Read Quechua Cuzco Bible 1988 NÚMEROS 22 Bible Online

NÚMEROS 22 - Quechua Cuzco Bible 1988 bible

NÚMEROS 22

¹Israel runakunaqa puririllarqankutaq, hinaspa Moab suyu pampapi karpakurqanku, chaymi karqan Jericó llaqta qhawaypi, Jordán mayu inti lloqsimuy ladopi.

²Moab suyu rey Ziporpa churin Balakmi repararqan imaynatachus Israel runakuna Amor runakunata atipasqanta.

³Runakunapas Israel runakunaq ancha askha kasqanta rikuspan sinchita mancharikurqanku.

⁴Chaymi paykunaqa Madián runa kurak taytakunata nirqan: —Tukuy chay runakunaqa hallp'anchistachá q'ararqapunqa, imaynan huk toro campopi q'achuta lliwta ch'usaqyachin hinata, nispa.

⁵Hinan rey Balakqa Beorpa churin Balaam waqyaqta kacharqan. Balaamqa Amav suyupi Eufrates mayu qaylla Petor llaqtapin tiyarqan. Balakmi kachasqankunawan nichirqan: —Egipto suyumantan huk llaqta hamuspa hinantinman ch'eqeykushan, kunantaq munaychakuwananku patapi kashanku.

⁶Ama hinachu kay, hamullawaypuni, chay runakunata ñakapuway, paykunaqa ñoqaykumanta aswan atiyniyoqmi. Ichapaschá ñoqa atipayman, hinaspa kay suyumanta qarqoyman. Ñoqaqa allintan yachani, ñakasqaykiqa ñakasqa kasqanta, saminchasqaykipas saminchasqa kasqanta, nispa.

⁷Hinan Moab suyu kurak runakunaqa Madián runa kurak taytakunapiwan Balaamman rirqanku, watusqamanta pagananpaq qolqeta aparikuspa, chayaspankutaq Balakpa nisqanta willarqanku.

⁸Hinan Balaamqa nirqan: —Kaypi samakuychis, paqarinña Señor Diospa kamachiwasqanta willasqaykichis, nispa. Hinan Moab runakunaqa Balaamwan qhepakurqanku.

⁹Diostaq Balaamman rikhurirqan, hinaspa tapuykurqan: — ¿Pikunataq qanwan kashan chay qharikunari? nispa.

¹⁰Balaamtaq kutichirqan: —Moab rey Balakmi ñoqaman kachamuwasqa:

¹¹Egipto suyumanta huk llaqta hamuspanmi hinantinman ch'eqeykushan. Ama hinachu kay, hamullawaypuni, chay runakunata ñakapuway. Ichapaschá atipaspa suyuymanta qarqoyman, nispa, niwaqta.

¹²Chaymi Diosqa Balaamta nirqan: —Ama chay runakunawan riychu, amataq chay llaqtatapas ñakaychu, ñoqan paykunataqa samincharqani, nispa.

¹³Hinan Balaamqa qhepantin p'unchay tutallamanta hatarispa, Balakpa kachasqan umallikunata nirqan: — Llaqtaykichista kutipuychis, Señor Diosmi qankunawan rinayta mana munanchu, nispa.

¹⁴Moab suyu umallikunataq kutipuspa Balakta nirqanku: — Manan Balaamqa hamuyta munanchu, nispa.

¹⁵Hinan Balakqa wak umallikunata aswan askhata kacharqan, paykunan karqan ñawpaq kachasqanmantaqa aswan mentasqa umallikuna.

¹⁶Paykunataq chayaspa Balaamta nirqanku: —Rey Balakmi nisunki: Ama hinachu kay, valekuykin hamunaykita. Amayá: Manan, niwaychu.

¹⁷Ñoqaqa anchatapunin qhapaqyachisqayki, tukuy ima nisqaykitataq ruwasaqpas. Ama hina kaychu, hamuy, chay runakunata ñakapuway, nispan, nispa.

¹⁸Balaamtaq ichaqa paykunaman kutichirqan: —Wasinpi hayk'an kaq qorita qolqetaña llapanta Balak qowanman chaypas, Apu Señor Diosniypa kamachiwasqanta p'akispaqa manapunin imatapas ruwaymanchu.

¹⁹Chaywanpas kaypi puñukuychis, ñoqataq Señor Diosta tapusaq icha imatawanpas niwanman, nispa.

²⁰Chay tutataq Diosqa Balaamman rikhurispa nirqan: — Chay runakuna qanta pusaq hamun chayqa paykunawan riy, ichaqa imatachus ñoqa kamachisqayki chayllata ruwanki, nispa.

