Read Quechua Cuzco Bible 1988 NÚMEROS 20 Bible Online

NÚMEROS 20 - Quechua Cuzco Bible 1988 bible

NÚMEROS 20

¹Israel runakunan Zin ch'inneqman chayarqanku wata qallariy killapi, hinaspan Kadespi karpakurqanku. Chaypin María wañukapurqan, chaypitaq p'ampapurqanku.

²Llapan Israel runakunan unu mana kaqtin Moisés contra Aarón contrapiwan huñukuspa ch'aqwarqanku,

³hinaspa Moisesta nirqanku: —¡Wakin llaqta-masinchiskuna Señor Diospa qayllanpi wañushaqtin ñoqaykupas wañupuykuman karqan!

⁴¿Imapaqmi qankuna Señor Diospa llaqtanta kay ch'inneqman pusamunkichis? ¿Ñoqaykutapas uywaykutapas wañunaykutachu munankichis?

⁵¿Imapaqmi Egipto suyumanta pusamuwarqankiku kay millay cheqasman? ¡Kaypiqa manan wiñanchu trigopas, higospas, uvaspas, granadapas! ¡Manan unullapas kanchu! nispa.

⁶Hinan Moisespiwan Aaronpiwanqa huñuykusqa runakunaq qayllanmanta hatarispa Dioswan Tupana Karpa punkuta rirqanku, hinaspa chaypi uyanpamanta pampaman wikch'ukurqanku. Hinan Señor Diospa lliphlli-kaynin rikhurirqan,

⁷Señor Diostaq Moisesta nirqan:

⁸—Rimanakuy cajaq ñawpaqenpi kashaq tawnata hoqariy, hinaspa wawqeyki Aaronpiwan runakunata huñuychis. Chaymantataq llapa runakunaq qayllanpi qaqata kamachinki unuta phawachinanpaq. Ahinapi unuta qaqamanta phawachinki, hinan llapa Israel runakunapas uywakunapas ukyanqaku, nispa.

⁹Moisestaq Señor Diospa ñawpaqenmanta tawnata hoqarirqan, paypa kamachisqanman hina.

¹⁰Chaymantataq Moisespiwan Aaronpiwan qaqaq qayllanman runakunata huñurqanku, hinan Moisesqa runakunata nirqan: — Uyariwaychis, k'ullu runakuna, ¿kay qaqamantachu unuta horqosaqku qankunaman ukyachinaykupaq? nispa.

¹¹Chaymantataq Moisesqa iskay kutita tawnawan qaqata waqtarqan hinan qaqamanta askha unu phawarqan, chaytan Israel runakunapas uywankupas ukyarqanku.

¹²Señor Diostaq Moisestawan Aarontawan nirqan: —Qankunaqa manan hap'ipakuwarqankichischu, Israel runakunaq qayllanpipas manan ch'uya-kayniyta respetawarqankichischu, chayraykun paykunaman qonay suyumanqa Israel runakunata mana pusaykunkichischu, nispa.

¹³Chay cheqaspin Israel runakunaqa Señor Dios contra Chhuchupakurqanku, hinan Señor Diosqa ch'uya kasqanta paykunaman rikuchirqan, chaymi chay cheqasqa Meriba[5] pukyu nisqa kapurqan.

¹⁴Kadesmantapachan Moisesqa Edom suyu reyman willaqkunata kacharqan ninankupaq: Wawqeyki Israelmi nisunki: Qanqa allintan yachanki tukuy sasachakuykuna taripawasqankuta.

¹⁵Machulaykun Egipto suyuman risqaku, hinaspan chaypi unayta tiyasqaku. Egipto runakunan paykunata muchuchisqa, chay hinallatataqmi ñoqaykutapas muchuchiwarqanku.

¹⁶Chaymi Señor Diosmanta mañakurqayku, paytaq waqyakusqaykuta uyarispa angelta kachamuwarqanku, hinaspan Egipto suyumanta horqomuwarqanku. Chaymi qanpa suyuyki qorpa Kades llaqtapi kashayku.

¹⁷Chhaynaqa, valekuykikun suyuyki ñanta pasarichinawaykikuta. Manan chakra-chakrantachu pasasaqku, manataqmi uvas chakrantapaschu, manallataq pukyuykikunamantapas unuta ukyasaqkuchu. Aswanpas hatun ñannillantapunin pasasaqku, suyuykita pasanaykukamaqa manan maymanpas kutirisaqkuchu, nispa.

¹⁸Edom reytaq ichaqa kutichirqan: —¡Manan suyuytaqa pasawaqchischu, mana chayqa qankunawan maqanakuqmi hamusaqku! nispa.

¹⁹Israel runakunataq nirqanku: —Hatun ñannillantapunin pasasaqku, ñoqaykupas otaq uywaykupas pukyuykikunamanta unuta ukyaykuman chayqa, pagapusqaykikun. Suyuykitaqa purispallan pasasaqku, nispa.

²⁰Edom reytaq kutichirqan: —¡Manapunin pasawaqchischu! nispa. Hinaspa Israel runakunawan maqanakuq rirqan allin armasqa atiyniyoq ejercitonpiwan.

²¹Chaymi Israel runakunaqa wak ñanninta ripurqanku, Edom suyu runakuna mana pasachiyta munasqan hawa.

²²Llapa Israel llaqtan Kadesmanta puririrqan Hor orqo cheqasman.

²³Hinan Señor Diosqa Edom suyuq qorpan Hor orqopi Moisesta Aarontawan nirqan:

²⁴—Aaronmi wañukapunqa, manan haykunqachu Israel runakunaman qonay hallp'aman, Meriba unu pukyu qayllapi kamachisqayta mana kasuwasqaykichis hawa.

²⁵Qan, Moisés, Aaronta churin Eleazartawan Hor orqo pataman pusay,

²⁶hinaspa chaypi Aaronpa sacerdote p'achanta ch'utispa Eleazarta p'achachinki. Aaronqa chaypin wañukapunqa, nispa.

²⁷Moisestaq Señor Diospa kamachisqanta hina ruwarqan. Llapa Israel llaqta rikushaqtinmi paykunaqa Hor orqoman wicharqanku.

²⁸Hinan Moisesqa Aaronpa sacerdote p'achanta ch'utispa Eleazarta chay p'achawan p'achachirqan. Aaronmi chay orqo patapi wañukapurqan, chaymantataq Moisesqa Eleazarpiwan orqomanta uraykampurqanku.

²⁹Israel runakunataq Aaronpa wañukapusqanta yachaspanku, huk killa hunt'a Aaronmanta waqarqanku.