señor Diosmi munarqan qanpas Leví ayllu llapan runakunapas paypa qayllanpi kanaykichista, chaywanpas, ¿sacerdote-kaytachu hillupakullankichistaq?

¹¹Manan Aarón contrachu chhuchupakushankichis, aswanpas kikin Señor Dios contran qanpas qanwan huñukuq runakunapas sayarishankichis, nispa.

¹²Chaymantataq Moisesqa waqyachirqan Eliabpa churinkuna Datanta Abiramtawan. Paykunataq ichaqa kutichirqanku: —Manan hamuykumanchu.

¹³Qanqa imaymanaq hunt'asqa wiñanan suyumantan pusamuwarqankiku kay ch'inneqpi wañunaykupaq, ¿ima astawantaq munanki? ¿Hatun atiyniyoq hinachu ñoqaykuta munaychakuyta munanki?

¹⁴Qanqa manaraqmi imaymanaq hunt'asqa wiñanan suyumanpas pusaykuwankikuchu, manallataq hallp'atapas uvas chakratapas qowankikuchu. ¿Zonzota hinachu q'otuyta munawankiku? ¡Manan! Manan hamuykumanchu, nispa.

¹⁵Hinan Moisesqa sinchita phiñakuspa Señor Diosta nirqan: — ¡Ama ofrendankuta chaskiychu! Manan ñoqaqa huk asnollankutapas paykunamanta qechurqanichu, manataq mayqenninkutapas mana allinta ruwarqanichu, nispa.

¹⁶Chaymantataq Moisesqa Koreta nirqan: —Señor Diospa ñawpaqenman paqarin asuykamunkichis qanpas qanwan huñukuq runakunapas. Aaronpas chaypin kallanqataq.

¹⁷Paykunan sapanka incienso q'osñichinankuta apamunqaku, inciensotawan churaykuspa. Qanpas Aaronpas apamullankichistaq incienso q'osñichinaykichista, hinaspa Señor Diospa altarninman churankichis iskay pachak phisqa chunkayoq incienso q'osñichinatawan kuskata, nispa.

¹⁸Hinan paykunaqa sapanka incienso q'osñichinankuta hap'ispa sansata inciensotawan churarqanku, hinaspa Dioswan Tupana Karpa punkupi Moisespiwan Aaronpiwan kuska sayaykurqanku.

¹⁹Koreqa ñan karpaq ñawpaqenpi llapa llaqtata Moisés contra Aarón contrapiwan huñuykusqaña. Chayllamanmi señor Diospa lliphlli-kayninqa rikhurirqan llapa runakunaq rikushasqan.

²⁰Hinan Señor Diosqa Moisestawan Aarontawan nirqan:

²¹—¡Kay llaqtamanta t'aqakuychis, kunanpachan lliwta wañuchisaq! nispa.

²²Paykunataq chayta uyarispa uyanpamanta pampaman wikch'ukurqanku, hinaspa nirqanku: —¡Ay, Diosnillayku! Qanqa llapa runakunaman kawsay qoqmi kanki. ¿Llapa llaqtapaqchu phiñakunki huk runaq huchallanmanta? nispa.

²³Señor Diostaq Moisesman kutichirqan: —

²⁴Llapan Israel runakunata niy: Korepa, Datanpa, Abirampa tiyasqanku karpakunamanta t'aqakuychis, nispayki, nispa.

²⁵Chaymantataq Moisesqa sayarispa Datanpata Abirampatawan rirqan, Israel kurak runakunapas qhepanta rillarqantaq.

²⁶Hinan Moisesqa llapa runakunata nirqan: —Chay mana chanin qharikunaq karpankumanta t'aqakuychis, amataq paykunaq ima kaqnintapas llamiykuychischu, paqtan qankunapas paykunaq huchanku hawa ch'usaqyachisqa kallawaqchistaq, nispa.

²⁷Chaymi llaqtaqa Korepa, Datanpa, Abirampa karpankumanta t'aqakurqanku. Datanwan Abiramwanqa karpanku punkupin sayasharqanku warmintin wawantinkama.

²⁸Moisestaq nirqan: —Kunanmi yachankichis Señor Diospa kamachisqan tukuy kaykunata ruwashasqayta, manataq ñoqaq munasqaytachu.

²⁹Kay qharikuna iman wañunanta wañunqaku, imaynan llapa runapas wañun hinata chayqa, manan Señor Diospa kachamusqanchu kani.

³⁰Ichaqa Señor Dioschus mana hayk'aq rikusqanchista ruwaqtin, pampa kicharqokuspa paykunata llapan kaqninkunantinta millp'unqa, kawsashaqtaq pachaq ukhunmanpas chinkaykunqaku, chaypachan yachankichis kay qharikunaqa Señor Diosta pisichaq kasqankuta, nispa.