²¹Hinan Balaamqa qhepantin paqar tutallamanta china asnonta caronakuspa, Moab suyu umallikunapiwan rirqan.

²²Diosmi ichaqa Balaampa risqanmanta phiñakurqan, chaymi iskay kamachinkunapiwan rishaqtin Señor Diospa angelnin ñanta hark'arqan mana purinanpaq.

²³Sillakusqan asnoqa Señor Diospa angelnintan espada hap'intinta rikurqan, chaymi asnoqa ñanmanta chakra-chakraman pulqarirqan. Balaamtaq waqtalla asnota ñanman kutichirqan.

²⁴Chaymantataq Señor Diospa angelninqa uvas chakra chawpinta pasaq k'illku ñanpi sayaykurqan, chay ñanmi iskay ladonmanta rumiwan perqasqa karqan.

²⁵Hinan asnoqa Señor Diospa angelninta rikuspa huk lado rumi kancha perqaman k'iraykuspa, Balaampa chakinta kanchaman ñit'irqan. Chaymi Balaamqa wakmanta asnota waqtarqan.

²⁶Señor Diospa angelnintaq paykunamanta ñawparispa huk sinchi k'illku ñan cheqaspi sayaykurqan, chay cheqaspiqa manan may ladoman k'iskiykunapas karqanchu.

²⁷Hinan asnoqa angelta rikuspa pampapi puñurparirqan. Balaamtaq sinchi phiñasqa huk k'aspiwan asnota waqtarqan.

²⁸Chay raton Señor Diosqa asnota rimachirqan, chaymi asnoqa Balaamta nirqan: —¿Imanaykitaq ñoqari? Kinsa kutitañan waqtawanki, nispa.

²⁹Balaamtaq kutichirqan: —Pukllakushankin ñoqawan, cuchillollay makiypi kashanman, kunitanmi nak'arqoykiman, nispa.

³⁰Asnotaq nirqan: —Ñoqan silla asnoyki kani, uywawasqaykimantapacha kunankama sillakuwanki, manataqmi hayk'aqpas khaynata ruwarqaykichu, qanmi allinta yachanki, nispa. Balaamtaq kutichirqan: —Arí, hinapunin, nispa.

³¹Hinan Señor Diosqa Balaamman angelninta rikuchirqan, chay angelmi espada hap'iykusqa ñanpi sayashasqa. Chaymi Balaamqa angelta rikuspa pampakama k'umuykukurqan.

³²Angeltaq Balaamta tapurqan: —¿Imanaqtinmi kinsa kutitaña asnoykita waqtanki? Ñoqan purinaykita hark'arqayki, purisqayki mana chaninchu ñoqapaq kasqanrayku.

³³Rikuwaspanmi asnoqa kinsa kutita ñoqamanta laq'owan, manachus laq'owanman chayqa ñan wañurqochiykimanña karqan, asnotataq kawsashaqta saqepuyman karqan, nispa.

³⁴Hinan Balaamqa angelta nirqan: —Huchallikunin, manan yacharqanichu qan hark'ashawasqaykita. Maytachus rishasqay mana allin kaqtinqa, kutikapusaq, nispa.

³⁵Angeltaq kutichirqan: —Rillay chay qharikunawan, ichaqa imatachus ñoqa kamachisqayki chayllatan ruwanki, nispa. Chaymi Balaamqa Balakpa kachamusqan umallikunapiwan rirqan.

³⁶Balaampa hamushasqanta yacharqospataq Balakqa chaskiq rirqan Moab suyu qorpa Arnón mayu qayllapi kashaq Ar llaqtata.

³⁷Hinaspa Balaamta nirqan: —Maytapunin waqyachimurqayki, ¿imanaqtintaq mana hamuyta munarqankichu? ¿Mana imatapas qanman paganaytachu yuyarqanki? nispa.

³⁸Balaamtaq kutichirqan: —Hamuniñan, qayllaykipin kashani. Ichaqa manan imatapas ñoqallamantaqa rimaymanchu, aswanpas imatachus Dios kamachiwanqa chayllatapunin rimasaq, nispa.

³⁹Chaymantataq Balaamqa Balakpiwan Kiriat-huzot llaqtata rirqanku,

⁴⁰chaypin Balakqa wakata ovejatawan nak'achirqan, hinaspa wakin aychata Balaamman paywan kashaq umallikunamanwan qorqan.

⁴¹Qhepantin paqartaq Balakqa Balaamta pusaspa Bamot-Baal orqoman wichachirqan, chaymanta qhawarispan rikurqanku karpakuspa tiyaq wakin Israel runakunata.