Read Quechua Cuzco Bible 1988 NÚMEROS 2 Bible Online

NÚMEROS 2 - Quechua Cuzco Bible 1988 bible

NÚMEROS 2

¹Señor Diosmi Moisestawan Aarontawan nirqan:

²—Israel runakunaqa Ñoqawan Tupana Karpaq huk chhikan karupacha muyuriqninpin karpakunqaku, sapanka t'aqa banderantinkama, sapanka ayllupas banderantinkamallataq.

³Inti lloqsimuy ladopin karpakunqa Judá nisqa t'aqa banderantin. Chaypin kanqa Judá ayllu runakuna, umallinkutaq Aminadabpa churin Naasón,

⁴paykunan llapanku kanqa qanchis chunka tawayoq waranqa soqta pachakniyoq qharikuna.

⁵Paykunawan kuska karpakunqa Isakar ayllu runakuna, umallinkutaq Zuarpa churin Natanael kanqa,

⁶llapankupitaq phisqa chunka tawayoq waranqa tawa pachakniyoq qharikuna.

⁷Hinallataq Zabulón ayllu runakunapas paykunawan kuska karpakunqa, umallinkutaq Helonpa churin Eliab kanqa,

⁸llapankupitaq phisqa chunka qanchisniyoq waranqa tawa pachakniyoq qharikuna.

⁹Chay hinapin Judá nisqa t'aqapi kinsa ayllu huñuykusqa kanqa, llapankupitaq pachak pusaq chunka soqtayoq waranqa tawa pachakniyoq qharikuna. Paykunan Israel llaqtaq ñawpaqenta purinqaku.

¹⁰Uray ladopitaq karpakunqa Rubén nisqa t'aqa banderantin. Chaypin kanqa Rubén ayllu runakuna, umallinkutaq Sedeurpa churin Elisur,

¹¹paykunan llapanku kanqa tawa chunka soqtayoq waranqa phisqa pachakniyoq qharikuna.

¹²Paykunawan kuska karpakunqa Simeón ayllu runakuna, umallinkutaq Zurisadaipa churin Selumiel kanqa,

¹³llapankupitaq phisqa chunka isqonniyoq waranqa kinsa pachakniyoq qharikuna.

¹⁴Hinallataq Gad ayllu runakunapas paykunawan kuska karpakunqa, umallinkutaq Reuelpa churin Eliasaf kanqa,

¹⁵llapanpitaq tawa chunka phisqayoq waranqa soqta pachakniyoq phisqa chunka qharikuna.

¹⁶Chay hinapin Rubén nisqa t'aqapi kinsa ayllu huñuykusqa kanqa, llapankupitaq pachak phisqa chunka hukniyoq waranqa tawa pachak phisqa chunkayoq qharikuna. Paykunan Judá nisqa t'aqaq qhepanta rinqaku.

¹⁷Leví runakunataq Ñoqawan Tupana Karpata apaspa rinqaku iskay t'aqaq qhepanta, iskay t'aqaq ñawpaqenta. Chay tawantin t'aqa runakunaqa karpakusqankuman hinan qati-qati puririnqa sapanka t'aqa banderantinkama.

¹⁸Inti haykuy ladopitaq karpakunqa Efraín nisqa t'aqa banderantin. Chaypin kanqa Efraín ayllu runakuna, umallinkutaq Amiudpa churin Elisama,

¹⁹paykunan llapanku kanqa tawa chunka waranqa phisqa pachakniyoq qharikuna.

²⁰Paykunawan kuska karpakunqa Manasés ayllu runakuna, umallinkutaq Pedasurpa churin Gamaliel kanqa,

²¹llapankupitaq kinsa chunka iskayniyoq waranqa iskay pachakniyoq qharikuna.

²²Hinallataq Benjamín ayllu runakunapas paykunawan kuska karpakunqa, umallinkutaq Gedeoniq churin Abidán kanqa,

²³llapankupitaq kinsa chunka phisqayoq waranqa tawa pachakniyoq qharikuna.

²⁴Chay hinapin Efraín nisqa t'aqapi kinsa ayllu huñuykusqa kanqa, llapankupitaq pachak pusaqniyoq waranqa pachakniyoq qharikuna. Paykunan Leví runakunaq qhepanta rinqaku.

²⁵Wichay ladopitaq karpakunqa Dan nisqa t'aqa banderantin. Chaypin kanqa Dan ayllu runakuna, umallinkutaq Amasadaipa churin Ahiezer,

²⁶paykunan llapanku kanqa soqta chunka iskayniyoq waranqa qanchis pachakniyoq qharikuna.

²⁷Paykunawan kuska karpakunqa Aser ayllu runakuna, umallinkutaq Okranpa churin Pagiel kanqa,

²⁸llapankupitaq tawa chunka hukniyoq waranqa phisqa pachakniyoq qharikuna.

²⁹Hinallataq Neftalí ayllu runakunapas paykunawan kuska karpakunqa, umallinkutaq Enanpa churin Ahira kanqa,

³⁰llapankupitaq phisqa chunka kinsayoq waranqa tawa pachakniyoq qharikuna.

³¹Chay hinapin Dan nisqa t'aqapi kinsa ayllu huñuykusqa kanqa, llapankupitaq pachak phisqa chunka qanchisniyoq waranqa soqta pachakniyoq qharikuna, paykunan qhepa puntata rinqaku banderantinkama, nispa.

³²Ahinapin Israel runakunaqa t'aqankuman hina ayllunkuman hina yupasqa karqanku soqta pachak kinsayoq waranqa phisqa pachak phisqa chunkayoq qharikuna.

³³Leví runakunaqa manan yupasqachu karqan, Señor Diospa Moisesta kamachisqanman hina.

³⁴Israel runakunaqa lliwtan ruwarqanku Señor Diospa Moisesta kamachisqanman hina, chay hinatan karpakurqanku banderankuman hina, ayllunkuman familiankuman hinataq puririrqanpas.