³¹Chay simikunata Moisés rimayta tukuqtinmi paykunaq kasqan cheqas pampa kicharikurqan,

³²hinaspa Datanta Abiramtawan familiantintakama millp'urqan, hinallataq Koretapas lliw kaqninkunantinta runankunantinta millp'urqan.

³³Pachaq ukhunmanmi kawsashaq chinkaykurqanku tukuy kaqninkunantin, pachataq kaqta wisq'akapurqan. Ahinapin chay runakunaqa Israel llaqta ukhumanta ch'usaqyachisqa karqanku.

³⁴Muyuriqpi kashaq llapan Israel runakunataq chay runakunaq qaparisqanta uyarispanku usqhaylla ayqerqanku. Ninakurqankutaq: — ¡Haku! ¡Paqtan ñoqanchistapas pacha millp'uwasunman! nispa.

³⁵Hinallataq Señor Diosqa ninata kachamurqan, hinan chay iskay pachak phisqa chunkayoq incienso haywaq qharikunata rupharqan.

³⁶Señor Diostaq Moisesta nirqan:

³⁷—Aaronpa churin Eleazarta kamachiy, ruphasqa chawpimanta incienso q'osñichinakunata horqomuchun, sansan kashanmanraq chayqa karuman hich'amuchun.

³⁸Huchallikusqanku hawa wañurqan chay qharikunaq incienso q'osñichinankuqa ch'uyanchasqan qhepan, altarniypi inciensota haywanawankupaq apasqankurayku. Chhaynaqa chaykunamanta llaphllakunata takaychis chaywan altarta qatanaykichispaq. Chay llaphllakunaqa Israel runakunaq yuyarinanpaq señalmi kanqa, nispa.

³⁹Hinan sacerdote Eleazarqa wañusqa qharikunaq broncemanta incienso q'osñichinankuta hoqarirqan, hinaspataq llaphllakunata takaspanku altarta qatanankupaq kamachirqan.

⁴⁰Chay qatasqanku llaphllata rikuspan llapa Israel runakunaqa yuyariqku Aaronpa miraynillanpuni Señor Diosman inciensota haywaqqa kasqankuta. Chay llaphllaqa yuyarichillantaqmi pipas mana Aaronpa miraynin kashaspa incienso haywaqqa Koré hina wañunanta. Tukuy chaykunatan ruwarqanku Señor Diospa Moiseswan Eleazarta kamachisqanman hina.

⁴¹Qhepantin p'unchaytaq llapa Israel llaqta Moisespa Aaronpa contranpi rimayta qallarispa nirqanku: —¡Qankunaqa Señor Diospa llaqtantan wañuchishankichis! nispa.

⁴²Llapan runataq Moisespa Aaronpa muyuriqninpi ch'aqwaq huñukurqanku, hinaspan paykunaqa Dioswan Tupana Karpata qhawarirqanku. Hinan chay rato karpata phuyu pakarqorqan, Señor Diospa lliphlli-kaynintaq rikhurirqan.

⁴³Hinan Moisesqa Aaronpiwan karpa punkuman rirqanku,

⁴⁴Señor Diostaq Moisesta nirqan:

⁴⁵—¡Kay llapa runakunamanta t'aqakuychis, kunanpachan lliwta wañuchisaq! nispa. Hinan Moisesqa Aaronpiwan uyanpamanta pampaman wikch'ukurqanku.

⁴⁶Moisestaq Aaronta nirqan: —Incienso q'osñichinaykita apamuy, altarmanta sansata churaykuspataq inciensota hich'aykuy, hinaspa usqhaylla riy huñuykusqa kashaq runakunaman, paykunaq huchankumantataq Señor Diosmanta pampachayta mañakuy, Señor Diospa k'arak phiñakuyninmi q'oñirin, chaymi runakunaqa wañuyta qallarinña, nispa.

⁴⁷Hinan Aaronqa Moisespa kamachisqanman hina usqhaylla phawarirqan huñuykusqa runakunaman. Wañuy onqoyqa runakunata wañuchisharqanñan. Hinan Aaronqa incienso q'apayta haywaspa llaqtata huchankumanta pampachachirqan.

⁴⁸Chaymantataq ayakunawan kawsaq runakunawan tupaypi sayaykurqan, hinan wañuy onqoyqa thanipurqan.

⁴⁹Chaykamaqa ñan chunka tawayoq waranqa qanchis pachakniyoq runakunaña wañurqorqan, Korepa huchan hawa ñawpaqtaraq wañuq runakunaqa sapaqmi karqan.

⁵⁰Wañuy onqoy thanipuqtintaq Aaronqa karpa punkuta Moisesman kutipurqan.