Read Quechua Cuzco Bible 1988 NÚMEROS 24 Bible Online

NÚMEROS 24 - Quechua Cuzco Bible 1988 bible

NÚMEROS 24

¹Balaamqa Israelta saminchananta Señor Diospa munasqanta reparaspanmi, manaña watuq rirqanñachu, imaynan ñawpaqkaq kutikunapi rirqan hinataqa, aswanpas ch'inneq cheqastan qhawarirqan.

²Hinaspa Israel runakunata ayllunkuman hina karpasqata rikuqtin, Diospa Espiritun payman hunt'aykurqan,

³hinan Balaamqa khaynata unancharqan: —Ñoqa Beorpa churin Balaammi kayta unanchani, allin rikuq ñawiyoq kaspaymi kayta willani,

⁴Diospa siminta uyarispan kayta nini, Tukuy-atiyniyoq Diosmi rikhuriypi rikuchiwan, qhawashaq ñawintinmi pampaman wikch'ukuni.

⁵¡Jacob, ancha sumaqmi karpaykikuna! ¡Israel, sinchi munaymi wasiykikuna!

⁶Sumaq qheshwa uray hinan mast'arikun, mayu cantopi inkilkuna hinan phanchirin, Señor Diospa plantasqan aloé sach'a hinan wiñan, mayu patapi cedro sach'a hinan saphirin.

⁷Israelpa ununqa wisinankunatapas llimp'arinqan, muhunkutapas allin qarpasqapin tarpunqaku. Reyninqa rey Agagmantapas aswan atiyniyoqmi kanqa, paypa munaychakuyninqa ancha mentasqan kanqa.

⁸Diosmi Egipto suyumanta horqomurqan, payqa kallpasapa salqa toro hinan yanapan. Awqan suyukunatan Israelqa munaychakunqa, paykunaq tulluntan chhallunqa, wach'inanwantaq k'irinqa.

⁹Samaykuq china leonmanmi rikch'akun, león hinan thallaykun, ¿pitaq rikch'arichiq asuykunman? ¡Israelta saminchaqqa saminchasqa kachun! ¡Diospa llaqtanta ñakaqqa ñakasqa kachun! nispa.

¹⁰Hinan Balakqa sinchita Balaampaq phiñakurqan, makinta t'aqllakuspataq nirqan: —¡Ñoqaqa awqaykunata ñakanaykipaqmi waqyachimurqayki, qantaq ichaqa ña kinsa kutitaña paykunata saminchanki!

¹¹¡Pasay! ¡Ripuy llaqtaykita! Ñoqaqa askhata pagapunaypaqmi prometekurqani, ichaqa Señor Diosmi chayta mana munanchu, nispa.

¹²Chaymi Balaamqa kutichirqan: —Kachamuwasqayki willaqkunamanqa allin sut'itan ñoqaqa nirqani:

¹³—Wasinpi hayk'an kaq qorita qolqetaña llapanta rey Balak qowanman chaypas, manan ñoqaqa Señor Diospa kamachinta p'akispa ñoqaq munayniymanta imatapas rimaymanchu, aswanpas imatachus Señor Dios kamachiwanqa rimanaypaq chayllatapunin rimasaq, nispay.

¹⁴Chhaynaqa kutipusaqmi llaqtayta, ichaqa manaraq ripushaspaymi willaykuyta munayki imaynatachus chay llaqta qanpa suyuykita hamuq p'unchaykunapi ruwanqa chayta, nispa.

¹⁵Hinaspan Balaamqa khaynata unancharqan: —Ñoqa Beorpa churin Balaammi kayta unanchani, allin rikuq ñawiyoq kaspaymi kayta willani,

¹⁶Diospa siminta uyarispan kayta nini, Qollana Diosmi yachachiwan, Tukuy-atiyniyoq Diosmi rikhuriypi rikuchiwan, qhawashaq ñawintinmi pampaman wikch'ukuni.

¹⁷Huk runatan rikushani, payqa hamuq p'unchaykunapin rikhurinqa, sinchi karupin payta rikushani. Payqa ch'aska hinan Jacobpa mirayninmanta lloqsimushan, huk reymi Israelmanta hatarimushan. Moabpa umantan sarunqa, Shet runakunatan llapanta t'ustunqa.

¹⁸Edom suyutan atipanqa, Seir orqotan munaychakunqa, Israelqa hatun mentasqan kanqa.

¹⁹Jacobmi awqankunata kamachinqa, paymi Ar llaqtapi qhepaqkunata ch'usaqyachinqa, nispa.

²⁰Chaymantataq Balaamqa Amalek runakunata rikhuriypi rikurqan, hinaspan khaynata unancharqan: —Amalek runakunaqa kay pachantinpi atiyniyoqmi karqanku, ichaqa ch'usaqyachisqan tukukunqaku, nispa.

²¹Rikullarqantaq Kayin runakunata, hinaspa khaynata unancharqan: —Kayin runakuna, pakakunaykichis ancha allinña kaqtinpas, qaqa sonqopiña qesaykichis kaqtinpas, chay qesaykichismi thunisqa kanqa, Asur runakuna presota apasuqtiykichis, nispa.

²³Chaymantataq khaynata unancharqan: —Mama qocha patakunapi tiyaq llaqtakunan huñukuspanku, wichay ladomanta hamunqaku.

²⁴Chipre islamantan barcokuna hamunqa, Asurta Hebertawanmi lliwta atipanqa, chay qhepatataq paykunapas atipasqallataq kanqa, nispa.

²⁵Chaymantataq Balaamqa wasinta ripurqan, hinallataq Balakpas wasinta kutipurqan.